Mame minlôman
3 A nga bo na, Pierre ba Jean be mbe be kele’e Temple mewolo melale ya mame ngô’é* na ba ke ye’elan, 2 a bôte be mbe be be’e môt a nga bialé mbômbôk. Môs ôse be mbe be za’a nye bôé e fefele mbé ya Temple be mbe be lo’one na Abeñ, na a sili bôte ba nyiine Temple mimveane ya mvam.* 3 Éyoñ a nga yene Pierre a Jean be nga zu ke nyiine Temple, ane a nga taté na a sili be mimveane ya mvam. 4 Pierre, nsamba a Jean, be nga fombô nye mis été, ane Pierre a nga jô nye na: “Fombô’ô bia.” 5 Ane a nga fombô be ne tôéñ a buni’i na ba ye ve nye jôm éziñ. 6 Ve Pierre a nga jô na: “Me nji bi argent a or, ve ma zu ve wo jôme me bili. E jôé Yésus Krist ya Nazareth, wulu’u!” 7 Ane a nga bi nye wo ya mbo nnôm a telé nye tetele. Été été, mebo mé a bitinkili bié bi nga bo ngul. 8 A nga tyele si a mebo mé émien a taté na a wulu, ane a nga ke nsamba a be e Temple, a kele’e a wulu a tyele’e si a mebo mé émien a va’a Zambe duma. 9 A bôte bese be nga yene nye a wulu’u a va’a fe Zambe duma. 10 A be nga yemelane na nnye a mbe a jaé tabe Abeñe mbé ya fefele Temple na a sili bôte mimveane ya mvam, a be mbe fe’e ne vema, menyu me yoo, be kame’e jam é nga kui nye.
11 Nté môt a mbe a ngenan a bili Pierre a Jean, bôte bese be nga téé mbil a ke koone be vôme be mbe be lo’one na mbala’a si Salomon, be too fe’e ne vema. 12 Éyoñe Pierre a nga yene jame di, a nga jô bôte na: “A bôte ya Israël, amu jé mia semé jame di a amu jé mia fombô bia fo’o ve ane nge bia te bo jame di a ngule jangan, nge ke na ye a ne amu bia dañe wulu ba’aba’a a Zambe nde bia te bo na môte nyi a wulu? 13 Zambe Abraham a Isaac a Jacob, Zambe bemvamba bangan a nga ve Mbo ésaé wé duma, Yésus nnye ate mi nga kee nye be Pilate a jô Pilate na mi nji yeme nye, to’o éyoñ a nga tyi’i na a suu nye. 14 Ôwé, a mi nga jô na mi nji yeme môt ate, nyu a ne étyi a zôsô; a mi nga jô nye na, a suu mia ñwôé bôt, 15 akusa bo mi nga wôé Nyu a nga tobane na a ve ényiñ, ve Zambe a nga wômôlô nye miñwuan, a biabebiene bi ne bengaa ya jam éte. 16 A zene ya éyôlé jé a mbunane bi bili e jôé dé, môte mi lôô nyi, nyi mia kôme yem a te bo mvo’é. Mbunane bi bili be Yésus ñwô wo te bo na môte nyi a mane bo mvo’é mise menane mia bese été. 17 Nde, a bobejañ, ma yeme na mi nga bo mame ma ndiman été, fo’o ve avale betebe ôsu benane be nga bo. 18 Nalé a nga boban asu na, Zambe a tôé mame mese a nga jô a zene ya bekulu mejô bese na Krist wé a ye tôbane minjuk.
19 “Ajô te, kôñela’ané minlem a tyendé abo dulu na Zambe a jamé minseme mienan, ndembene biyoñe ya évôvoé bi ne so mia be Yéhôva émien* 20 a a ye lôme Krist a nga teléban asu denan, Yésus. 21 Yésus a yiane yange yôp été akekui éyoñe biôme bise bia ye taté na bia kômban a bo avale bi mbe atata’a, mbie bite Zambe a nga jô bie a zene ya mimfufube bekulu mejô ya melu mvus. 22 Nde fe Moïse a nga jô na: ‘Yéhôva* Zambe wônan a ye telé môte wua ya be mia nkulu mejô ane ma. Mia yiane vô’ôlô jam ése a kate mia. 23 Amu nyu* ase a ye bo te vô’ôlô nkulu mejô ate, Zambe a ye jiane nye zañe jenan.’ 24 A bekulu mejô bese, ataté nkulu mejô Samuel a ba bese be nga so nye mvus, be nga kobô ajô ya melu mete ne sañesañ. 25 Mi ne bone bekulu mejô a ba ya élate Zambe a nga bo a bemvamba benan, a éyoñ a jô’ô Abraham na: ‘A zene ya mvoñe bôte jôé, menda me bôte mese ya si ma ye bi bibotan.’ 26 Éyoñe Zambe a teléya Mbo ésaé wé, a nga taté lôme nye be mia na mi bi bibotan, nge môt ase ya be mia a jô’é mbia mboone wé.”