Kalate Paul a nga tili Behébreu

9 Nnôm élat, mfa’a wé, ô mbe ô bili metiñe mé mfa’a ya ésaé é ne étyi, a vôma wé a ne étyi si va. 2 Amu étune nda ôsu ya nda éndelé é nga lôñeban, vôm ételé belambe é mbe a tebele ba bôé belet é mbe asu metuna’a;* a ja loobane na “Vôm a ne étyi”. 3 Ve mvus éndelé baa, wo koon étune nda ya nda éndelé ba loone na, “Vôm a dañ étyi”. 4 Jôme ba be’e je encens é too a gôlôt é mbe valé, a éwolo ya élat é too nduban a gôlôt, ndek é too a gôlôt é mbe été wôé, é bili manne a ntum Aaron ô mbe ô bili éfa’ale a meko’o ya élat; 5 éwolo élat éte yôp, bitôto’o bechérubin bi mbe bi buti’i ébuta’a ya éwolo ya élat* a nsisiñe wop. Ve sa ke éyoñe ya kobô bone be mame ya été ji.

6 Éyoñe biôme bite bi maneya lôñeban avale di, beprêtre ba nyiine kom ése étune nda ôsu ya nda éndelé na ba bo bisaé biap bi ne étyi. 7 Ve beta prêtre étame nnye a mbe a nyiin étune nda baa éyoñe jia mbu, a mbe a nyiine wôé a metyi, mme mete a ke ve asu dé émien a asu minseme mi bôte bevo’o ba bo amu ndiman. 8 Nde mfufube nsisim a nga liti ne fômelé na, zene ja ke vôm a ne étyi é ngenane teke yombô nté nda éndelé ôsu é mbe é ngenan é tele. 9 Nda éndelé éte é ne ndem asu éyoñe ji, a avale da wô’an a nta’ane mame wu, mimvean a mveane metuna’a ba ve. Ve mame mete me nji bo ngule ya bo na mone môte ya nlem, môt a bo ésaé é ne étyi a bo teke ayeñ. 10 Mame mete me mbe me fombô’ô fo’o ve bidi a menyu a mewobane* mevale meval. Mame mete mese me mbe me so’o Metiñe me Moïse a me mbe me fombô’ô nyule minsôn, a be mbe be tôñe’e me akekui éyoñ éyoñe ya sôane mam é nga kpwaan.

11 Ve éyoñe Krist a nga so, ane beta prêtre ya mbamba be mame be maneya boban, a nga lôte nda éndelé ja dañ anen a nya mvo’é a dañe menda bindelé mese môta binam a lôñeya, nalé a tinane na, é nji bo ététéa be ne koone je si. 12 A nga nyiine vôm a ne étyi, sa ke a metyi beyôme bikela, nge a metyi beyôme benyak, ve a metyi mé émien, éyoñe jia ya biyoñe bise a nga kôté* bia nnôm éto. 13 Amu nge metyi beyôme bikela a ma beyôme benyak, a asube ya bone benyak ba miame* be bôte be ne mvit asu na be bo mfuban, be ne fubu nyule môt, 14 ngumane ki metyi me Krist, mme mete, a zene ya nsisime ya nnôm éto, a nga ve émiene teke bijô be Zambe, ye ma ye ke fubu mone môte wongane ya nleme biwuwua mimboon, ndembene bi ne bo vevea Zambe ésaé é ne étyi?

15 Ajô te a ne ntebe zañe ya mfefé élat, ndembene mbôl awu é nga so mfa’a ya kôté bôt a zene ya ntañ, mintyamane metiñe be nga bo nnôm élate si, ba be nga loobane be ne bi ngaka’a ya éli’i ya nnôm éto. 16 Amu vôm élat é ne, awu ya môt a ne ntebe zañe ya élat éte da yiane boban. 17 Amu awu da yemete élat, élat é nji bi ngule nté ôse ntebe zañe ya été a ngenan a nyiñi’i. 18 Jôme te nje élat ôsusua é nji yem,* teke na metyi ma sôéban. 19 Amu éyoñe Moïse a nga mane kobô bôte bese ajô atiñ ése ya Metiñe me Moïse, a nga nyoñe metyi me mone nyak a ma me mon ékela a mendim, a dup évele éyé a hysope, a miame me kalate* a be bôte bese, 20 a jô’ô na: “Nyuna a ne metyi ya élate Zambe a nga jô mia na mi ba’ale.” 21 A nga miame fe metyi nda éndelé a bisua bise ba belane bie asu ésaé é ne étyi. 22 Yaa, avale Metiñe me Moïse ma jô, bebé biôme bise bi ne bo mfuban a metyi, a nge metyi me nji sôéban, teke njaman abé ô ne boban.

23 Ajô te, é mbe é sili’i ndeme ya mame ya yôp, asu na bi bo mfuban a zen éte, ve mfa’a ya biôme ya yôp, da sili metuna’a me ne mvaé a dañe malé. 24 Amu Krist a nji nyiine vôm a ne étyi a nga boban a mo, nnye ate a ne éyeka’a ya jôm é ne fo’o, ve a nga ke yôp ébien, ndemben éyoñe ji, a tebe ôsu* Zambe asu dangan. 25 A nji be na a ve émien abui biyoñ, fo’o ve ane éyoñe beta prêtre a nyiine vôm a ne étyi mbu ane mbu a metyi me nji be émé. 26 Nalé momo, a nga ye juk éyoñ ése, ataté éyoñe bone be nga taté na ba bialé si. Ve éyoñe ji a yenéya éyoñe jia ya biyoñe bise, memane ya émo,* asu na a vaa nsem a zene ya metuna’a mé. 27 A fo’o ve avale bôte ba wu éyoñe jia ya biyoñe bise, ve mvuse ya valé ntyi’ane mejô wo ye boban, 28 nde avale te fe Krist a nga ve émien éyoñe jia ya biyoñe bise na a be’e minseme mi abui bôt; a éyoñe baa a ye yené, a ye ke beta bo ajô a nsem, a bôte ba yange nye a nlem ôse asu nyiiane wop mbe ba ye yene nye.