Kalate Paul a nga tili Beéphésien

5 Ajô te, bo’ané bevu be Zambe, ane bone bé a nye’e, 2 a kelané ôsu a wulu nye’an été, aval ane Krist fe a nga nye’e bia* a a nga ve émien asu dangan* ane metuna’a a mvean ô ne mbamba menyum asu Zambe.

3 Mvite mame ya bisôk* a kane nyé mboone mam ése a minyamete bi bo’o te toteban zañe jenan avale da yiane bôte be ne mimfufup; 4 nge mboone mame me ne ôson, nge akute nkobô, fianga é ne nyé, mame mete mme me ne te yian, ve mi viane ve Zambe akiba. 5 Amu mia yeme jame di a mia kôme yeme be miabebiene na, môt a bo mvite mame ya bisôk,* nge nyé mam, nge môte minyamete, nalé a tinane na a ntoo nkañe bengulemelan, a nji bo nyoñe ngabe ya Éjôé Krist a Éjôé Zambe.

6 Môt éziñ a bo’o te du’u mia a mejô me nji bo été, amu a ne avale mam éte nde da soo ayaa Zambe be bone ya melo. 7 Nde, te mia bo ane ba bo;* 8 amu melu mvus mi mbe dibi été, ve éyoñe ji mi ntoo éfufube mfa’a ya be Tate. Kelané ñhe ôsu a wulu ane bone ya éfufup, 9 amu ébuma ya éfufup é ne avale mbamba be mam ése a zôsô a benya mejôô. 10 Kelané ôsu a yemelane jame Tate a yene mvaé; 11 a te mia beta nyoñe ngap a zezé mam, mme mete me ne mimboone mi mame ya dibi, ve kulané me avale me ne. 12 Amu mame ba bo asoé me ne ôsone ya tote me bôt été. 13 Jôm ése ba kulan éfufube ja yené, a jôm ése ja yené é ntoo éfufup. 14 Ajô te é ne ntilane na: “Ve’e a nke ôyo, a wômô miñwuan, a Krist a ye faé be wo.”

15 Taba’ané nya ntyele na, avale mia wulu é bo te bo ane mekut, ve ane bôte be ne fek, 16 yemané belan éyoñe* jenan amu melu me ne abé. 17 Amu ajô éte, te mia beta bo bôte be nji bi mbamba mfasan, ve kelané ôsu a yemelan avale nkômbane Yéhôva* ô ne. 18 Nde, te keané ôsu a vibane meyok, amu mbia be mame be ne été wôé,* ve kelané ôsu a bo njalan a nsisim. 19 Môt ase a kobô’ô nyu mbok* a besam, a va’a Zambe duma a bia ya nsisim; miabebiene mi yi’a bia a mezik minleme mienan été asu Yéhôva,* 20 kom ése mi va’a Zambe wongan akiba a Ésa wongan, mfa’a ya biôme bise, éyôlé Tate wongane Yésus Krist.

21 Môt ase a sili’i émiene si éjôé be nyu mbok, e woñe Krist été. 22 Beyale be sili’i bebien éjôé beyôme bap si ane be Tate, 23 amu nnôm a ne nlô ya be minga wé avale fe Krist a ne nlô ya ékôane bekristen, a ne nyii ya nyul éte. 24 Nya ajôô, aval ékôane bekristene ja sili ébien éjôé Krist si, beyale ba yiane fe bo avale da be beyôme bap mfa’a ya mame mese. 25 A beyôm, kelané ôsu a nye’e beyale benan, avale fe Krist a nga nye’e ékôane bekristen a ve émien asu ékôane jé, 26 ndemben a ne telé je étyi a fubu je a ñwobane mendim a zene ya mejô me Zambe, 27 nde ékôane bekristene ja ye teléban asu dé é ngemba’an, teke ayeñ, nge mbot, nge jôm éziñ aval éte, ve mfuban a teke bijô.

28 Avale te fe beyôme ba yiane nye’e beyale bap ane menyule map bebien, a fame ja nye’e ngale ja nye’e fe ébien. 29 Amu teke fam éziñ é tameya vini nyule jé* môs éziñ, ve a voñôlô je a nye’e je avale fe Krist a bo ékôane bekristen, 30 amu bi ne bibu’a ya nyule jé. 31 “Amu jam éte, fame ja ye lik ésa a nyia a ke lat* a ngale wé, a bebaane ba ye bo nsone wua.” 32 Nsolane jam ô ne étyi ôte ô ne anen. Éyoñe ji, me nga kobô ajô Krist a ékôane bekristen. 33 Ve môt ase ya be mia a yiane nye’e ngale wé ane a nye’e émien; nalé fe, ngal a yiane bi beta ésemé asu nnôme wé.