Mame minlôman

24 Mvuse melu metan, beta prêtre Ananias, bemvendé a loya be mbe be loone na Tertilus, be nga ke be ngovina na be kate nye mame ba bo’olô Paul. 2 Éyoñe be nga loone nye, Tertilus a nga taté na a bo’olô Paul mam a jô’ô na:

“Amu bia nyiñe beta mvo’é été éjôé jôé si a na, amu atyeñe ñyenane mame dôé, mbamba mintyendane mi nga boban ayoñe dangan 3 a biyoñe bise, a fe bevôme bese, bia yemelane jame di, a Wo, Ntômba Félix, a bia ve wo beta akiba. 4 Ve amu me nji kômbô nyoñe wo abui éyoñ, ma ye’elane wo na ô bo mbamba nleme ya vô’ôlô bia mone jôm. 5 Bi nga yene na môte nyi a ne mbia jôm,* a tindi bejuif ya si ése na be bo éjôé éngana’a, a ne fe ntebe ôsu ya nsamba bôte ba loone na bôte ya Nazareth. 6 A nga jeñe fe na a ve Temple mvit, nde bi nga bi nye. 7 *—— 8 Éyoñe womiene wo ye fas ajô éte, wo ye koone na mame mese bia bo’olô nye me ne été.”

9 Éyoñ éte bejuif bese be nga fulane tyiñe jia, be yemete’e na mame mete me ne été. 10 Éyoñe ngovina a nga ve Paul nkobô, a nga yalane na:

“Amu ma yeme na, ô ne ntyi’i mejô ya ayoñe di tañ abui mimbu, ajô te me ne nkômesane ya kate wo jame ma yeme mfa’a ya di ba bo’olô ma. 11 Avale womien ô ne ke yemelan, melu 12 me ngenane te lôte nté ane me nga ke Jérusalem na ma ke kañe Zambe; 12 a be nji koone ma me sañeta’an a môt éziñe Temple, nge kuli jo’ojo’o synagogue été nge ke tison. 13 Nde fe be nji bo ngule ya liti wo jame da bo’olô bijô be nga ve ma éyoñe ji. 14 Ve ma meme jame di be wo na, a ne amu ma tôñe miñye’elane ya ñyebe ba loone na, ‘nsamba bôte ya Nazareth,’ a na ma bo Zambe ya bemvamba bangan ésaé é ne étyi. Nde fe ma buni mame mese me ne ntilane Metiñe me Moïse a mejô bekulu mejô. 15 Me bili ndi nleme be Zambe, nje fe bôte ba be bili na, ñwômane miñwuane wo ye boban asu bôte be ne zôsô a ba be ne bikotekot. 16 Amu jam éte, ma jeñ a mezene mese na me ba’ale mbamba mone môte ya nleme mise me Zambe a mise me bôt. 17 Nde mvus abui mimbu, me nga so na ma zu ve bôte bam mimveane ya mvam a ve Zambe mimvean. 18 Nté me mbe me kôme’e mame mete, be nga koone ma Temple me too mfuban avale Metiñe me Moïse ma jô, ve be nji koone nsamba bôt ô bo’o jo’ojo’o, ve bejuif béziñe ya ngoto ya Asie mbe be mbe be bo’olô’ô de, 19 bejuif bete mbe ba te yiane zu kobô va den, nge be bili jam éziñe ya bo’olô ma. 20 Nge na, bôte ba bebien, be kate’e mbia jame be nga yene me bo’ok éyoñe me mbe me tele Sanhédrin.* 21 Nge ô vaa ve jame da me nga bo éyoñe me nga yôtane zañe jap na: ‘Ba tyi’i ma ajô môse wu amu ma buni na, miñwuane mia ye wômô!’”

22 Ve, amu Félix a mbe a kôme’e yeme mame mese ma fombô Zene* nyi, a nga jô be na, be beta so môs ôfe a jô’ô na: “Éyoñ ése njôô bezimbi Lysias a ye so, éyoñe te nje ñhe ma ye tyi’i mejô mese ma fombô mia.” 23 Ane a nga jô évete bezimbi na be futi Paul nda mimbôk, a be ve nye abime fili éziñ, a na bôte bé be zu yene nye a ve nye biôm a yi.

24 Mvuse bone melu, Félix a nga suan a minga wé Drusille, nnye ate a mbe ngone juif, ane a nga lôme na be ke loone Paul, na a vô’ôlô nye a na a kobô ajô ya mbunane be Krist Yésus. 25 Ve éyoñe Paul a nga kobô ajô ya zôsô, a na môt a yiane jôé émien a ntyi’ane mejô wo zu, Félix a nga ko woñ a jô na: “Telé’é abim éte den, ye ô wô’ôya? Ve éyoñe ma ye kômbô beta vô’ôlô wo ma ye loone wo.” 26 A mbe fe a buni’i na Paul a ye ve nye moné, amu nalé, a nga lôme na be loone nye kom ése na a laan a nye. 27 Ve éyoñe mimbu mibaé mi lôteya, Porcius Festus a nga tyendé Félix; amu Félix a mbe a yiik na bejuif be yene nye mvaé, nde ñhe a nga li’i Paul a fete.