Nlitan Jean a nga yen
5 A me nga yene wo ya mbo nnôme Nyu a too éto njôan, mvulekane kalate ô too ntilane mimfa’a mibaane,* mfetan a bifeta’a zangbwal. 2 A me nga yene ngungul éngele ô yôta’ane tyiñe yôbe na: “Za a yiane yoé mvulekane kalate a yoé bifeta’a bié?” 3 Ve teke môt e yôp été nge si nge si été a mbe ngule ya yoé mvulekane kalate nge fombô wô été wôé. 4 Ane me nga bôé beta ñyôn a taté na ma yôn, amu teke môt éziñ a mbe ngule ya yoé mvulekane kalate nge fombô wô été wôé. 5 Ve mvendé jia ya bemvendé é nga jô ma na: “Telé’é ñyôn. Tame yen! Ngbwengbweme ya nda bôte Juda, nkañe David, ô nga dañ a ô ne ngule ya yoé mvulekane kalate a bifeta’a zangbwal ya été.”
6 A me nga yen ézezañ* éto njôan a ézezañe bevevee bitétéa binyin a ézezañe bemvendé, mone ntômba a tele ane nyu ba te wôé, a bili minla’a zangbwal a mise zangbwal, a mise mete me ne ndeme ya minsisime mi Zambe zangbwal a nga lôm e si ése. 7 A été été, a nga so a zu nyoñe mvulekane kalate wo ya mbo nnôme ya Nyu a mbe a too éto njôane yôp. 8 Éyoñ a nga nyoñe mvulukane kalate, bevevee bitétéa binyin a bemvendé 24 be nga kute meboñe si ôsu Mone ntômba, a môt ase ya été a mbe a bili mvet a bisua bi too nkôman a gôlôt bi too njalan a encens. (Encens a ne ndeme ya meye’elane mimfufup.) 9 A ba yia mfefé jia be jô’ô na: “Wo yiane nyoñe mvulekane kalate a yoé bifeta’a ya été, amu ô nga wôéban, a metyi môé ô nga kuse bôt asu Zambe, bôte ya nda bôt ése a nkobô* ôse a mevale me bôte mese a ayoñ ése, 10 a ô nga bo be éjôé a beprêtre asu Zambe wongan, a ba yiane jôé ane bejôô e si ése.”
11 A me nga yen, a wô’ô tyiñ abui beéngele é bôma’an éto njôan a bevevee bitétéa a bemvendé, a tañe jap é mbe bizuk a bizuk,* a betoyini a betoyini, 12 a be mbe be jô’ô tyiñe yôbe na: “A Mone ntômba a nga wu, wo yian éwôlô a akum a fek a duma a ngul a ésemé a bibotan.”
13 Ane me nga wô’ô bitétéa bise ya yôp, a si, a si nyuna si, a mañ a biôme bise ya été bi jô’ô na: “Nyu a too éto njôan a Mone ntômba, bibotan a duma a ésemé a ngule bi bo’o be nye nnôm éto a nnôm éto.” 14 Bevevee bitétéa binyine bi mbe bi jô’ô na: “Amen!” A bemvendé be nga kute meboñe si a kañe nye.