Kalate baa Paul a nga tili Becorinthien

7 Nde, amu bi bili bengaka’a ba, a bôte ma nye’e, biabebiene njeña’ané a ngul ése na, bi vaa jôm ése é ne ve minsône miangan a nsisime wongane mvit; mbo’ané na mfubane wongan ô bo fo’o ngumba, e woñe ya Zambe été.

2 Bo’ané bia étaba’a minleme mienan été. Bi nji bo môt éziñe ya be mia mbia jam, bi nji du’u môt éziñe ya be mia, bi nji nyoñe môt éziñe jôm. 3 Me nji jô nalé na me ve mia mekua. Amu avale me tatéya jô na, to’o ényiñ, to’o awu bia ye ke tyendé na mi ne minleme miangan été. 4 Ma kobô mia teke ko woñ. Me ne mengo’o dole nya abuii ajô denan. Me ne njalan a mvolane nlem; me bili abui meva’a minju’u miangane mise été.

5 Nya ajôô, éyoñe bi nga suane Macédoine, bi nji ke bi awo’one menyule* mangan été, ve bi nga ke ôsu a tôbane minju’u mimfa’a mise, mewosane me mbe mfa’a ya atan, abui mame ki é tyelé’é bia minleme yôp. 6 Ve Zambe a volô minleme mi bôte be bili minleme mi ne ntya’an, a nga volô bia minlem a zene ya njomane Tite; 7 sa ke a njomane wé étam, ve a mvolane minlem a nga nyoñe be mia, amu a nga kate bia na mi bili beta nkômbane ya yene ma, a na nleme wo bo mia mintaé a nyoñane ngabe* mia liti mfa’a wom; a jam éte é nga ve ma abui meva’a nlem.

8 Amu to’o kalate wom a nga bo na minleme mi bo mia abé, me nji jôbane de. To’o me nga taté jôbane de ôsusua, (mbôle kalate ate a nga ve mia minlem abé fo’o ve mon étun éyoñ), 9 éyoñe ji ma vak, sa ke amu minleme mi nga bo mia abé, ve amu mi nga bo mia abé aval é ne na mi kôñelane minlem, amu mi nga wôk aval ôlune da wô’an a nkômbane Zambe aval é ne na, mbia jam éziñ a nji mia kui a so’o be bia. 10 Amu ôlune Zambe a nye’e wo soo nkôñelane nlem, ñwô ôte wo kee bôte nyiian a ñwô ôte bi ne teke jôban; ve ôlune ya émo wo soo awu. 11 Amu tame yenane mam ôlune wo wô’an a nkômbane Zambe ô nga tindi mia na mi ve ngule ya bo, ôwé, na mi fubu miabebien, ôwé, na mi wôk ôlun, ôwé, na mi ko woñ, ôwé, na mi bi ngule nkômban, ôwé, na mi bo ayôñ, ôwé, na mi kôme mbia be mame mi nga bo! Mfa’a ya mame mese, miabebiene mi nga liti na mi ne mfubane* mfa’a ya jam éte. 12 Nge me nga tili mia, me nji de bo asu môt a nga bo mbia jam, nge asu nyu be nga bo mbia jam, ve a mbe asu na, nkômbane wônane ya vô’ôlô mame bia kate mia ô yené mise me Zambe. 13 Jam é nga volô bia minleme nde ñhe le.

Ve bi nji bi fo’o ve mvolane minlem, bi nga bi fe abui avak éyoñe bi nga yene meva’a me Tite, amu mia bese mi nga ve nye ngule nyul. 14 Amu nge me nga kobô Tite jam éziñe da yiane mese’esa be mia, me nji wôk ôson; ve aval ane mame mese bi nga jô mia me mbe été, nalé fe mese’esa mangane be Tite me nga yené na me ne été. 15 Nde fe, ñwô’ane Tite a wô’ô mia mintaé nleme wé été, wo beta dañ anen éyoñ a simesane mewô’ô menane mia bese a avale mi nga nyoñe nye a woñ a beta ésemé. 16 Ma va’a na mfa’a ya mezene mese, me ne tabe ndi a mia.*