Kalate baa Pierre a nga tili

1 Ma Simon Pierre, ôlo a nlômane Yésus Krist, ma tili ba be nga bi mbunan ô ne dia ane éñwongan,* a zene ya zôsô Zambe wongan a Nyii wongan, Yésus Krist:

2 Beta mvam a mvo’é bi nen e be mia a zene ya nya ñyemane Zambe a Yésus Tate wongan, 3 amu ngule Zambe é nga ve bia* biôme bise bia volô na bi nyiñ a nkoone Zambe woñ, a zene ya nya ñyemane ya Nyu a nga loone bia a zene ya étôto’o jé a mame mé me ne mvaé. 4 A zene ya mame mete, a nga ve bia* bengaka’a be ne anen a dia, ndemben a zene ya mame mete, mi ne bo benyoñe ngabe ya duma Zambe ane minsisim, a nga bo jame di amu bi nga tube mbia ntabane ya émo ji, nnye ate a soo mbia minkômban.*

5 Amu jam éte, jeñané a ngule jenan ése na mi kô’ôlane mbunane wônan, mame me ne mvaé, mame me ne mvaé menan, ñyeman, 6 mi kô’ôlane ñyemane wônan, njôane nlem, mi kô’ôlane njôane nleme wônan, mbane ya jibi, mi kô’ôlane mbane ya jibi wônan, nkoone Zambe woñ, 7 mi kô’ôlane nkoone Zambe woñe wônan, nye’ane ya bôte be ne abume da ba nye’esan, nye’ane bôte be ne abume da ba nye’esane wônan, mi kô’ôlane nye’an. 8 Amu nge mefulu ma me ne be mia a na ma fuluku, ma ye kamane mia na mi bo mame me ne te yian, nge bo te wume bibuma* mfa’a ya nya ñyemane ya Tate wongane Yésus Krist.

9 Amu môt ase a jembane mefulu ma a ne ndindim, a dimeya mise mé éfufup,* a vuaneya na a nga mane tunebane minsem a nga bo den a ntoo ayap éyoñ. 10 Nde, a bobejañ, jeñané a ngul ése na nloone wônan a ntobane wônane bi bo fo’o été asu denan; amu nge mia ke ôsu a bo mame ma, mia ye ke ku a zen éziñ. 11 E nya ajôô, a zen éte mia ye bulu bi* fane ya nyiin Éjôé ya nnôm éto Tate wongan a Nyii wongane Yésus Krist.

12 Amu jam éte, me ne kom ése nkômesane ya ba’alane mia mame mete, akusa bo na mia yeme me a na mi tele ne bip e benya mejôô be ne be mia. 13 Ve ma, nté ôse me ngenan e tabernacle nyi,* ma yene na é ne zôsô ya tindi mia a mimba’alan, 14 me yeme’e na tabernacle wome nyi a ntoo bebé ya kôlô, avale fe Tate wongane Yésus Krist a nga kôme ma de kat. 15 Kom ése, ma ye jeñ a ngul ése na mvuse nkeane wom, mi bo ngule ya simesane* mame mete.

16 Teké’é, bi nji belane bivôlôvôla minkañete ya fe’e môta binam, éyoñe bi nga kañete mia ajô ya ngul a éyoñe Tate wongane Yésus Krist a ye bo a ntoo valé,* ve a mbe amu biabebiene bi nga yen étôto’o jé a mis. 17 Amu a nga nyoñ ésemé a ékaña’a be Zambe Ésa wongan, éyoñe mejô ane ma me nga jôbane* mfa’a wé a zene ya étôto’o ya duma dé: “Mone wome nyu, ma nye’e nye, ma wô’ô nye mvaé.” 18 Ôwé, bi nga wô’ô mejô mete me so’o e yôp été nté bi mbe a nye nkôl ô ne étyi.

19 Nde bi too fo’o ndi a mejô bekulu mejô; a mia bo mvo’é ya kôme vô’ôlô me aval ane lambe a faé vôme dibi é ne, (akekui tyé ja lendé a ôteté ya môse wo ye tôô) e minleme mienan été. 20 Amu mia taté yeme na, teke nkulan ajô ya Mintilane wo so a fe’e ya môta binam. 21 Amu teke nkulan ajô éziñ ô nga so a nkômbane ya bôt, ve bôte be nga kate foé Zambe ntindan* a mfufube nsisim.