Mbamba foé Marc a nga tili

9 A nga beta be jô na: “Ma kate fo’o mia na, bôte béziñe be ne va, ba ye ke wu ôsusua na ba yen Éjôé Zambe é so’o a ngul ése.” 2 Éyoñe melu mesaman me lôteya, Yésus a nga nyoñe fo’o ve Pierre a Jacques a Jean, a kee be beta nkôle yôp, nde a nga veñesane be mis été; 3 biyé bié ya yôp bi nga faé a bo éfumulu ne fuum, avale nsôbe biyé éziñe ya si nyu a vo’o ke bo na bi bo aval éfumulu éte. 4 Nde fe Élie ba Moïse be mbe be tele valé, be laan a Yésus. 5 Nde Pierre a nga jô Yésus na: “A Rabbi a ne mvo’é amu bi ne va éyoñe ji, ntame lôñe menda bindelé melal, jia asu dôé, nyi fok asu Moïse a nyi fok asu Élie.” 6 Nya ajôô a ne na, Pierre a nji be a yeme’e jam a ne jô, amu woñ ô mbe ô ngenan ô bili nye. 7 Ane nkut ô nga so a buti be yôp, nde tyiñ é nga so nkut été, é jô’ô na: “Mone wome nyu, ma nye’e nye, vô’ôlané nye.” 8 Été été, nde be nga fombô mefefele map a yene na, môte mfe a nji be a be, ane ô vaa ve Yésus.

9 Nté be mbe be siliki’i nkôl, a nga ve be abendé na, môt éziñ a bo te kañete mame ba te yen, akekui éyoñe Mona môt a ye wômô miñwuan. 10 Be nga bo fo’o avale Yésus a nga jô na be bo,* ve be mbe be sila’ane minsili be be, amu be mbe be kômbô’ô yeme jame Yésus a mbe a kômbô’ô jô éyoñ a nga kobô ajô ya ñwômane miñwuan. 11 Be nga taté na ba sili nye na: “Amu jé bescribe ba jô na, Élie a yiane taté so?” 12 A nga yalane be na: “Élie a yiane fo’o taté so na a zu kôme mame mese avale me mbe ôsusua, ve amu jé é ne ntilane mfa’a Mona môt na, a yiane tôbane minjuk, a na bôte ba ye biasé nye? 13 Ve ma kate mia na, Élie a soya a be nga bo nye jôm ése be nga kômbô bo nye, fo’o ve aval é ne ntilane mfa’a wé.”

14 Éyoñe Yésus a beyé’é belale be nga ke koone beyé’é bevok, be nga yene na, beta nsamba bôt a mbe a bôma’ane be a bescribe be mbe be sañeta’an a be. 15 Ve nné ane nsamba bôt ô nga yene nye, be mbe fe’e ne vema, ane be nga bumu mbile na ba ke batane nye. 16 Nde a nga sili be na: “Jé mia too mi sañeta’an a be?” 17 Môte wua ya nsamba bôt ôte a nga yalane nye na: “A Ñye’ele, ma te soo wo mone wom, amu mbia nsisim a too ma mone nyul, nnye a bo na a kate kobô. 18 Vôm ase a bi nye, mbia nsisim a wua nye si, avul é taté na da kui nye anyu, a nga latane mesôñ a mane ke tek. Ma te jô beyé’é bôé na be vaa nye, ve be nji kui na be bo de.” 19 Yésus a nga yalane be a jô’ô na: “A miaé bôt ô ne teke mbunan, ma ye ke ôsu a nyiñ a mia akekui éyoñ évé? Ma ye ke ôsu a jibi mia akekui éyoñ évé? Za’ané nye va.” 20 Nde be nga zuu nye mona fam, nde mbia nsisim a nga su’usu nye ngul, éyoñ a kuya tyia, ane a nga taté na a bilikane tyia tyia, avul é nga kui nye anyu. 21 Nde Yésus a nga sili ésa na: “Jam éte é nga taté éyoñ évé?” Nde a nga yalane na: “Aso abialé. 22 Biyoñe biziñ a wô’ô wua nye nduan été, nge ke mendim été na a wôé nye, ve nge ô ne bo jôm éziñ, ko bia éngôngol a volô’ô bia.” 23 Yésus a nga yalane nye na: “Amu jé wo jô na, ‘Nge ô ne bo jôm éziñ?’ Asu môt a bili mbunan, mame mese me ne boban.” 24 Été été ésa mongô a nga jô yôp été na: “Me bili mbunan! Volô’ô te ma vôme mbunane wo jembane ma!”

