Mame minlôman
10 A nga bo na, môt éziñ a mbe Césarée a too jôé na Corneille, a mbe évete 100 bezimbi ya Italie. 2 Émien a bôte ya nda jé be mbe be ko Zambe woñ, a mbe fe a bo’ok abui mimveane ya mvam,* a abui meye’elane me nja’ane kom ése. 3 Bebé mewolo melale* ya mame ngô’é a nga bi ñyenan, éngele Zambe a za’a be nye, a jô nye na: “A Corneille!” 4 Corneille a nga fombô nye a ko mbia woñ, a sili nye na: “A Tate, jé wo yi na me bo?” A nga jô nye na: “Zambe a wô’ôya meye’elane môé, a simesaneya fe abui mimveane ya mvame wo bo.* 5 Nde ñhe, lôme’e bôte Joppé be ke loone môt a too jôé na Simon, nnye fe ba loone na Pierre. 6 Môt ate a mbe nneñe nda be Simon, nkôme bikôp, nda jé é ne bebé mañ.” 7 Nné ane éngele a nga kobô a nye a nga li’i nye, a nga loone bebo bisaé bé bebaé a mone bezimbi wua a mbe a too nye ndi, 8 ane a nga mane kañete be jam ése da te boban a lôme be Joppé.
9 Môs ô nga tya’a valé, nté be mbe be kele’e dulu dap ôsu, a éyoñe be mbe be nga subu bebé a tison, Pierre a nga bete nda yôp, bebé zañe môse* na a ye’elan. 10 Ve a nga wô’ô mbia zaé a kômbô di. Nté be mbe be yame bidi, ane a nga ku avem a bi ñyenan, 11 ane a nga yene yôp é yoo, a jôm éziñ é sisi’i si, é too ane beta éfuse ndombo, é yiane meku’u menyine ya si; 12 été wôé a mbe na, mevale betite mese me bili mebo menyiñ, betite ba vutan a abum, a ba ba ya’aé, a anone ya yôp. 13 Ane éngele a nga jô nye na: “Kôlô’ô si a Pierre, wôék ô di!” 14 Ve Pierre a nga jô na: “Momo a Tate, amu me ngenane te tame di jôm éziñ é ne mvite nge étyi avale metiñe ma jô.” 15 Ane éngele a nga beta kobô nye éyoñe baa, a jô nye na: “Te loone mvit, biôme Zambe a maneya fubu.” 16 Jame di é nga bobane biyoñe bilal, a été été, ndombo éte é nga bulane yôp été.
17 Nté Pierre a mbe a ngenane fe’e ne vema, a jeñe’e na a yem atinane ya jam a ndeme mane yen, bôte Corneille a nga lôme be mbe be tele akak, be jeñe nda Simon. 18 Be nga loone bôte be mbe nda été, a sili nge nne Simon, nnye fe ba loone na Pierre a mbe nneñe valé. 19 Nté Pierre a mbe a ngenan a fase’e ajô ya ñyenan a te bi, mfufube nsisim a nga jô nye na: “Tame yen! Bôte belale ba jeñe wo. 20 Tebe’e tetele ô sis a ke a be, te bo bisô amu ma ma te lôme be.” 21 Nde Pierre a nga sis a ke koone bôte bete a jô be na: “Ma me ne môte mia jeñ, jé ja te soo mia va?” 22 Be nga jô na: “Corneille, évete bezimbi a ne môt a ne zôsô a ko fe Zambe woñ, bejuif bese ba yene nye mva’é, Zambe a nga lôm éngele be nye na, a lôme bia be wo na ô ke nda jé, ndemben a wô’ô jam ô bili na wo kate nye.” 23 Nde a nga jô be na be nyiin, ane a nga ba’ale be.
