Mbamba foé Jean a nga tili
21 Mvuse mame ma, Yésus a nga beta yené be beyé’é bé e mañe ya Tibériade. A nga yené be be avale di. 2 Be mbe nsamba na: Simon Pierre, Thomas (nnye be mbe be lo’one na, Mbias), Nathanaël ya Cana ya Galilée, bone be Zébédée a beyé’é bé bevo’o bebaé. 3 Simon Pierre a nga jô be na: “Ma ke yobe kos.” Be nga jô nye na: “Bia ke a wo.” Be nga kui nseñ a bet éfunga, ve ngumba alu ôte be nji bi jôm.
4 Ve, éyoñe tyé é nga bo ane ja lendé, Yésus a nga tebe abôñ ôsôé, ve beyé’é be nji yeme na a mbe Yésus. 5 Ane Yésus a nga jô be na: “A bongô, ye mi bili jôme* ya di? Be nga yalane na: “Momo!” 6 A nga jô be na: “Wu’ané avote mbo nnôme ya éfunga a mia ye bi jôm éziñ.” Nde be nga wua de, ve be nji be ngule ya dutu de amu abui kos é mbe été. 7 Ane ñyé’é Yésus a mbe a nyeke’e abui a nga jô Pierre na: “A ne Tate!” Éyoñe Simon Pierre a nga wô’ô na a mbe Tate, a nga jaé éyé jé ya yôp amu a mbe a be’e ve biyé ya si,* a ku e mañ été. 8 Ve beyé’é bevo’o be nga bete mon éfunga be dutu’u avot é mbe njalan a kos, amu be nji be ôyap a kindik, fo’o ve bebé méta 100.*
9 Éyoñe be nga kui kindik, be nga yene ma’a me nduane me mbe valé, kos é bete été yôp a belet. 10 Yésus a nga jô be na: “Za’ané abime kos éziñe ya kose mi ndeme bi valé.” 11 Nde Simon Pierre a nga bet éfunga a limiti avote kindik, é too njalan a beta bekos, a mbe kose 153 ya été. A akusa bo abui kos é mbe été, avot é nji nyaé. 12 Yésus a nga jô be na: “Za’ané bo étyam akak.” Teke môte wua ya beyé’é a mbe ve’ele sili nye na: “Ô ne za?” Amu be mbe be yeme’e na a ne Tate. 13 Yésus a nga so a to’é belet, a ve be je, a nga bo fe avale da a kos. 14 A mbe éyoñe lale le Yésus a nga yené be beyé’é bé, mvus éyoñ a nga wômô miñwuan.
15 Éyoñ étyamakak é nga man, Yésus a nga jô Simon Pierre na: “A Simon, mone Jean, ye wo nye’e ma a dañe bana?” A nga yalane nye na: “Ôwé a Tate, wo yeme na ma wô’ô wo mintaé.” A nga jô nye na: “Va’a mintômba miam bidi.” 16 A nga beta jô nye éyoñe baa na: “A Simon, mone Jean, ye wo nye’e ma?” A nga yalane nye na: “Ôwé a Tate, wo yeme na ma wô’ô wo mintaé.” A nga jô nye na: “Ba’ale’e bone mintômba bam.” 17 A nga jô nye éyoñe lale na: “A Simon, mone Jean, ye wo wô’ô ma mintaé?” Pierre a nga tabe éyôé amu a nga sili nye éyoñe lale na: “Ye wo wô’ô ma mintaé?” Nde a nga jô nye na: “A Tate, wo yeme mame mese; wo yeme na ma wô’ô wo mintaé.” Yésus a nga jô nye na: “Va’ak bone mintômba bame bidi. 18 Ma bele fo’o ane ma jô wo na, éyoñ ô mbe mongô womien ô mbe ô jaé biyé ô kele’e vôm ô mbe ô yiik na wo ke, ve éyoñe wo ye bo nnôm, wo ye same mo, môte mfe a jalé wo biyé, a be’e fe wo a kee wo vôm ô nji yi.” 19 A nga jô nalé asu na a kat aval awu Pierre a ye wu mfa’a ya ve Zambe duma. Éyoñ a nga mane jô nalé, a nga jô nye na: “Kele’e ôsu a tôñe ma.”
20 Éyoñe Pierre a nga kôñelan a nga yene ñyé’é Yésus a mbe a nyeke’e abui a tôñe’e be mvus, éyoñe be nga di bidi ya mame ngô’é, nnye a mbe nyu a mbe a too fefele tôé Yésus a jô’ô na: “A Tate, za a ne nyu a ye koñe wo?” 21 Nde éyoñ a nga yene nye, Pierre a nga sili Yésus na: “A Tate jé ja ye kui môte nyu?” 22 Yésus a nga jô nye na: “Nge nkômbane wom ô ne na a tabe akekui ma ye so, jé ja fombô wo été? Wo, kele’e ôsu a tôñe ma.” 23 Ane foé é nga mialane be bobejañe na ñyé’é ate a ye ke wu. Ve Yésus a nji jô nye na a ye ke wu, ve a nga jô na: “Nge nkômbane wom ô ne na a tabe akekui ma so, jé ja fombô wo été?”
24 Nyuna a ne ñyé’é a nga kañete mame ma, a nnye a nga tili mame ma, a bia yeme na nkañete wé ô ne été.
25 Yésus a nga bo fe abui mam, nge be nga ye mane tili bone be mame bese ya été, ma buni na si nyu ébien é nji be ve be’e mimvulukane bekalate mite.