Mbamba foé Marc a nga tili
11 Éyoñe be nga kui bebé Jérusalem, a kui Bethphagé a Béthanie Nkôle Beolivier, Yésus a nga lôme beyé’é bé bebaé. 2 Ane a nga jô be na: “Kelané nlame mia yen ôsu valé, éyoñe mia ye kui wôé, mia ye koone mon éjakas a tii, môt éziñ a ngenane te tame bete nye yôp azukui éyoñe ji, ti’iané nye mi zuu nye va. 3 A nge môt éziñ a sili mia na, ‘Amu jé mia bo nalé?’ Katané nye na, ‘Tate a yi je, a ye jô’é na mi beta zuu je été été.’” 4 Ane be nga ke a koone mon éjakas a tii bebé mbé, nseñ, e fefele njoñ, ane be nga tiine je. 5 Ve bôte be mbe valé be nga sili be na: “Jé mia bo le, amu jé mia tiine mon éjakas?” 6 Beyé’é be nga yalane be, avale Yésus a nga lebe be na be yalan, ane bôte be nga jô’é be na be ke.
7 Nde be nga soo Yésus mon éjakas, a bôé biyé biap ya yôp e mon éjakas yôp, ane Yésus a nga tabe nye yôp. 8 Nde fe abui bôt é nga bôé biyé biap ya yôbe njoñe yôp, ve ba bevo’o be nga tyi’i mebui bilo’o fé été. 9 Bôte be mbe be wulu’u Yésus ôsu, a ba be mbe be tôñe’e nye mvuse be mbe be yôta’ane na: “A Zambe ba’ale’e nye! Ébotan é bo’o be nyu a so a jôé Yéhôva! 10 Ébotan a Éjôé ésa wongane David ja zu. A nyu a ne ôyabe yôbô été, bia ye’elane wo na ô ba’ale nye!” 11 Ane Yésus a nga nyiine Jérusalem, a ke nyiine Temple été; e wôé a nga fombô biôme bise bi mbe bi bôma’ane nye, amu alu é mbe é ntoo bebé, nde a nga ke Béthanie a minlôman Awôm a mibaé.
12 Tyé kpwaa, éyoñe be nga kôlô Béthanie, ane a nga wô’ô zaé. 13 A ngenan a za’a ôyap, a nga yen élé figuier é bili abeñe mekaé. Nde a nga ke fombô nge é bili bibuma. Ve éyoñ a nga kui je bebé, a nji koon ébuma ve mekaé; amu e zu koone na, éyoñe befiguier ba yiane wum é ngenane te kpwaan. 14 Nde a nga jô je na: “Môt éziñ a bo’o te beta di ébuma éziñe be wo.” A beyé’é bé be nga wôk ane a kobô.
15 Éyoñe be nga kui Jérusalem, a nga ke nyiine Temple été, a kuli bôte be mbe be kuse’e biôm a ba bese be mbe be ku’ane biôm atan. Nde fe a nga sô’ôlô betebele be bôte be mbe be tyendé’é moné a ba be bôte be mbe be ku’ane bezum. 16 A nji kañese na, môt éziñ a tyi’ilane Temple a be’e jôm éziñ. 17 A nga ye’ele be a jô be na: “Ye é nji bo ntilane na, ‘Nda jame ja ye loobane na nda meye’elan asu meyoñe mese’? Ve mia mi boya je asoé miñwuwup.” 18 Éyoñe bejôô beprêtre a bescribe be nga wô’ô jam éte, be nga taté na ba jeñe zene ya wôé nye. Ve be mbe be ko nye woñ, amu nsamba bôt ô mbe fe’e ne vema amu fatane ñye’elane jé.
19 Éyoñ alu é nga vin, Yésus a beyé’é bé be nga kôlô tison. 20 Ve éyoñe be nga lôte valé ndibe tyé, be nga zu koone na élé figuier é ntoo nkôt akekui minkañ. 21 Nde Pierre a nga simesane jam é nga boban a jô Yésus na: “A Rabbi, tame yen! Élé figuier ô nga yo’é é maneya kôt.” 22 Ane Yésus a nga yalane be na: “Buna’ané Zambe. 23 Ma kate fo’o mia na nge môt éziñ a jô nkôle wu na, ‘Kôlô’ô va ô ke ku mañ été,’ nge a nji bi bisô nleme wé été, ve a buni’i na jôm a jô ja zu boban, ja ye fo’o boban. 24 Amu nalé ma jô mia na, biôme bise mia ye sili a zene ya meye’elan, sila’ane bie mi bili mbunane na mi biya bie, a mia ye bi bie. 25 A éyoñe mia ye’elan, jama’ané môt ase mia yeme na mia nye mi bili ajô, ndemben Ésa wônan a ne yôp été fe a ye jamé mia bikobe bienan.” 26 *——
27 Éyoñe be nga beta so Jérusalem, nté be mbe be wulu’u Temple été, bejôô beprêtre a bescribe a bemvendé ya ayoñe be nga suan. 28 Ane be nga jô nye na: “Wo soo ngule ya bo mame ma vé? Nge ke na, za a ve wo ngule ya bo mame ma mese?” 29 Yésus a nga jô be na: “Ma fe ma zu sili mia nsili wua, nge mi yalane ma, ma ye kate mia vôme ma soo ngule ma bo je mame ma. 30 Nduane Jean ô nga so vé, ye yôp, ye be bôt? Yala’ané ma.” 31 Nde be nga taté na ba kobô be be a jô na: “Nge bi yalane na, ‘Be Zambe ya yôp,’ a ye sili bia na, ‘Nde amu jé mi nji buni nye?’ 32 Ve ye bi ne bele jô na, ‘Be bôt’?” Be mbe be ko nsamba bôte woñ, amu bese be mbe be yeme’e na, Jean a mbe fo’o nkulu mejô. 33 Nde be nga yalane Yésus na: “Bi nji yem.” Yésus fe a nga jô be na: “Ma fe ma ye kate mia vôme ma soo ngule ma bo je mame ma.”