Mbamba foé Marc a nga tili

4 A nga beta taté na, a ye’ele abôñe mañ, a beta nsamba bôt a nga zu koone nye. Nde a nga bet éfunga été a tabe si, éfunga éte é mbe nté éziñ a abôñe mañ, ve beta nsamba bôt a mbe a tele abôñe mañ. 2 A nga taté na a ye’ele be abui mam a zene ya bive’an, nté a mbe a ye’ele’e be, a nga jô be na: 3 “Vô’ôlané. Mbé mefup a nga ke miase mvoñ. 4 Nté a mbe a kele’e a miase mvoñ, nde mefese méziñe me nga ke ma ku zene zen, ane anon é nga so a mane zu di me. 5 Mevo’o ya été me nga ku vôme si é ne meko’o mekok, amu si é nji be abui vôm ate, nde me nga faa été été. 6 Ve éyoñe vian ô nga faé, nde ô nga mane di’i bone metô’ô bete, ane be nga mane viele, amu be nji be be bili minkañ. 7 Mefese mevo’o me nga ku biyo été, ane biyo bi nga mane yametane metôk, a wôé me, a me nji wume bibuma. 8 Ve mefese méziñe me nga ku mbamba si, ane me nga faa a yaé a taté na ma wume bibuma, fes éziñe bibuma 30, nyi fo’o 60, nyi fok é nga wume bibuma a lôte 100.” 9 Ane a nga beta jô na: “Môt a be’e melo ya wôk, a wô’ôk.”

10 Éyoñ a nga li’i étam, minlôman Awôm a mibaé a beyé’é befe be mbe valé, be nga taté na ba sili nye atinane ya bive’an. 11 A nga jô be na: “Zambe a nga volô mia na, mi wôk atinane ya mame me ne étyi me solô ma fombô Éjôé Zambe, ve mfa’a bôte ya nseñ, mame mete mese me ne ve bive’an. 12 Ajô te nde, to’o ba fombô, ba fombô ve teke yene jôm, a to’o ba wôk, ba wô’ô ve teke yem atinane ya été; jôme te nje, be vo’o ki bulane be Zambe, a Zambe a ye ke be jamé.” 13 Nde a nga sili be na: “Nge mi nji wôk atinane ya éve’ane ji, nne mia ye wôk atinane ya bive’ane bivok aya?

14 “Mbé mefup a miase mejô me Zambe. 15 Mefese me nga ku mfôme njoñ, me ne bôte mejô me Zambe me nga miasebane minlem été, ve nné ane be nga wô’ô me, Satan a so a mane té mejô me Zambe me nga miasebane be be. 16 Avale te fe mefese me nga ku si é ne meko’o mekok, me ne bôte be nga kañese mejô me Zambe a mevak, nné ane be nga wô’ô me. 17 Ve akusa bo be nji bi minkañ, ba ke ôsu a buni mejô me Zambe mone nté, ve nné ane étibila’a a minju’u mia kui, be kolé ôbak. 18 Mefese mefe me ne ma me nga ku biyo été, me ne bôte be nga wô’ô mbamba foé, 19 ve mame ya émo* ji ma tyelé bôte minleme yôp, a ngule medu’ane ya akum a mevale minkômbane mese me mane jaé nleme ne lut, a mane yametane mejô me Zambe; a ma bo teke wume bibuma. 20 Mvuse ya été, mefese me nga miasebane mbamba si, me ne bôte be nga wô’ô mejô me Zambe, a bo avale ma jô a wum abui bibuma, fes éziñe bibuma 30, nyi fo’o 60, nyi fo’o é nga wume bibuma a lôte 100.”

21 A nga beta jô be na: “Be nji zuu lambe na, be telé nye ékate* si nge ke énoñe si, sa nalé? Nga ba zuu nye na, be beté nye ételé belambe? 22 Teke jam éziñ é ne nsolane da ye bo teke kulan, teke jam éziñe ba te kôme solé da ye bo teke yené éngeñgeñ. 23 Môt ase a be’e melo ya wôk, a wô’ôk.”

24 A nga ke ôsu a jô be na: “Taba’ané ntyel a avale mia vô’ôlô mame ma kate mia. Ôve’e mia ve’e wô, ñwô fe ba ye ve’e mia wô, ôwé ba ye beta kô’ôlane mia abui. 25 Amu môt ase a bili, nnye ba ye beta kô’ôlane na a bi abui, ve nyu ki a nji bi jôm, ba ye beta vaa ja’a mon abim a bili.”

26 A nga beta jô be na: “Avale te da, Éjôé Zambe é ne ane môt a ke a miase mefese si, 27 a ke ôyo alu ése a vee tyé ése, nté ôte ôse, fese ja faa a yaé, a teke yem avale jam éte da boban. 28 Si ébiene ja wume bibuma ôte’etek ôte’etek, ataté atin, akekui ésesoñ, asu’ulane nkpwel ô bili bitôtôlô mefes. 29 Ve nné ane mefese ma tôlôbô, a to’é ékpwelé ba koé je mefes, amu awolo ya koé mefes é kpwaaneya.”

30 A nga beta jô na: “Bi ne beta vek Éjôé Zambe a jé? Nge ke na, éve’an évé bi ne ngule ya nyoñe na bi timine je? 31 É ne ane fese moutarde,* nje éte é ne na, éyoñe ba bé je si, é ne fese ja dañe tyôtyoé e mefese mese. 32 Ve éyoñe be miaseya je, ja yaé a bo anen a lôte bijebejeba bise; ja bi beta mintyaé aval é ne na, anone ya yôbe da zu lôñe mumba’a map mintyaé mié été.

33 Yésus a nga belan avale bive’an éte na a kate be mejô me Zambe na, be bo ngule ya wô’ô jam a mbe a ye’ele’e be. 34 É ne été na a nji be a kobô’ô be teke belane bive’an, ve éyoñe be mbe be be, a mbe a mane be timine mame mese.

35 Môs ôte, éyoñ alu é nga vin, nde a nga jô beyé’é bé na: “Za’ané bi dañ ôsôé a ke abôñ avok.” 36 Nde éyoñe be nga suu nsamba bôt, be nga daa Yésus éfunga été, nté a mbe été wôé, bifunga bife bi mbe bi wulu’u nsamba a éfunga éte. 37 Ane beta ôkôs a nga vuñ, a mintyôa mi mañe mi nga sôé éfunga été, a éfunga é mbe bebé ya nyoñe mendime si. 38 Ve a mbe a kele’e ôyo ébônga* yôp éfunga été mfa’a ya mvus. Nde be nga vele nye ôyo a jô nye na: “A Ñye’ele, ye ô lôô ke na, bi ntoo bebé ya wu?” 39 Nde a nga kôlô si a bame ôkôs a jô mañe na: “Tabe’e évôl! Bo’o ne mieññ! Ane évuñulu é nga tebe, a beta évôvoé a nga bo vôm ate. 40 Nde a nga jô be na: “Amu jé mia ko woñ* abime di, ye mi nji bi mbunan?” 41 Ve be nga ko mbia woñ, a môt ase a mbe a jô’ô nyu mbo’o na: “Za avale môte di? To’o évuñulu a mañe bia bo nye mewôk.”