Mame minlôman

2 Nté be mbe be bo’o abô’ô ya Pentecôte, bese be mbe nsamba vôme wua. 2 E teme na, beta éduñ a nga so yôp a funa’an éduñe ya beta évuñulu a a nga mane jaé vôm ase be mbe be too. 3 Ane jôm é too ane ayeme nduan é nga yené be be, a é nga betebe môt ase ya be be nlô, 4 ane be nga jaléban a mfufube nsisim a be nga taté na ba kobô minkobô mevale meval, fo’o ve ane mfufube nsisim a nga ve be ngule ya kobô.

5 Biyoñe bite, bejuif be mbe be semene Zambe, be so’o meyoñe mese ya si be mbe e Jérusalem. 6 Nde éyoñ éduñ éte é nga bo, beta nsamba bôt a nga sulan a be mbe fe’e ne vema amu môt ase a mbe a wô’ôk ane ba kobô nkobô ya jale dé. 7 Be nga kame jam éte ane be nga taté na ba jô na: “Za aval ajôô di, nga bôte bese ba kobô ba be ne bôte ya Galilée? 8 Nde, aval avé môt ase ya be bia a wô’ô nkobô ba kobô jale dé?* 9 Bôte ya Parthes, e Mèdes a Élamites, e ba be too Mésopotamie, e Judée a Cappadoce, e ba ya Pont a ngoto ya Asie, 10 e ba ya Phrygie a Pamphylie, bôte ya Égypte a minlame ya mfa’a ya Libye bebé Cyrène, bôte be nga zu ba wulu e Jérusalem be so’o Rome, bejuif a beprosélyte, 11 bôte ya Crète a ba ya Arabie, bia bese bia wô’ô be be kobô’ô mbamba be mame ya Zambe minkobô miangan.” 12 Ôwé, bese be mbe fe’e ne vema, menyu me yoo, môt ase a jô’ô nyu mbo’o na: “Jame di da tinan aya?” 13 Ve jame da, bôte bevo’o be nga kpwe’ele be a jô na: “Ba so’o meyok.”*

14 Ve Pierre a nga tebe a minlôman Awôm a wua a kobô be yôp été a jô’ô na: “A bôte ya Judée a mia mi too Jérusalem, tuka’a yemané jame di a kôme’e vô’ôlané bifia ma zu kobô. 15 Bôte ba be nji so’o meyok avale mia simesan, amu bi ngenane ve mewolo ébule ya mame tyé.* 16 Ve jame di é nga jôban a zene ya be nkulu mejô Joël: 17 ‘“A melu ma su’ulan,” nalé Zambe a jô “ma ye sôé mfufube nsisime wome be bôte ya bevôme bese, a bobefame benan a bobebinga benane ba ye kuli mejô, bendômane benane ba ye bi miñyenan a benya bôtô benane ba ye yeme biyeyem, 18 to’o bebo bisaé bame be ne befam a ba be ne binga, ma ye sôé mfufube nsisime wome be be melu mete, a ba ye kuli mejô. 19 A ma ye bo bitua bi mame yôp a si, mame mete ma ye bo metyi a nduan a ôtita ô too évindi ne viu. 20 Nlô jôbô a ye bo évindi ne viu, a ngone ja ye bo metyi ôsusua na beta môs a môse ya étôto’o Yéhôva* wo so. 21 A nyu ase a loone jôé Yéhôva* a ye bi ényiñ.”’

