Mbamba foé Luc a nga tili

4 Ane Yésus a nga kôlô Jourdain, Zambe a nga ve nye mfufube nsisim, a nsisim ôte ô nga kee nye nkôte si. 2 A nga bo melu 40 wôé teke di jôm, éyoñe me nga man, a nga wô’ô zaé, nde Diable a nga zu ve’ele nye. 3 Ane Diable a nga jô nye na: “Nge ô ne mona Zambe, jô’ô ako’o di na é veñesan éfuse belet.” 4 Ve Yésus a nga yalane nye na: “É ne ntilane na, ‘Môt a nji yiane nyiñe ve a belet étam.’”

5 Nde a nga kee nye nkôle yôp a liti nye bijôé bise ya si ane nkabeke dis. 6 Nde Diable a nga jô nye na: “Ma ye ve wo éjôé ya bijôé bise bi, a duma ya été, amu bijôé bite bise bi ne émbiam, a ma ve bie môt ase ma yi. 7 Nde nge wo kañe ma fo’o ve éyoñe jia jia, bise bia ye bo émbiôé.” 8 Yésus a nga yalane nye na: “É ne ntilane na, ‘A ne Yéhôva* Zambe wôé nnye wo yiane kañ, a nnye étame wo yiane bo ésaé.’”

9 Nde a nga kee nye Jérusalem a ke telé nye vôm a dañ ôyabe yôp e Temple a jô nye na: “Nge ô ne mona Zambe, yô’ô a ke tebe si, 10 amu é ne ntilane na, ‘A ye jô beéngele bé na be ba’ale wo,’ 11 a, ‘Ba ye be’e wo mo map na, abo dôé é bo te kômôtô akok.’” 12 Yésus a nga yalane nye na: “É ne ntilane na, ‘Ô nji yiane ve’ele Yéhôva* Zambe wôé.’” 13 Nde éyoñe Diable a nga mane ve’ele nye, ane a nga li’i nye a yange mbamba éyoñe mfe.

14 Ane Yésus a nga bulane Galilée a ngule ya mfufube nsisim, be nga se’e nye ngoto éte ése. 15 Nde fe, a nga taté na a ye’ele besynagogue bap, a bôte bese be nga ve nye duma.

16 Nde a nga ke Nazareth, vôm a nga yaé. Môse Sabbat, aval a mbe a bili fulu ya bo, a nga ke nyiine synagogue a tebe tetele na a lañ. 17 Nde be nga ve nye mvulukane kalate nkulu mejô Ésaïe. Ane a nga yoé mvulukane kalate a kui vôm a mbe ntilane na: 18 “Nsisime Yéhôva* ô ne be ma, amu a nga ve ma wô na me kañete minzôzoé mbamba foé, a nga lôme ma na me kate bôte be ne mimbô’ô na ba ye bi éto fili, na mindindime mia ye yen, na bôte ba tôban étibila’a ba ye bi éto fili, 19 a na me kañete mbu ya ébotane Yéhôva.” 20 Ane a nga mane vuluku mvulukane kalate a bulane wô môt a mbe a saé synagogue a tabe si. Mise me bôte bese be mbe synagogue me mbe me beme nye nyul. 21 Nde a nga taté na a jô be na: “Môse wu, éfuse mi ndeme wô’ô le é tôébaneya.”

22 Ane bese be nga taté na ba se’e nye. Be nga kame mbamba be mam a mbe a jô’ô, ane be nga jô na: “Sa mone Joseph nyi nga?” 23 Nde a nga jô be na: “Ma yeme na mia ye jô ma na, ‘A dokita saé womien, bo’o fe e jale dôé va mame bi nga wô’ô na ô nga bo Capernaüm.’” 24 Nde a nga jô na: “Ma kate fo’o mia na, bôte be ne teke semé nkulu mejô jale dé. 25 Ma kate fo’o mia na, abui minkus é mbe Israël melu me Élie, éyoñe mveñ é nga tebe mimbu milal a ngon ésaman, a nalé a nga soo beta zaé nlam ôte ôse. 26 Zambe a nji lôm Élie be nkuse minga ôfe ya wôé, ve a nga lôme nye fo’o ve be nkuse minga ya Sarepta, si ya Sidon. 27 Nde fe abui minzezam é mbe Israël melu me nkulu mejô Élisée, ve teke wua ya été ô nga yet,* fo’o ve Naamân môte ya Syrie.” 28 Bôte bese be mbe synagogue, be nga wô’ô mbia ôlun, éyoñe be nga wôk ane a kobô mejô mete. 29 Ane be nga tebe tetele a dutu nye atane na be vaa nye tison été, ane be nga kee nye abôbône nkôl, vôme tisone jap é mbe nlôñan, amu be mbe be kômbô’ô wua nye yee si. 30 Ve a nga solane be mo a ke vôm a mbe a kele’e.

31 Ane a nga sis a ke Capernaüm tisone ya Galilée. A nga ye’ele be môse Sabbat. 32 A be mbe fe’e ne vema éyoñe be nga yen aval a mbe a ye’ele’e, amu a mbe a ye’ele’e be ane môt a bili éjôé. 33 E synagogue été, môt éziñ a mbe valé, mbia nsisim a mbe be nye. Ane a nga yôtane yôp été na: 34 “Ééh! A Yésus ya Nazareth, bi bili ajô avé a wo? Ye ô soya na wo zu bia mane wôé? Ma kôme yeme za nye ô ne, Môt a ne étyi, Zambe a nga lôm.” 35 Ve Yésus a nga komekane wô a jô’ô na: “Dibik anyu, kôlô’ô be nye.” Éyoñe mbia nsisim a dumeya nye si vôme bôte be mbe, ane mbia nsisim a nga kôlô nye nyule teke nye bo mbia jam. 36 Ane bese be nga bo fe’e ne vema, a môt ase a nga taté na a sili nyu mbo’o na: “Avé fe di, za avale ngul éjôé di? A kôme jô mbia minsisime na mi kôlô, mi kôlô fe!” 37 Be nga dañe beta se’e nye meku’u minjoñe ya ngoto ése.

38 Éyoñ a kôlôya synagogue, ane a nga ke nda Simon. A nga ke koone na ngule tit* é mbe é bili ntyi minga Simon, ane be nga sili nye na a volô nye. 39 Nde a nga subu nye bebé, a nga bo na ayôñ é tebe, ane tit é nga man. Été été, nde a nga kôlô si a taté na a belane be.

40 Ve éyoñe nlô jôbô a nga dim, bôte bese be mbe be bili minkôkone be nga soo mie be nye, ane a nga beté môt ase ya be be mo nyul a saé be. 41 Nde fe mbia minsisime mi nga kôlô be abui bôt, mi kobô’ô tyiñe yôbe na: “Ô ne Mona Zambe.” Ve a nga komekane mie, a nji jô’é mie na mi kobô ajô dé, amu mi mbe mi yeme’e na a ne Krist.

42 Ve éyoñe tyé é nga lendé, ane a nga ke vôm a mbe étam, ve nsamba bôt ô nga taté na wo jeñe nye, ane ô nga zu koone nye vôm a mbe, be nga kômbô kamane nye na a li’i be. 43 Ve a nga jô be na: “Ma yiane fe kañete mbamba foé ya Éjôé Zambe minlame mife, amu jame me nga soo de nde le.” 44 Ane a nga ke kañete besynagogue ya Judée.