Mame minlôman

4 Nté bebaane be mbe be kobô’ô a bôt, ane beprêtre, évete beba’ale ya Temple a besadducéen be nga suan atemetem. 2 Be mbe be wô’ô ôlun amu minlômane mi mbe mi ye’ele’e bôt a kate be ne ngeññ ajô ya ñwomane Yésus. 3 Nde be nga bi be a fete be akekui môs ô mbe ô tôé valé, amu e zu koone na ngô’é é ntoo. 4 Ve abui bôt é nga vô’ôlô be é nga buni a tañe befam é nga bet a bo bebé befame 5 000.

5 Môs ô nga tôé valé betebe ôsu bap, bemvendé a bescribe be nga tôbane Jérusalem, 6 nsamba a Anne njôô beprêtre, Caïphe, Jean, Alexandre a bivuvumane bi njôô beprêtre bise. 7 Be nga telé Pierre a Jean ézezañe jap a taté na ba sili be na: “A ngule fé nge na e jôé za nde mia bo de mame ma?” 8 Pierre a too njalan a mfufube nsisim a nga jô be na:

“A betebe ôsu a bemvendé ya ayoñ, 9 nge ba sili bia minsili den ajô ya mbamba jam a te kui mbômbô’ô môte wu, a mia kômbô yeme za a te bo na môte nyi a bo mvo’é, 10 a mia bese, a bôte bese ya Israël, mia yiane yeme na e jôé Yésus ya Nazareth, nnye ate mi nga tyelé élé, ve Zambe a nga wômôlô nye miñwuan, a zene jé nje môte nyi a tele mvo’é mise menan été. 11 Nyina a ne ako’o mia belôñe mi nga ben, nde é nga su’ulane bo nlô akô’ô ya jua.* 12 Nde fe teke môte mfe a ne wulu bia, ve nye, amu teke éyôlé éfe é nga vebane be bôte si va na bôte be bi ényiñ.”

13 Nde éyoñe be nga yene Pierre ba Jean be kobô’ô be teke ko woñ a na, be nji bo beyeme sikôlô* be too fe zezé bôt, be mbe fe’e ne vema. Be nga tu’a yeme na be mbe fo’o a Yésus. 14 Nté be mbe be yene’e môt a nga bo mvo’é a tele be ôsu, be mbe teke jame ya jô. 15 Ane be nga jô be na be kôlô aba Sanhédrin* a wô’ô sulan, a be nga taté na ba bo ésok, 16 be jô’ô na: “Bia yiane bo bôte ba aya? Amu, nya ajôô, étua asimba ja te boban a zene jap, jame bôte bese ya Jérusalem ba te yen, a bi vo’o de sôô. 17 Nde mfa’a ya na jame di é bo teke mialane nlam ôse, bia tame be zu si’ili a tyili be na, be bo teke beta kobô môt éziñ ajô ya éyôlé éte.”

18 Ane be nga loone be, a ve be atiñe na be bo teke beta jô jam éziñ nge ye’ele ajô ya éyôlé Yésus. 19 Ve Pierre ba Jean be nga yalane be na: “Nge é ne mvo’é e mise me Zambe na bi vô’ôlô mia a lôte Zambe, dili da fombô mia. 20 Ve mfa’a wongan, bi vo’o bo te kobô mame bi nga yen a wôk.” 21 Nde éyoñe be beteya mane si’ili be, be nga suu be amu be nji yene jam éziñ é ne bo na be foñesô be, nde fe be mbe be ko bôte be mbe valé woñ, amu bese be mbe be va’a Zambe duma amu jam é nga boban. 22 Amu môte be nga saé a zene ya asimba* éte a mbe a lôteya mimbu 40.

23 Éyoñe be suya be, be nga ke be beyé’é bevok a kate be jame bejôô beprêtre a bemvendé ya ayoñe be nga jô be. 24 Éyoñe be nga wô’ô de, be nga bete metyiñ a nleme wua a jô Zambe na:

“A Beta Tate, wo ô ne Nyu a nga té yôp a si a mañ a biôme bise bi ne été, 25 a wo ô nga jô a ngule ya mfufube nsisim a zene ya David mvamba wongan, mbo ésaé wôé na: ‘Amu jé meyoñe ma bo éngôngôm a amu jé bôte ba fase mame me ne teke mfi? 26 Bejô bôte ya si be kômeya lame mebo si a betebe ôsu nsamba ane môte wua na ba zu wosane Yéhôva* a nyu a nga top.’* 27 Nya ajôô a ne na, Hérode ba Ponce Pilate, bôte ya meyoñ a bôte ya Israël be nga tôkane nsamba e tisone nyi na ba wosane Yésus, mbo ésaé wôé a ne mfufube womien ô nga top, 28 na be bo jame wo wôé a nkômbane wôé ô nga tyi’i na wo bo ôsusua na jam éte da boban. 29 Éyoñe ji, a Yéhôva,* wô’ôk ane ba si’ili bia a va’a bebo bisaé bôé ngule ya ke ôsu a kobô mejô môé teke ko woñ, 30 nté wo same wo wôé na ô saé bôt a bo mesimba a bitua bi mam e jôé Yésus, mfufube mbo ésaé wôé.”

31 Éyoñe be nga mane bo meye’elane me nja’ane* vôme be mbe ntôkane nsamba a nga taté na a fô’ôsan a bese be nga jaé a mfufube nsisim a taté na ba kobô mejô me Zambe teke ko woñ.

32 Nde fe, beta nsamba bôt a nga buni a mbe nleme wua* a jôme jia, a teke môte ya be be a nga jô na jôme ji é ne énjam, ve bese be mbe be bela’ane biôme fufulu. 33 A beta ngul, minlômane mi nga ke ôsu a kañete ajô ya ñwômane Tate Yésus, a beta mvam a nga sôébane be bese nya nya abuii. 34 Nde fe, teke môt éziñe ya be be a nga jembane jôm éziñ amu ba bese be mbe be bili abôta si nge menda be nga kuane bie a soo moné ate 35 a zu ve nye minlôman. Minlômane ki, mi nga kabe nye avale miñyiane mi môt ase mi mbe. 36 Ane Joseph, nnye fe minlômane mi mbe mi loone na Barnabas (éyoñe ba kôñelan, a tinane na, “Mone ya Mvolane minlem”), mone Lévite, bialé-bialé ya Chypre, 37 a mbe a bili abôta si, ane a nga kuane de, a zu ve minlômane moné ate.