Kalate Paul a nga tili Tite
1 Paul, mbo ésaé Zambe a nlômane Yésus Krist, nnye ate mbunane wo wô’an a wu bôte Zambe a nga top, a nya ñyemane ya benya mejôô, mbe bete ba wô’an a mboone bia bo Zambe ésaé a nlem ôse. 2 Mbôka’a ya ñyeman ôte ô ne ényiñe ya nnôm éto, nje éte Zambe, nnye a se ngule ya laane minsos, a nga tiñeti bia den a ntoo ayap éyoñ; 3 ve éyoñ éyoñe jé é nga kpwaan, Zambe, Nkôté wongan a nga bo na, bôte be yeme mejô mé a zene ya ésaé nkañete a nga ve ma. 4 Ma tili Tite, mone wome ma nye’e amu mbunane wongan:
Beta mvam a mvo’é bia so be Zambe Ésa, ba Yésus Krist Nyii wongane bi tabe’e be wo.
5 Me nga li’i wo Crète na ô kôme mame me mbe me ndeñele’e,* a na ô telé bemvendé bitisone bitison avale me nga ye’ele wo: 6 nge fam éziñ é ne valé teke bijô, nlu’ane ve a minga wua, é bili bone ba kañe Zambe a môt éziñe te bo’olô na ba te bo mbia jam,* be too te bo éngana’a.* 7 Mbôl a ne mbo ésaé Zambe,* môt a ne ntebele a yiane bo te bijô, a nji yiane ben asimesane bôte bevok, a nji yiane bo môt a ji’a wôk ôlun, nge nso’o meyok, nge évô,* nge mbôndé mefe’e ya du’u bôt, 8 ve a yiane bo anyep, môt a nye’e mbamba be mam, môt a bili mbamba mfasan,* nyu a yeme ba’ale élat, nyu a yeme jôé émien, 9 nyu a kôme tôñe benya mejôô éyoñ a ye’ele bôt, ndemben a ye bo ngule ya ve bôte ngule nyul* a zene ya mbamba miñye’elan, a komekane bôte ba nye’e bisô.
10 Amu bôte be ne éngana’a be ne abui, ba ba kobô zezé mam a bôte medu’an, e dañedañe bôte ba wumulu ntyi’an atyel. 11 Wo yiane dibe be menyu, amu mame bôte bete ba ye’ele, ma soo jo’ojo’o menda me bôt; mbôle ba jeñe mfi wop bebien, ba ye’ele bôte mame me nji yian. 12 Wua ya be be, nkulu mejô wop émien a nga jô na: “Bôte ya Crète be ne belaa minsos, betite ya afan, minleles, benye’e bidi.”
13 Jame nkulu mejô ate a nga jô é ne été. Ajô te nde, komeka’ane be a ayok ése, na mbunane wop ô beta bo ngul 14 a na be bo teke tôñe zezé minkana bejuif a metiñe me bôt, mme mete ma bo na bôte be lume benya mejôô mvus. 15 Mame mese me ne mfuban asu bôte be ne mfuban, ve asu bôte be ne mvit, a ba be nji bi mbunan, mame mese me ne ve abé, amu be maneya ndaman asimesane dap a mone môte ya minleme miap. 16 Ba jô e bôt été na ba yeme Zambe, ve ba ve nye ôsone nyul a mimboone miap, amu be ne avale bôte Zambe a vini, be ne melo a be nji bo avale bôte da yian asu mbamba ésaé éziñ.