Mbamba foé Jean a nga tili
7 Mvuse jame di, Yésus a nga kee dulu dé ôsu mfa’a ya Galilée. A nji be a kômbô’ô ke a wulu Judée amu bejuif be mbe be jeñe’e na ba wôé nye. 2 Ve abô’ô bejuif, di ya Nda éndelé é ne étyi,* é mbe é ntoo bebé. 3 Nde bobenyañe bé be nga jô nye na: “Kôlô’ô va ô ke Judée, ndembene beyé’é bôé be ne fe yene mame wo bo. 4 Amu teke môt a bo jam éziñ asoé éyoñ a jeñe na, bôte bese be yeme nye. Nge wo bo mame ma, liti’i bôte ya si ése za ô ne.” 5 É ne été na bobenyañe bé be nji be be liti’i na ba buni nye. 6 Nde Yésus a nga jô be na: “Éyoñe jam é ngenane te kui, ve mia, mi ne de bo éyoñ ése mia kômbô. 7 Bôte ya si be nji bi amu ya vini mia, ve ba vini ma, amu ma kañete na, mimboone miap mi ne abé. 8 Mia, betané na mi ke abôk, ve ma, me ngenane te ke abôk éte amu éyoñe jame ja be ki kôme kpwaan.” 9 Nde éyoñ a nga mane kate be mame ma, a nga li’i e Galilée.
10 Ve éyoñe bobenyañe bé be nga bet abôk, nde nye fe a nga bet, sa ke éngeñgeñ, ve asoé. 11 Nde bejuif be nga taté na, ba jeñe nye abô’ô be jô’ô na: “Nne môte nyi a ne vé?” 12 Bôte be mbe be kobô’ô abui mam menyiñe mfa’a wé, e zañe minsamba mi bôt. Bôte béziñe be mbe be jô’ô na: “A ne mbamba môt.” Ba bevo’o ki be mbe be jô’ô na: “A nji bo mbamba môt, a du’u nsamba bôt.” 13 É ne été na, teke môt a mbe ve kobô ajô dé éngeñgeñ amu be mbe be ko bejuif woñ.
14 Abô’ô zañ, Yésus a nga bete Temple a taté na a ye’ele. 15 A bejuif be mbe fe’e ne vema be jô’ô na: “Nne môte nyi a soo abime ñyeman a yeme Mintilane* di vé, amu a nji bo besikôlô?”* 16 Ajô te Yésus a nga yalane be a jô’ô na: “Mame ma ye’ele me nji so be mamien, ve ma so be môt a nga lôme ma. 17 Nge môt éziñ a kômbô bo nkômbane Zambe, môt ate a ye yeme nge jame ma ye’ele da so be Zambe nge ki na, ma kobô jame da so be mamien. 18 Môt a kobô jame da so be émien a jeñe duma dé, ve môt a jeñe duma môt a nga lôme nye, môt ate a ne môte ya benya mejôô a teke minsose miziñe mi ne be nye. 19 Nga Moïse a nga ve mia metiñ,* ve teke môt éziñe ya be mia a tôñe me.* Amu jé mia jeñe na mia wôé ma?” 20 Nsamba bôt ô nga yalane na: “Mbia nsisim a jôé wo. Za a jeñe na a wôé wo?” 21 Yésus a nga yalane be na: “Ma te bo ve jame da, a mia bese mi ntoo fe’e ne vema. 22 Amu jame di, Moïse a nga ve mia ntyi’an atyel, sa ke na wo so be nye, ve wo so be bemvamba a mia tyi’i môt atyele môse Sabbat. 23 Nge môt a tyi’iban atyele môse Sabbat na a bo te tyame Metiñe me Moïse, nde amu jé mia wô’ô ma mbia ôlun amu ma te bo na môt a bo nya mvo’é môse Sabbat? 24 Te beta tyi’ané mejô aval ane mame ma yené mis, ve tyi’ané mejô e zôsô été.”
