Kalate ôsu Paul a nga tili Becorinthien

8 Jame di, da fombô ajô ya bidi be nga ve bengulemelan: Bia bese bi bili ñyeman. Ve ñyemane wo soo mebun, nté nye’ane wo ve ngule nyul. 2 Nge môt éziñ a simesane na a yeme jôm éziñ, a ngenane te yeme jam éte aval a yiane yeme de. 3 Ve nge môt éziñ a nye’e Zambe, Zambe a yeme môt ate.

4 Mfa’a ya di jôme be nga ve bengulemelan, bia yeme na ngulemelan é se jôme si nyu a na, Zambe a ne ve wua. 5 To’o na biôme bia loobane na “bezambe” bi ne nge yôp, nge si, a é ne été na “bezambe” be ne abui, “betate” fe be ne abui. 6 Mfa’a wongan, Zambe a ne ve wua, Ésa a nga té biôme bise a bia asu dé, a Tate a ne ve wua, Yésus Krist, a zene jé nje biôme bise bi ne a bia a zene jé.

7 Ve, sa ke bôte bese mbe be bili ñyeman ôte. Bôte béziñ, amu bilate be mbe be bili a bengulemelan, ba di bidi bite ane jôme be nga ve ngulemelan a mone môte ya nleme wop a ne nte’an, a bôme be. 8 Ve avale bidi éte da bo ki na bi subu Zambe bebé, nge bi nji di bie, bia jañele ke jôm a nge bi di bie bia nyoñe ke jôm. 9 Ve taba’ané ntyele na fili mi bili na mi ne top, é bo te bo a zen éziñe na ba be ne nte’ane be kolé ôbak. 10 Amu nge wo ô bili ñyeman, wo di temple ngulemelan a na, môt a bili mone môte ya nlem a ne nte’an a yene wo, ye mone môte ya nleme wé a ye ke tindi nye na a di bidi be nga ve bengulemelan? 11 Ajô te, a zene ya ñyemane wôé, môt a bili mone môte ya nlem a ne nte’an a ye ke njañan, monyañe wôé Krist a nga wu a buta’ane nye. 12 Éyoñe mia seme mfa’a ya bobenyañe benan aval éte a balé mone môte ya nleme wop a ne nte’an, mia bo nseme mfa’a Krist. 13 Amu nalé, nge bidi bia bo na mojañ a kolé ôbak, ma ye ke beta di tite môs éziñ, asu na me bo te bo na mojañ a kolé ôbak.