22 “A bôte ya Israël, vô’ôlané mejô ma: Yésus ya Nazareth a mbe môte Zambe a nga lôm, jam éte é nga kôme yené ne ngeññ a zene ya mesimba, bitua bi mam a mendem a nga bo a ngule Zambe zañe jenan, avale miabebiene mia yen. 23 Zambe a mbe a yeme’e na ba ye bi Yésus, nde a nga tyi’i na da ye bobane nalé. Nnye ate mi nga ve bôte ba biasé metiñe na be tyelé nye élé a wôé nye. 24 Ve Zambe a nga wômôlô nye éyoñ a nga tiine nye ngata’a ya awu, amu é nji be é yiane na ngata’a éte* é ke ôsu a bi nye. 25 Amu David a jô mfa’a wé na: ‘Ma telé Yéhôva* ôsu wome kom ése, amu a ne ma mbo nnôm, ma ye ke feñelane môs éziñ. 26 Amu nalé nleme wom ô ne mevak, a ôyeme wom ô ne beta mevak. A ma* ye nyiñe me too ndi a Zambe; 27 amu wo ye ke ma* li’i Soñ,* nge jô’é na nyule jam é boé, amu ma ba’ale élat a wo. 28 Ô nga bo na me yeme mezene ya ényiñ; wo ye jalé ma a beta meva’a vôm ô ne.’*

29 “A bôt, a bobejañ, kañesa’ané na me kobô mia teke ko woñ ajô David, nlô ya nda bôt, nnye ate a nga wu a jambe, a soñe jé é ne e tisone nyi azukui den. 30 Amu a mbe nkulu mejô, a mbe a yeme na Zambe a nga kane nye ngana na, a ye toé môte wua ya mvoñe bôte jé* éto njôane jé, 31 a nga yene ñwômane Krist ôsusua na wo boban, a a nga kobô a jô’ô na a ye ke li’i e Soñ,* nge na nyule jé ja ye ke boé.* 32 Zambe a nga wômôlô Yésus ate, a bia bese bi ne bengaa ya jam éte. 33 Nde amu a ntoo mbetebane yôp mbo nnôme Zambe a a nyoñeya be Ésa wé, mfufube nsisim a nga ka’ale nye, nde a te sôé mfufube nsisim ate be bia avale mia te yen a wôk. 34 Amu David a nji bete yôp, ve émien a nga jô na, ‘Yéhôva* a nga jô Tate wome na: “Tabe’e ma mbo nnôm, 35 akekui ma ye bo besiñe bôé ane bitelé mebo biôé.”’ 36 Nde bôte bese ya ayoñ Israël ba yiane yeme na, Zambe a teléya nye Tate a Krist, e Yésus mi nga tyelé élé.”

37 Éyoñe be nga wô’ô mejô mete, ane mejô mete me nga nambe minleme miap, ane be nga taté na ba jô Pierre a minlômane mivo’o na: “A bôt a bobejañ, jé bia yiane bo?” 38 Pierre a nga jô be na: “Kôñela’ané minlem, a môt ase a dubane jôé Yésus Krist mfa’a ya njamane ya minseme mienan, a mvean ô ne zezé ya mfufube nsisim. 39 Amu ngaka’a é ne asu denan a asu bone benan, asu ba bese be ne ôyap a asu ba bese Yéhôva,* Zambe wongan a ye loone be nye.” 40 A nga ke ôsu a kobô a bela’ane bifia bia yian a jô’ô bôte na: “Te ke wuané a mbia mvoñe bôte nyi.” 41 Nde bôte be nga kañese mejô mé a minleme miap mise be nga duban, a môs ôte bôte bebé 3 000 be nga kô’ôlane nsamba beyé’é. 42 A be nga ke ôsu a yé’é mame minlômane mi nga ye’ele be, be sula’ane vôme wua, be ja’a nsamba a ye’elane nsamba.

43 Woñ ô nga bi bôte bese, ane minlômane mi nga taté na mia bo bitua bi mam a mendem. 44 Ba bese be nga bo bebuni be mbe be too nsamba a be mbe be bela’ane biôme bise nsamba, 45 be mbe be ku’ane biôme bi mo biap a akume dap a kabane moné ya été aval ane miñyiane mi môt ase mi mbe. 46 A môs ane môs, be mbe be kele’e tôbane Temple bese nleme wua a be mbe be kele’e tôbane menda menda, be ja’a nsamba, be kaba’ane fe bidi biap a beta mevak a nlem ôse. 47 Be mbe be va’a Zambe duma a be yene fe mvaé e mise me bôte bese. Nté ôte ôse môs ane môs, Yéhôva* a mbe a kô’ôlane nsamba bebuni, ba bese be mbe na ba nyiiban.