Kalate Paul a nga tili Beéphésien
6 A bon, bo’ané bebiaé benane mewôk avale da yiane be Tate, amu nalé a ne zôsô. 2 “Semé’é éso ba nyua,” a ne atiñ ôsu a ngaka’a nyi: 3 “Na mame me wulu wo mvo’é* a na ô nyiñ ayabe si nyu.” 4 A beésa, te mia soñe bone benan, ve kelané ôsu a yalé be e melep été a miñye’elane* mi Yéhôva.*
5 A alo, bo’ané bemasa benane mewôk, a woñ a nyeñeban a nlem ôse aval ane be Krist, 6 mi bo’o ésaé sa ke ve éyoñe mise me bôte me lôô mia, fo’o ve ane mia kômbô ve môta biname nleme mvaé, ve ane alo Krist, mi bo’o nkômbane Zambe a nlem ôse.* 7 Saané bemasa benan a mbamba été nsisim, ane nge mia saane Yéhôva,* sa ke asu bôt, 8 amu mia yeme na mbamba jam ase môt ase a ne bo nyu mbok, a ye nyoñe ma’ane be Yéhôva,* to’o a ne ôlo nge fili môt. 9 Mia fe bemasa, kelané ôsu a belane be a avale miñye’elane da, sa ke e si’ili be, amu mia yeme na Masa wop a Masa wônan a ne yôp été, a ôbangam ô nji bo be nye.
10 Ma su’ulane jô mia na, kelané ôsu a bo ngule be Tate a éwôlô ya ngule jé. 11 Jaéané ngômesan ése ja so be Zambe, ndembene mi ne tebe ne bip a bo te ku melame* me Diable; 12 amu bia juane sa ke a metyi nge minsôn, ve a bijôé a bôte bijôé, betebe ôsu ya émo ya dibi di a mbia minsime mi ne bevôme be ne yôp été. 13 Amu ajô éte, nyoñané ngômesan ése ja so be Zambe, ndembene mi ne bo ngule ya kamane miabebiene mbia môs, éyoñe mi maneya bo mame mese na mi tebe ne bip.
14 Nde ñhe, teba’ané ne bip a kandé ya benya mejôô é tii mia mengeteñ, a jaé ébene ya zôsô ba jaé nkuk, 15 a mebo menane me be’e bikôndé, nkômesane ya kañete mbamba foé ya mvo’é. 16 Éyoñe mi maneya jaé biôme bite bise, nyoñané beta ébene ya mbunan, nnye ate a ye volô mia na mi dime mekoñe me nduane* me mbia môt. 17 Nde fe, kañesa’ané ékôngô ya nyiian a nkpwaté mekône ya nsisim, nalé a tinane na, mejô me Zambe, 18 nté mia bo avale meye’elan ése a meye’elane me nja’an, mia ye’elane biyoñe bise a ngule ya nsisim. A amu nalé, momba’ané mi bo’o meye’elane kom ése asu mimfufube mise. 19 Ye’elané fe asu dame na éyoñe ma kui anyu dame me bi bifia ya jô, ndembene ma ye bo ngule ya kobô teke ko woñe na, bôte be yeme nsolane jam ô ne étyi ya mbamba foé, 20 amu ajô éte, ma bo mam ane môt a ne mfol ayoñ a tii bengôkop, a na me ne kobô ajô éte teke ko woñ, ane ma yiane kobô.
21 Éyoñe ji, mfa’a ya na mi yem avale me ne a mame ma bo, Tychique, mojañe ya nye’an a nya mboo ésaé Tate, a ye bo na mi yeme mame mese. 22 Ma lôme mia nye amu jam éte ébiene na mi yem ane bi too, a na a volô mia minlem.
23 Mvo’é a nye’ane bi tabe’e be bobejañ, a mbunane wo so be Zambe Ésa wongan a be Tate Yésus Krist. 24 Beta mvam a tabe’e be ba bese ba nye’e Tate wongane Yésus Krist nya nya nye’ane.