Mbamba foé Marc a nga tili
8 Melu mete, beta nsamba bôt a mbe, nde fe a nji be a bili jôme ya di. Ane Yésus nga loone beyé’é bé a jô be na: 2 “Ma wô’ô nsamba bôte wu éngôngol amu, ô tabeya melu melal a ma teke jôme ya di. 3 Nge ma suu be na be bulane menda map zaé, ba ye ku some zen, a abui ya bebe da so ôyap.” 4 Ve beyé’é bé be nga yalane nye na: “Nlam ô nji bo bebé a vôme bi ne nyi, nne bi ne koon abime belete bi ne ve bôte ba bese na be jaé vé?” 5 Nde a nga sili be na: “Mi bili belete tañ aya?” Ane be nga yalane na: “Zangbwal.” 6 Ane a nga jô nsamba bôte na ô tabe si bilo’o yôp. Nde a nga to’é belete zangbwal a ye’elan, ane a nga mane be’e je a taté na a ve je beyé’é bé na, be ve je nsamba bôt. 7 Be mbe fe be bili bone bekos, ane a nga ye’elan a jô fe be na be ve je bôt. 8 Nde be nga di a jaé, a bifuse bi belete bi nga bu’u, be nga mane bie top a jalé beta bikate* zangbwal. 9 Bôte be mbe valé, be mbe befame bebé 4 000. Ane a nga suu be.
10 Été été, a nga bet éfunga a beyé’é bé na, be ke ngoto ya Dalmanouta. 11 Éyoñ a kuiya wôé, bepharisien be nga zu koone nye a taté na ba sañetan a nye, be nga jô nye na a liti be ndeme ja so yôp, asu ya na be ve’ele nye. 12 Nde a nga suu abuk, a jô na: “Amu jé miaé bôte wu wo sili ndem, ma jô fo’o mia na, teke ndem éziñ é ne litibane miaé bôte wu.” 13 Mvuse ya valé a nga li’i be, ane a nga bet éfunga été a ke abôñe ya yat.
14 Ve beyé’é be nga vuane nyoñe belet, be mbe be bili ve jia éfunga été. 15 Yésus a nga kôme lebe be na: “Mi kale’e, taba’ané ntyel a mvusu bepharisien a mvusu Hérode.” 16 Nde be nga taté na ba sañetane be be, amu be nji be be bili abui belet. 17 Éyoñ a nga yeme de, a nga jô be na: “Amu jé mia sañetane zañe jenan amu mi nji bi abui belet? Ye mia kate kui na mi wô’ô jame ma kate mia, ye e minleme mienan été, mia kate kui na mi wô’ô de? 18 ‘Ye mi be’e mise ve teke yen; nde fe, ye mi bili melo ve teke wôk?’ Ye mi nji simesane 19 éyoñe me nga be’e belet étan, asu befame 5 000; mi nga jalé bikate tañ aya a bifuse bi belete mi nga ke mia top?” Ane be nga yalane nye na: “Beta bikat 12.” 20 “Éyoñe me nga be’e belete zangbwal na, befame 4 000 be di je, mi nga jalé beta bikate* tañ aya a bifuse bi belete bi nga bu’u?” Ane be nga yalane nye na: “Bikate zangbwal.” 21 Nde a nga sili be na: “Ye mi ngenane teke wôk?”
22 Ane be nga kui Bethsaïda. E wôé, be nga zuu nye môt a too ndindim, ane be nga ye’elane nye na a nambe nye. 23 Ane a nga bi ndindime wo, a vaa nye nlam ôte, éyoñ a maneya tui nye mendene mis, a nga beté nye mo a sili nye na: “Ye wo yene jôm éziñ?” 24 Môt a nga fombô ôsu wé a yalane na: “Me lôô bôt, ve be ne ane bilé bia wulu.” 25 Ane Yésus a nga beta beté môte mo mé mis, nde a nga taté na a yene mvo’é, ndime jé é nga man, ane a nga beta yene mvo’é. 26 Nde Yésus a nga jô nye na a ke nda jé, a jô’ô nye na: “Te beta bulane nlame wu.”
27 Yésus a beyé’é bé be nga kôlô minlame ya Césarée ya Philippe, nté be mbe zen, a nga sili beyé’é bé na: “Bôte ba jô na, me ne za?” 28 Be nga yalane nye na: “Jean Baptiste, ve ba bevo’o ba jô na Élie, a ba bevo’o na, nkulu mejô mfe.” 29 A nga sili be na: “Mia ki mia jô na, me ne za?” Pierre a nga yalane nye na: “Ô ne Krist.” 30 A nga ve be atiñe na, be bo te kate de môt éziñ. 31 Nde fe, a nga taté na a ye’ele be na, Mona môt a yiane tôban abui minjuk, a na bemvendé, bejôô beprêtre a bescribe, ba ye bene nye a wôé nye. Mvuse melu melal a ye wômô. 32 A mbe a kate’e be mame mete bôsa, ve Pierre a nga loone nye fefel a komekane nye. 33 Ane a nga lume nye mvus, a fombô beyé’é bé a komekane Pierre a jô’ô na: “A Satan, lôte’e ma mvus, amu wo fase ki ane Zambe, ve wo fas ane bone be bôt.”
34 Yésus a nga loone nsamba bôt a beyé’é bé a jô na: “Nge môt éziñ a kômbô tôñe ma, a nyumu’u émiene mam, a be’e élé mintaé* jé a ke ôsu a tôñe ma. 35 Amu môt ase a kômbô kaman ényiñe* jé a ye sube je; ve nyu ase a sup ényiñe jé amu ma a amu mbamba foé, a ye beta bi je. 36 Nya ajôô a ne na, mfi ôvé môt a ne bi, nge a mane bi si ése, a sube ke ényiñe* jé? 37 E nya ajôô, jé môt a ye ve na a bi ényiñe* jé? 38 Amu môt ase a ye wô’ô ma ôson a mejô mam, ézezañe miaé bôte wo bo mejian* a miaé bôte wo bo mbia be mam, Mona môte fe a ye wô’ô nye ôson, éyoñ a ye so étôtok Ésa a beéngele be ne mimfufup.”