Kalate ôsu Paul a nga tili Becorinthien
4 Bia yi na bôte be nyoñe bia ane bebo bisaé be Krist, a betebele ya minsolane mi mame mi Zambe mi ne étyi. 2 Mfa’a ôte, jame betebele ba yiane bo é ne na be bo avale bôte be ne tabe de ndi. 3 Mfa’a wom, é ne mone jame na mi fas ajô dam, nge ke na nda mejô bôt* é fas ajô dam. E nya ajôô, me nji fas ajô dame mamien. 4 Mfa’a wom, me nji simesane na me bili bijô a jam éziñ. Ve nalé a nji tinane na me ne zôsô; môt a fas ajô dam a ne Yéhôva.* 5 Nde, te tyi’i môt ajô ôsusua na éyoñe ja kpwaan, akekui Tate a ye so. A ye soo minsolane mi mame ya dibi éfufup été, a a ye kulan asimesan é ne bôte minlem été, nde ñhe môt ase a ye nyoñe be Zambe duma da yiane nye.
6 Nde a bobejañ, ma te bo na mame ma me fombô ma a Apollos asu mvo’é jenan, na a zene jangan, mi yé’é atiñe di: “Te dañané minné ya mame me ne ntilan,” ndembene mia ye bo te vus a mebun a bo te jô na môt éziñ a dañe nyu mbok. 7 Amu, za a bo na ô selane môte mbok? Ôwé, jé ô bili, nje éte be nji ve wo? A nge be nga ve wo je, amu jé wo bo éngelezek ane nge be nji ve wo je?
8 Ye mi mbili mame mese ma yiane mia? Ye mi ntoo minkukum? Ye mi tatéya na mia jôé teke bia? Ma yi fo’o na mi taté na mia jôé, ndembene bia fe bi ne jôé a mia. 9 Amu, mfa’a wom, da yené ve ane Zambe a nga su’ulane liti bia, bia minlôman, ane bôte ba yian awu, amu bi ntoo jôme bôte bese ya si nyu ba yen, a jôme beéngele a bôte ba yen. 10 Bi ne mekut amu Krist, ve mia mi ne fek e Krist été; bi ne minte’an, ve mi ne ngul; mi bili duma, ve ba biasé bia. 11 Azukui awolo di, bia ke ôsu a wô’ô zaé a évé a jaé mengenge* a bia ke ôsu a wu ébôm,* bi too fe teke vôme ya tabe 12 a bia tya’a menyule mangane na bi saé a mo mangan. Éyoñe ba ta bia, bia botan; éyoñe ba tibili bia, bia jibi a mban ôse; 13 éyoñe ba kobô bia abé, bia yalan a nje’ebane nlem ôse.* Nde, azukui éyoñe ji, bi ntoo ane mbuane* ya si nyu, ane jôme bôte ba wua fé.
14 Ma tili mame ma, sa ke na mi wôk ôson, ve na, me lebe mia ane bone ma nye’e. 15 Amu, to’o mi bili beba’ale* 10 000 e Krist été, mi nji bi abui beésa; ma me ne mia ésa e Krist Yésus été a zene ya mbamba foé. 16 Nde ñhe ma jô mia na mi bo bevu bam. 17 Ajô te nde, ma lôme mia Timothée amu a ne mone wome ma nye’e a wulu fe ba’aba’a a Tate. A ye ba’alane mia miñye’elane* ma tôñ ésaé ma bo Krist Yésus, avale ma ye’ele vôm ase e bikôane bekristen été.
18 Bôte béziñe be nga mane vus a mebun amu be nga buni na, ma ye ke fe beta so be mia. 19 Ve, nge Yéhôva* a kañese, me mbeme so be mia, a ma ye fas, sa ke mejô me bôte be maneya vus a mebun, ve ma ye fase nge ngule Zambe nje ja wulu a be nge momo. 20 Amu Éjôé Zambe é nji bo ajô ya minkobô, ve ajô ya ngule Zambe. 21 Jé mia yi? Ye na, me zu be mia me bili mbeñ, ye na, me zu be mia a nye’an a nsisim évôvoé?