Nlitan Jean a nga yen

2 “Asu éngele ya ékôane bekristene ya Éphèse tili’i na: Mame ma me ne ma a jô, nyu a bili ateté zangbwal wo wé ya mbo nnôm, a wulu’u fe ézezañe bitelé belambe zangbwal bi ne nkôman a gôlôt: 2 ‘Ma yeme mimboone miôé a ésaé jôé, a mbane ya jibi wôé, a na ô se ngule ya jibi mbia be bôt, a na wo ve’ele ba ba jô na be ne minlôman a too ke na be nji bo minlôman, a wo yemelane na be ne belaa minsos. 3 Wo liti fe na ô ne mbane ya jibi a na ô nga jibi amu jôé dam, a ô nji bili atek. 4 Ve, ma wô’ô wo jame dina ôlune na, ô jañeleya nye’an ô mbe ô bili atata’a.

5 “‘Ajô te, simesa’ane vôm ô nga ku a kôñelane nlem, a bo mam ô mbe ô bo’ok atata’a. Nge ô teke kôñelane nlem, ma ye zu be wo a ma ye vaa ételé lambe jôé vôm é tele. 6 Ve, jame ma nye’e be wo é ne na: wo vini mimboone mi mame mi bôte ba tôñe miñye’elane ya ngame Nicolas, mmie ma fe ma vini. 7 Môt a bili melo a wô’ô jame nsisime wo jô bikôane bekristen: E Môt a dañ, ma ye bo nye na a di bibuma ya élé ya ényiñ, nje éte é ne paradis Zambe.’

8 “Asu éngele ya ékôane bekristene ya Smyrne, tili’i na: Mame ma mme a jô, ‘nyu a Taté a nyu a Su’ulan,’ nyu a nga bo mbim a beta nyiñ: 9 ‘Ma yeme minju’u miôé a azoé dôé, ve ô ne nkukum, a ma yeme nkobô ébiasé ba ba loone bebiene na bejuif ba kobô wo ébiasé, a too ke na be nji bo bejuif, ve be ne synagogue Satan. 10 Te ko mame me mbeme kui be wo woñ. Ô lôô! Diable a ye ke ôsu a futi abime bôt éziñe ya be mia mimbôk, na mi kôme tebe meve’ele été, a a ye tibili mia tañe melu awôm. Liti’i na ô ne môte be ne tabe nye ndi to’o akekui awu, a ma ye ve wo couronne ya ényiñ. 11 Môt a bili melo a wô’ô jame nsisime wo jô bikôane bekristen: E môt a dañ, awu baa da ye ke ndamane nye môs éziñ.’

12 “Asu éngele ya ékôane bekristene ya Pergame, tili’i na: Mame ma me ne ma a jô, nyu a bili akap a ayabe nkpwaté mekôn ô ne meyo mebaé: 13 ‘Ma yeme vôm ô too, nalé a tinane na, vôm éto njôane Satan é ne; ve wo ke ôsu a bi éyôlé jam a mo mebaé, a ô nji sôô mbunane wôé, to’o melu me Antipas, ngaa wom, môte me ne tabe nye ndi, nnye be nga wôé fefele jenan, vôme Satan a too.

14 “‘Ve ma vini bone be mame béziñe wo bo, mbe bete be ne na, ô bili bôte ba tôñe ñye’elane Balaam, nnye a nga ye’ele Balak na a futi jôme ja kolé bone ya Israël ôbak, na be di biôme ba ve bengulemelane metuna’a a bo mvite mame ya bisôk.* 15 Avale da fe, ô bili bôte ba tôñe ñye’elane ya ngame Nicolas. 16 Nde ñhe, kôñela’ane nlem, nge nalé momo, ma zu be wo avôl avôl, ma ye wosane be a ayabe nkpwaté mekône ya anyu dam.

17 “‘Môt ase a be’e melo, a wô’ô jame nsisime wo jô bikôane bekristen: Nyu a dañ, ma ye ve nye abime manne éziñ é ne nsolan, a ma ye ve nye éfumulu akok a mfefé éyôlé ô ne ntilan akok éte été, a môt éziñ a nji yeme wô, vengevenge ve nyu be nga ve wô.’

18 “Asu éngele ya ékôane bekristene ya Thyatire, tili’i na: Mame ma, me ne ma Mona Zambe a jô, nnye a bili mise me ne ane nkaba’a nduan, a nnye mebo me ne ane mbamba mvot: 19 ‘Ma yeme mimboone miôé a nye’ane wôé a mbunane wôé a ésaé nkañete jôé a mbane ya jibi wôé, a na, mimboone miôé ô nga su’ulane bo mia dañe mi ô nga taté bo.

20 “‘Ve, ma wô’ô wo jame di ôlune na, wo kañese minga ba loone na Jézabel, nnye a loon émiene na nkulu mejô minga, a a ye’ele a duk alo dame na é bo mvite mame ya bisôk,* a di biôme be nga ve bengulemelane metuna’a. 21 A me nga ve nye éyoñe ya kôñelane nlem, ve a nji kômbô kôñelane nleme mfa’a ya mvite mame ya bisô’ô* jé. 22 Tama yenan! Me ntoo bebé ya wua nye énoñ ôkon, a ba ba bo mejian a nye beta njuk été, nge ba bo teke kôñelane minleme mfa’a ya mimboone miap. 23 A ma ye wôé bone bé a ôkone ya awu, ndembene bikôane bekristene bise, bia ye yeme na me ne nyu a bi’ili asimesan* a minlem, a ma ye ve môt ase ya be mia avale mimboone mié mi ne.

24 “‘Ve ma jô mia bevo’o mi too Thyatire, a ba bese be nji tôñe ñye’elane wu, ba fo’o be nga bo te yeme “bido’o bi mame bi Satan” na: Me nji ve be mbe’e ôfe éziñ. 25 Avale da da, tuka’a biané jôme mi bili akekui ma ye so. 26 A nyu a dañ a tôñe mimboone miam akekui memane, ma ye ve nye ngule ya jôé meyoñ, 27 a a ye jôé meyoñ a ntum étyé, ndembene ma ye bôlé bifuse bifus ane ésua ékon, avale me nga nyoñe ngule be Ésa wom. 28 A ma ye ve nye ôteté ya mame tyé. 29 Môt a bili melo ya wô’ô jame nsisime wo jô bikôane bekristen a wô’ôk.’