Kalate Paul a nga tili Behébreu

13 Kelané ôsu a wô’ane mintaé ane bibu’a ya nda bôte jia. 2 Te mia vuane bo anyep,* amu a zen éte bôte béziñe be nga belane beéngele be teke yem. 3 Kelané ôsu a simesane ba be ne mimbôk,* fo’o ve ane mi ne mimbôk a be, a ba ba tôbane bitibila’a, amu mia be be fe mi ne nyule jia.* 4 Aluk é bo’o ésemé be bôte bese, a énoñ aluk é bo’o te vebane mvit, amu Zambe a ye tyi’i bôte ba bo mvite mame ya bisôk* a bebo mejiane mejô. 5 Fatan ényiñe jenan é bo’o teke nye’ane moné, nté mia vak a abime mi bili. Amu a nga jô na: “Ma ye bo te kôlô be wo môs éziñ, a ma ye bo te li’i wo môs éziñ.” 6 Ajô te, te bia ko woñ, ve bi jô na: “Yéhôva* a ne mvolô wom; ma ye bo te ko woñ. Môt a ne ma bo jé?”

7 Mi simesa’ane ba ba tebele mia, mbe be nga kañete mia mejô me Zambe, a nté mia lôbô asuu ya fatan ényiñe jap, vuané mbunane wop.

8 Yésus Krist a ne avale da angô’é a den, a nnôm éto.

9 Te mia yale fé a zene ya mimfefé miñye’elane mi too fe mevale meval, amu da dañe mfi na, nlem ô bo ngul a zene ya beta mvam a lôte bidi, mbie bite bi ne teke mfi asu ba ba nye’e bie a lôte nné.

10 Autel, bi bili ba ba bo ésaé é ne étyi nda éndelé, be nji bi ôva’a ngule ya di jôme ba bôé été yôp. 11 Amu mimbime betite ba te vaa metyi, beta prêtre a kee mie vôm a ne étyi na, a ke bo mimvean asu minsem, ba di’i mie ôyap a vôme bôte be too. 12 Ajô te nde, Yésus fe a nga tôbane minjuk, ôyap a aka’a ya tison, mfa’a ya tune bôt a zene ya metyi mé. 13 Bia fe, nkelané ñhe be nye, ôyap a vôme bôte be nji tabe, bi be’e ôson a nga be’e, 14 amu bi nji bi tisone ja tabe vôma nyi, ve bia jeñ a nlem ôse nyi ja zu. 15 A zene jé bia ve Zambe kom ése mveane ya duma, nalé ate a tinane na, mejô ma kui bia anyu, ma kañete ajô ya éyôlé jé bôt été. 16 Nde fe, te mia vuane bo jam é ne mvaé a kabe biôme mi bili a bôte bevok, amu Zambe a yen avale mimvean éte mvaé.

17 Bo’ané bôte be tele mia ôsu mewôk, a mi sili’i miabebiene si éjôé jap, amu éyoñ ése, be bili nkômbane ya véé mise mfa’a wônan* ane bôte ba ye yalan ajô denan, ndembene be ne bo ésaé éte a mevak, sa ke a ôlune minlem,* amu jam éte é ne kolé miabebien ôbak.

18 Kelané ôsu a ye’elan asu dangan, amu bia buni na bi bili mone môte ya nlem a ne mfuban,* nté bia jeñe na bi bi mbamba ntabane mfa’a ya mame mese. 19 Ve ma jô mia na, mi dañe beta ye’elan asu dam, ndembene me ne bulane be mia ana’ana.

20 Ngo’o nge Zambe ya mvo’é, nyu a nga vaa beta mba’ale mintômba awu, Tate wongane Yésus, a zene ya metyi ya élat é ne nnôm éto, 21 a ve mia mbamba be mame bese na mi bo nkômbane wé, mi saék a bia a zene ya be Yésus Krist, jam é ne mvaé mise mé. Duma é bo’o be nye nnôm éto a nnôm éto. Amen.

22 Éyoñe ji a bobejañ, ma jô mia na mi nyoñ éyoñe ya vô’ôlô mejô ma ve ngule nyule ma, amu kalate me nga tili mia a ne étun. 23 Ma yi na mi yeme na, monyañe wongane Timothée a kuiya mimbôk. Nge a ji’a so, bia ye so nsamba na bi yene mia.

24 Mi bata’ane ma ba bese be tele mia ôsu a mimfufube mise. Bobejañe ya Italie ba batane mia.

25 Beta mvam a tabe’e be mia bese.