Môs ô nga tya’a valé, a nga tebe tetele a ke a be, bebuni béziñe ya Joppé be nga ke a nye. 24 Môs ô nga tya’a valé, a nga kui Césarée. É ne été na Corneille a mbe a yange’e be, a nga loone fe bivuvumane bié a bemvôé bé. 25 Nné ane Pierre a nga suan, Corneille a nga tôbane nye a nga ku nye mebo, a buti asu dé si* ôsu wé. 26 Ve Pierre a nga bete nye si a jô’ô nye na: “Tebe’e; ma fe me ne fo’o ve môta binam.” 27 Nté ba nye be mbe be la’an, a nga nyiine nda été a koone na abui bôt é maneya sulan. 28 A nga jô be na: “Mia kôme yem ane é nji yiane na mone juif a tabe, nge subu môte ya ayoñ afe bebé, ve Zambe a te liti ma na me nji yiane loone môt éziñe na a ne mvit. 29 Nde ma te so teke fet éyoñe wo te bañete ma. Nde ma sili wo na amu jé wo te bañete ma?”
30 Nde Corneille a nga jô na: “Den a ntoo melu menyin ataté awolo di, me mbe me ye’ela’ane nda jam, bebé mewolo melale* ya mame ngô’é, e teme na, môt a be’e biyé bi faé a ntele ma ôsu 31 a nga jô na: ‘A Corneille, Zambe a wô’ôya meye’elane môé, a a simesaneya mimveane ya mvame wo bo.* 32 Nde lôme’e bôte béziñe Joppé, a ke loone Simon, nnye fe ba loone na Pierre. Môt ate a ne nneñe nda be Simon, nkôme bikôp a too fefele mañ.’ 33 Ma te ji’a lôme na be zu loone wo, a a ne fo’o mbamba jam amu wo te so. Nde éyoñe ji, bia bese bi ntele ôsu be Zambe a vô’ôlô mame mese Yéhôva* a te lôme wo na ô zu kate bia.”
34 Ane Pierre a nga taté nkobô a jô na: “Éyoñe jina fo’o me yemeya na Zambe a nji bo ôbangam, 35 ve meyoñe mese, Zambe a kañese môt a ko nye woñ, a bo’o fe mame me ne zôsô. 36 A nga lôme bone be Israël mbamba foé ya mvo’é a zene ya Yésus Krist, nnye a ne Tate ya bôte bese. 37 Miabebiene mia yeme na jam éte é nga kobane Judée ase, ataté Galilée mvuse nduane Jean a mbe a kañete’e 38 ajô Yésus, nnye a mbe môte ya Nazareth, avale Zambe a nga ve nye mfufube nsisim a ngul, ane a nga ke si ése, a bo’o bôte mva’é, a saé bôte bese mbia minsisime mi mbe mi ndeñele’e, amu Zambe a mbe a nye. 39 A bi ne bengaa ya mame mese a nga bo si bejuif, a Jérusalem fe, ve be nga wôé nye éyoñe be nga tyelé nye élé. 40 Zambe a nga wômôlô môt ate mvuse melu melal, a a nga kañese na a yené be bôt, 41 sa ke be bôte bese, ve be bengaa Zambe a nga taté tobe be bia bi nga di a nyu a nye mvuse ñwômane miñwuane wé. 42 A nga telé fe bia atiñe na bi kañete bôt a bo’olô na, nnye Zambe a nga telé ane ntyi’i mejô bevevee a miñwuan. 43 Bekulu mejô bese ba bo’olô na, môt ase a buni nye a ye bi njamane minsem a zene ya éyôlé jé.”
44 Nté Pierre a mbe a ngenan a kobô’ô mame mete, mfufube nsisim a nga vebane be ba bese be mbe be wô’ô mejô mete. 45 A bebuni be mbe mintyi’ane metyele be nga so a Pierre, be mbe fe’e ne vema, amu mvean ô ne zezé ya mfufube nsisim ô mbe ô veba’ane fe be bôte ya meyoñ. 46 Amu be nga wô’ô be be kobô’ô minkobô ya éza meyoñ, be va’a Zambe duma. Nde Pierre a nga sili na: 47 “Ye môt éziñ a ne kamane bôte ba na be bo te dubane mendim a too ke na, be maneya nyoñe mfufube nsisim, avale bia fe bi nga nyoñe nye?” 48 Éyoñe te a nga jô be na, be dubane jôé Yésus Krist. Nde be nga ye’elane nye na a tabe a be, tañe bone melu.