Mbamba foé Matthieu a nga tili

20 “Amu Éjôé ya yôp é ne ane mie ndaa a nga kôlô si ndibe tyé na a ke jeñe bôte ba ye saé afube mindi’i dé. 2 Éyoñ a maneya kui tyiñ a bebo bisaé na a ye ya’ane be denier* wua môs ôse, nde a nga lôme be afube mindi’i dé. 3 Éyoñ a nga ke fe nseñe makit, bebé mewolo ébule ya mame tyé,* nde a nga yene bôte befe be tele nseñe makite teke ésaé ya bo. 4 Nde a nga jô be na, ‘Mia fe, kelané saé afube mindik, a ma ye ya’ane mia tañe ja yian.’ 5 Nde be nga ke. Ane a nga beta ke nseñe makite bebé zañe môs* a mewolo melale ya mame ngô’é* a nyoñe bôte befe bisaé. 6 Ane a nga su’ulane kui nseñ, bebé mewolo metane ya mame ngô’é* a koone bôte befe be tele, nde a nga sili be na, ‘Amu mi tele va ngumba môs, teke ésaé ya bo?’ 7 Ane be nga yalane nye na, ‘Amu môt éziñ a nji nyoñe bia bisaé.’ Ane a nga jô be na, ‘Mia fe kele saané afube mindik.’

8 Éyoñe ngô’é é nga vin, nde masa ya afube mindik a nga jô môt a jôé bebo bisaé na, ‘Lo’one bebo bisaé ô ya’ane be, ô taté’é ya’ane bôte ba te su’ulane so, mvuse ya valé, wo ye ya’ane bôte ba te taté so.’ 9 Éyoñe bôte be nga taté ésaé mewolo metane ya mame ngô’é be nga suan, nde a nga ya’ane môt ase denier wua. 10 Éyoñe bôte be ôsu be nga taté ésaé be nga suan, be mbe be buni’i na ba ye ya’ane be abui, ve be nga ya’ane be denier wua. 11 Éyoñe be ya’aneya be abim éte, nde be nga taté na ba ve mie ndaa bijô, 12 be jô’ô na, ‘Bôte ba te su’ulane so ba, ba te saé ve awolo da, ve wo te ya’ane bia bese tañe jia, a too ke na bia te wu ésaé ngumba môs, ényane viane si!’ 13 Ve a nga yalane wua ya be be a jô’ô na, ‘A môt, me nji bo wo mbia jam éziñ, bia wo bi nga mane kui tyiñe na ma ye ya’ane wo denier wua, sa nalé? 14 Nyoñe’e moné wôé ô ke. Mamiene ma te tyi’i na, ma ya’ane bôte ba te su’ulane so ésaé tañe ma te ya’ane wo. 15 Ye atiñ é nji ve ma fili ya belane biôme biam avale ma yi? Ye ô bili mise minyamete* amu me ne akap?’* 16 Avale te nde bôte ba su’ulane ba ye tebe ôsu, a ba be tele ôsu ba ye tebe mvus.”

17 Éyoñ a mbe a kele’e* Jérusalem, Yésus a nga loone beyé’é bé 12 fefel a jô be na: 18 “Tama yenan! Bia ke Jérusalem, môt éziñ a ye bo na Mona môt a vebane mo be bejôô beprêtre a bescribe. Ba ye tyi’i na a yian awu, 19 ba ye kee nye be bôte ya meyoñe na be kpwe’ele nye a bôme* nye a tyelé nye élé; a mvuse melu melal a ye wômô.”

20 Nde nyia bone be Zébédée a nga zu koone nye a vitibi ôsu wé a sili nye jôm éziñ. 21 Yésus a nga sili nye na: “Wo yi jé?” Nde a nga yalane nye na: “Jô’ô na Éjôé jôé, bone bame bebaé ba, ba ye tabe wo fefel, wua mbo nnôme wôé, nyu mbo’o mbo ngale wôé. 22 Nde Yésus a nga jô be na: “Mi nji yeme jame mia sili le. Ye mi ne nyu élaé ma zu nyu ana’ana?” Ane be nga yalane nye na: “Bi ne nyu je.” 23 Nde Yésus a nga jô be na: “Mia ye fo’o nyu élaé jam, ve sa ke ma ma tyi’i za a ye tabe mbo nnôme wome nge ki mbo ngale wom, ve bito bite bi ne asu bôte Zambe émien a nga tobe na ba yiane tabe été.”

24 Éyoñe minlôman awôm mivo’o mi nga wô’ô de, mi nga wô’ô bobenyañe bete bebaé mbia ôlun. 25 Ve Yésus a nga loone be, a jô be na: “Mia yeme na bejô bôte ya meyoñe ba jôé bôt ane bemasa, a beta be bôte ba jôé bôt a ngul. 26 Nalé a nji yiane bobane be mia, ve môt ase a kômbô bo beta môt, a yiane bo mia mbo ésaé, 27 a nyu ase a kômbô bo ntebe ôsu zañe jenan a yiane bo ôlo wônan. 28 Fo’o ve ane Mona môt a nga so si va, sa ke na bôte be bo nye bisaé, ve na a bo bôte bisaé a ve ényiñe* jé ane ntañ asu bôt abui.”

29 Nté be mbe be kôlô’ô Jéricho, nde beta nsamba bôt a nga tôñe nye. 30 Mindindime mibaé mi mbe mi too fefele njoñ éyoñe mi nga wô’ô na Yésus a lôte valé, nde mi nga taté na mia yôtan, mi jô’ô na: “A Tate, Mone David, mvama’ane bia!” 31 Ve nsamba bôt ô nga bame be, ô jô’ô be na be dibe menyu, ve be nga tu’a bete metyiñe yôp, be jô’ô na: A Tate, Mone David, mvama’ane bia!” 32 Nde Yésus a nga tebe a loone be, a nga sili be na: “Mia yi na me bo mia jé?” 33 Nde be nga yalane nye na: “A Tate, bia yi na mise mangane me kuiban.” 34 Yésus a nga wô’ô be éngôngol, ane a nga nambe be mis, été été, be nga taté na ba yen a tôñe nye.