25 Éyoñe Yésus a nga yene nsamba bôt ô za’a avôl avôl vôme be mbe be tele, nde a nga komekane mbia nsisim a jô nye na: “A nsisime wo ve bôte mvuk a ndok, ma jô wo na ô kôlô nye nyul, a te beta nyiine nye nyul!” 26 Éyoñ a maneya tat, ane a nga su’usu mongô ngule nsu’usan a kôlô nye nyul, mongô a mbe a bôô ve ane môt a wuya, ane abui bôt é nga jô na: “A wuya!” 27 Ve Yésus a nga bi nye wo a bete nye, ane a nga tebe tetele. 28 Éyoñ a nyiineya nda été, beyé’é bé be nga zu koone nye vôme be mbe étam, a sili nye na: “Amu jé bia te kate vaa wô?” 29 Nde a nga jô be na: “Kane mbia nsisim éte é ne kôlô fo’o ve a meye’elan.”

30 Be nga kôlô valé a tyi’ilane Galilée, ve a nji be a yi na môt éziñ a yeme de. 31 Amu a mbe a ye’ele’e beyé’é bé a jô’ô be na: “Ba ye kee* Mona môte mo me bôte na be wôé nye, akusa bo a ye wu, a ye wômô mvuse melu melal. 32 Ve be nji ke wô’ô jam a mbe a kômbô’ô jô, a be nga ko woñe ya sili nye jam éziñ.

33 A éyoñe be nga kui Capernaüm, éyoñ a nyiineya nda été, ane a nga sili be na: “Jé mia too mi sañeta’ane zene zen?” 34 Be nga ku bivôl, amu be mbe be za’a ba sañetane zene zen ajô ya môt a dañ. 35 Nde a nga tabe si a loone minlôman mié Awôm a mibaé a jô mie na: “Môt a kômbô tebe ôsu a yiane bo mesu’ulane ya mia bese a mbo ésaé mia bese.” 36 Nde a nga nyoñe mone mongô a telé nye zañe jap a beté nye mo bitul, a jô be na: 37 “Nyu ase a yeme nyoñe mone mongô nyu amu jôé dam a nyoñe fe ma, a nyu ase a nyoñe ma, a nji nyoñe fo’o ve ma étam, ve a nyoñe fe nyu a nga lôme ma.”

38 Jean a nga jô nye na: “A Ñye’ele bi nga yene môt éziñ a vaa mbia minsisim, a bela’ane jôé dôé, amu a nji bo nsamba wua a bia, bi nga jeñe na bia dibe nye zene na a bo teke de beta bo.” 39 Ve Yésus a nga jô be na: “Te mia jeñe na, mi dibe nye zen, amu môt éziñ a vo’o ke bo mesimba a bela’an éyôlé jam, mvuse ya valé a kôñelan a taté na a kobô ma abé. 40 Amu môt a nji wosane bia a ne ngame jangan. 41 A nyu ase a ve mia élaé mendim amu mi ne bôte be Krist, ma kate fo’o mia na, a ye bi ma’ane mé. 42 Ve nge môt éziñ a bo na, mone mongô wua ya ba ba buni ma a kolé ôbak, da ye dañe bo mvo’é mfa’a wé na, be tiñeti nye ako’o ba ko’o de bidi tyiñ, aval akok éjakas ja limiti, a wua nye mañ été.

43 “Nge wo wôé wo bo na ô kolé ôbak, tyi’i wô, é ne mvo’é asu dôé na, ô bi ényiñ a wo wua, a lôte na be wua wo a mo mebaane Géhenne* été, nduane be vo’o ki dim. 44 *—— 45 A nge abo dôé da bo na ô kolé ôbak, tyi’i de, é ne mvo’é asu dôé na ô bi ényiñ a abo da, a lôte na be wua wo Géhenne* été a mebo mebaane. 46 *—— 47 A nge dise dôé da bo na ô kolé ôbak, té de, é ne mvo’é asu dôé na, ô nyiin Éjôé Zambe a dise da, a lôte na be wua wo Géhenne,* a mise mebaane, 48 vôme minsoñe mi ne te wu a nduane te dim.

49 “Amu ba yiane sôé môt ase nku nyul, ñwô ôte ô ne ane nduan. 50 Nku ô ne mvaé, ve nge nku ô nji beta wô’é ôyem, jé ja ye bo na ô wô’é ôyem? Bo’ané ane nku a tabané mvo’é zañe jenan.”