Kalate Paul a nga tili Behébreu
10 Mbôle Metiñe me Moïse me bili nsisiñe ya mbamba be mame ba zu, ve sa ke mame mebiene ya été, me* vo’o ke bo na bôte ba subu Zambe bebé be bo teke ayeñ, a zene ya avale metuna’a ba ke ôsu a ve mbu ane mbu. 2 Nalé momo, nga metuna’a be mbe be va’ak me nga ye tebe, amu bôte ba bo ésaé é ne étyi ba bo mfuban éyoñe jia, ba ye ke beta bi mone môte ya nlem a ve be mekua amu minsem? 3 Ve metuna’a mete ma bo na, mbu ane mbu, bôte be bo te vuane na, be ne bebo minsem, 4 amu metyi bikela a ma me beyôme benyak me se ngule ya vaa minsem.
5 Ajô te nde, éyoñ a za’a be bôte ya si nyu, a jô na: “‘Ô nji yi metuna’a a mimvean, ve ô nga kômesane nyul asu dam. 6 Ô nji kañese mimveane mise ba di’i nduan a mi ba ve asu minsem.’ 7 Nde a nga jô na: ‘Tame yen! Me nga so (aval é ne ntilane mvulekane kalate* ajô dam) na ma zu bo nkômbane wôé, A Zambe.’” 8 Éyoñ a tatéya jô na: “Ô nji yi nge kañese metuna’a a mimvean, a mimveane mise ba di’i nduan a mi ba ve asu minsem,” metuna’a ba ve avale da wô’an a Metiñe me Moïse. 9 Nde a jô na: “Tame yen! Me nga so na ma zu bo nkômbane wôé.” A nga vaa jôme be nga taté telé na a telé ji baa. 10 A zene ya “nkômban” ôte, bi nga tuneban a zene ya mveane nyule Yésus Krist éyoñe jia ya biyoñe bise.
11 Nde fe, prêtre ase a ke bo ésaé jé é ne étyi* môs ane môs, a bo avale metuna’a da biyoñe biziñ, mme mete me se ngule ya vaa minseme ne meñ. 12 Ve môt ate a nga ve metuna’a éyoñe jia asu minseme ya biyoñe bise a tabe mbo nnôme Zambe, 13 ataté éyoñ éte, a yange akekui besiñe bé ba ye bo ételé mebo jé. 14 Amu a zene ya mveane metuna’a wua, a nga bo na ba bese be nga tunebane be bo teke ayeñe biyoñe bise. 15 Nde fe, mfufube nsisim a bo’olô bia de, amu mvuse ya valé a nga jô na: 16 “‘Nyina a ne élate ma ye bo a be éyoñe melu me lôteya,’ nne Yéhôva* a jô nalé. ‘Ma ye futi metiñe mame minleme miap, a ma ye tili me asimesane dap été.’” 17 Nde a jô na: “A ma ye ke beta simesane minseme miap a mbia be mame be nga bo.” 18 Éyoñe ji, vôme njamane minseme ya mame mete ô ne, mvean asu minsem ô nji beta bo.
19 Ajô te, a bobejañ, mbôle bi bili ndi nleme na bia ye nyiin a zene ya metyi me Yésus, vôm a ne étyi, 20 zen a nga yoé asu dangan ane mfefé a vevea zen, a zene ya éndelé, nje é ne minsône mié, 21 a mbôle bi bili beta prêtre a tebele nda Zambe, 22 nsuba’ané nye bebé a minleme mi ne zôsô a mbunan ô ne ngumba, bi bili minleme mi ne mfuban a mone môte ya nlem a ne mfuban a wo’o menyule mangan a mendime me ne mfuban. 23 Ntuka’a keané ôsu a kañete ndi nleme bi bili teke feñelan, amu bi too ndi a nyu a nga bo ngaka’a éte. 24 A môt ase a simesa’ane* nyu mbok, ndembene mi ne tindi* bôte bevo’o na be nye’esan a bo mbamba be mam, 25 te bia bu’i bisulane bia bo nsamba, avale bôte béziñe be bili fulu ya bo, ve môt ase a va’a nyu mbo’o ngule nyul, a e dañedañ amu mia yene na môs ô ntoo bebé.
26 Amu, nge bia bi fulu ya bo nsem éyoñe bi biya nya ñyemane ya benya mejôô, teke fe metuna’a méziñ asu minsem, 27 ve bia ye yange fonos a woñ a ayaa da yôñ ane nduan, nde da ye di’i ba bese be ne ngame yat. 28 Môt ase a biasé Metiñe me Moïse a wu teke éngôngol, mbo’olane bôte bebaé nge belal. 29 Mia simesan aya, fonose fé é ne ngul abui, ja yiane môt a tibi Mona Zambe a mebo, a nyoñe metyi ya élat a nga tunebane me éngbwemese, a nyu a nga biasé a ta nsisime ya beta mvam? 30 Amu bia yeme Nyu a nga jô na: “Akuna’a é ne éndam; ma ye ya’an.” A na: “Yéhôva* a ye tyi’i bôte bé mejô.” 31 E ku mo me vevea Zambe a ne jam é ne éko woñ.
32 Ve kelané ôsu a simesane melu ya mvus, éyoñe Zambe a faéya mia éfufup a yoé mia mis, mi nga jibi beta ndum a abui minjuk. 33 Biyoñe biziñe be nga telé mia bôt été na ba ve mia ôsone nyul a tibili mia, a biyoñe biziñe be nga telé mia nsamba* a ba be nga tôban avale minjuk éte. 34 Amu mi nga wô’ô ba be ne mimbô’ô éngôngol, a mi nga kañese a meva’a mese na be sa biôme bi mo bienan, miabebiene mi yeme’e na mi bili jôme ja dañ abeñ a ji ja libi.
35 Ajô te, te mia jô’ané fulu ya kobô teke ko woñe mi bili, nje é bili beta ma’an. 36 Amu mia yiane bo mbane ya jibi, ndemben éyoñe mi maneya bo nkômbane Zambe, mia ye bi mame Zambe a nga ka’ale. 37 Amu a li’iya fo’o ve “mone nté,” a “nyu a yiane so a ye zu, a a ye ke bem.” 38 “Ve zôsôa môte wom a ye nyiñ amu mbunan,” a “nge a bulane mvus, ma* ye ke beta yene nye mvaé.” 39 Bi nji bo avale bôte da bulane mvuse mfa’a ya njañan, ve bi ne avale bôt é bili mbunane mfa’a ya ba’ale binyiñe* biangan.