25 Ane bôte béziñe ya Jérusalem be nga taté na ba jô na: “Ye sa ke môte ba jeñe na ba wôé nyi? 26 A tama yenan! A kobô e bôt été a be teke jô nye jôm. Ye betebe ôsu be kômeya yeme na, môte nyi a ne Krist? 27 Mfa’a wongane bia yeme vôme môte nyu a so, ve éyoñe Krist a ye so, teke môt a ye yeme vôm a so.” 28 Nté a mbe a ye’ele’e Temple, Yésus a nga yôtane na: “Mia yeme ma a mia yeme vôme ma so, a me nji so amu nkômbane wome mamien, ve wu Nyu a nga lôme ma a ne vevee, a mi nji yeme nye. 29 Ma yeme nye amu me nga so jôé dé, a môt ate nnye a nga lôme ma.” 30 Nde be nga taté na ba jeñe na ba bi nye, ve teke môt a nga kee nye mo nyul, amu awolo dé é mbe é ngenane te kpwaan. 31 Akusa bo nalé, abui bôte ya nsamba bôt é nga buni nye, a be mbe be jô’ô na: “Éyoñe Krist a ye so, ye a ye ke bo abui mesimba, a dañ abime môte nyuna a boya?”
32 Bepharisien be nga wôk ane nsamba bôte wo kobô mame ma fombô nye menyiñ, a bejôô beprêtre a bepharisien be nga lôme bezimbi na be ke bi nye. 33 Ane Yésus a nga jô na: “Ma ye tabe a mia mon éyoñ ôsusua na ma ke be Nyu a nga lôme ma. 34 Mia ye jeñe ma, ve mia ye ke yene ma, a e vôme ma ye ke, mia ye ke bo ngule ya so.” 35 Nde bejuif be nga jô bebiene na: “Môte nyu a kômbô ke vé, avale bia ye bo te yene nye? Ye a nji kômbô ke mfa’a bejuif be nga mane mialan e be begrec a ye’ele begrec? 36 Jé a kômbô jô, éyoñ a jô na: ‘Mia ye jeñe ma, ve mia ye ke yene ma, a e vôme me ne mi vo’o ki so’?”
37 Môs ô nga su’ulan, beta môse ya abôk, Yésus a nga tebe tetele a yôtane na: “Nge môt a wôk évé a za’a be ma a nyu mendim. 38 Môt ase a buni ma aval éfus é nga jô na: ‘E be émien été mendime ya ényiñe ma ye len ane atôñe mendim.’” 39 Ve Yésus a nga jô jame di a simesa’ane mfufube nsisime bôte ba buni nye be mbe na be mbeme nyoñ. Nsisim ôte be nji bi wô, amu Yésus a mbe a ngenane te nyoñe duma. 40 Bôte béziñe ya nsamba bôte be nga wô’ô mejô ma, be nga taté na ba jô na: “Môte nyi a ne fo’o nkulu mejô.” 41 Bevo’o be mbe be jô’ô na: “Nyuna a ne Krist.” Ve bôte béziñe be mbe be jô’ô na: “Ye Krist a ne so e Galilée? 42 Ye éfuse ya mintilan é nji jô na, Krist a so mvoñe bôte David a Bethléhem, nlame David?” 43 Nde nsamba bôt ô nga kandane mengame mengam ajô dé. 44 Ajô te bôte béziñe be nga kômbô bi nye ve teke môt a nga kee nye mo nyul.
45 Nde éyoñe bezimbi be nga bulan, bejôô beprêtre a bepharisien be nga sili be na: “Amu jé mi nji soo nye?” 46 Bezimbi be nga yalane na: “Teke môs éziñe môt a kobôya avale di.” 47 Bepharisien be nga yalane na: “Mia fe mi nji du’ubane nga? 48 Teke môt éziñe ya betebe ôsu, nge ke môt éziñe ya bepharisien a buni nye nga? 49 Ve nsamba bôte wu, ñwô ôte ô nji yeme Metiñe me Moïse, biyo’é a wô.” 50 Nicodème, môt a nga taté zu yene nye, a too fe môte wua ya be be, a nga jô be na: 51 “Metiñe Moïse a nga ve bia me nji tyi’i môt ajô nge be nji taté vô’ôlô nye a yemelane jam a te bo, sa nalé?” 52 Be nga yalan a jô nye na: “Wo fe, ô nji bo môte ya Galilée, nga? Jeñek a wo ye yene na, teke nkulu mejô a ye so e Galilée.”*