Mame minlôman
26 Agrippa a nga jô Paul na: “Ô mbili ôva’a ngule ya kobô na, ô kat ajô dôé. Nde Paul a nga same wo wé, a taté na a kat ajô dé:
2 “Mfa’a ya mame mese bejuif ba bo’olô ma, a Njô bôt Agrippa, ma wô’ô mevak amu ma zu kobô ajô dame vôm ô ne môse wu. 3 E dañedañ, amu wo kôme yeme mefulu bejuif a minsañeta’ane mise mia bobane zañe bejuif. Nde ñhe ma ye’elane wo na, ô kôme nyoñ éyoñe ya vô’ôlô ma.
4 “Nya ajôô a ne na, mfa’a ya fatan ényiñe me nga nyiñe bôte bam été,* a Jérusalem, ataté éyoñe me mbe mongô, bejuif bese ba yeme de, 5 ba bese be nga yeñ a ma ôsusua, nge ba kômbô be ne zu bo’olô na, me nga nyiñ ane mone pharisien. Amu bepharisien mbe ba dañe tôñe Metiñe me Moïse a lôte bejuif bevo’o bese. 6 Ve éyoñe ji, me tele aba mejô amu me bili ndi nleme ngaka’a Zambe a nga bo bemvamba bangan. 7 Ngaka’a éte ébiene nje menda me bôte 12 mangane ma ke ôsu a bo Zambe ésaé, alu a môs, amu ma buni na, ngaka’a éte ja ye tôéban. A ne amu ngaka’a éte nje bejuif ba bo’olô ma mejô den, a Njô bôt.
8 “Amu jé é ne ayaé ya kañese* na, Zambe a ne wômôlô miñwuan? 9 Mfa’a wom, me mbe me simesa’ane na ma yiane liti a mimboone na, ma wosan éyôlé Yésus ya Nazareth. 10 A jam éte nde me nga bo Jérusalem. Me nga futi abui mimfufube mimbôk, amu me nga bi ôva’a ngule be bejôô beprêtre. A éyoñ é mbe é sili’i na be wôé môte wua ya été, me mbe me va’a tyiñe jam. 11 Biyoñe biziñe besynagogue bese, me mbe me foñesô’ô be, me jeñe’e na me yemete be na, be bene mbunane wop. Me mbe me wô’ô be ôlun aval é mbe na, me mbe me kele’e bitisone bivo’o na me tibili be.
12 Nté me mbe me kele’e Damas na ma ke tibili be, bejôô beprêtre be nga ve ma ngule ya bo jam éte. 13 A Njô bôt, me mbe me tele njoñe yôp, bi too zañe môs, me nga yen éfufup é so’o yôp, é dañe ji nlô jôbô, a é nga faé vôme me mbe me tele, a bôte bia be be bi mbe nsamba. 14 Nde bi nga ku tyia, a me nga wô’ô tyiñ é jô’ô ma nkobô Hébreu na: ‘A Saul, a Saul, amu jé wo tibili ma? Wo bo womiene mintaé amu wo ke ôsu a tyañete abo nsoñ.’* 15 Ve me nga jô na: ‘Ô ne za a Tate?’ A Tate a nga jô na: ‘Me ne Yésus, nnye wo tibili le. 16 Ve kôlô’ô si ô tebe tetele, amu jame di nde ma te yené be wo na ô bo mbo ésaé wom a ngaa ya mame wo te yen, a mame ma ye bo na ô yen, me fombô’ô ma. 17 A ma ye nyii wo mo me bôte ba, a mo me bôte ya meyoñe ma lôme wo. 18 Mfa’a ya yoé mise map, a vaa be dibi été na, be tebe éfufup été, a vaa be éjôé Satan si a toé be éjôé Zambe si, ndembene be ne bi njamane minsem, a nyoñ élik é ne asu bôte be ntoo mfuban a zene ya mbunane be bili be ma.’
19 “Nde ñhe a Njô bôt Agrippa, me nji bo ñyenan ô nga so yôp ôte melo. 20 Ane me nga taté be bôte ya Damas, mvuse ya valé ba ya Jérusalem, a ba bese ya ngoto ya Judée a ba ya meyoñ, me nga kate be foé nyi: ba yiane kôñelane minlem a bulane be Zambe, be bo’o mame ma liti na be kôñelaneya minlem. 21 Mame mete mme me nga bo na bejuif be bi ma Temple, a kômbô wôé ma. 22 Ve amu me nga wô’ôtane mvolane wo so be Zambe ényiñe jam, nde azukui den, ma ke ôsu a kañete bôte be bili bone minkôñ, a ba be bili beta minkôñ; me nji kañete be mame mefe, fo’o ve mame bekulu mejô a Moïse be nga jô na ma yiane boban 23 na Krist a mbe a yiane tôbane minjuk, a na a mbe môt ôsu a nga wômô miñwuan, a na éfufube jé, é mbe na ja yiane katebane be bejuif a be bôte ya meyoñ.”
24 Nté Paul a mbe a kobô’ô mejô ma na, a kat ajô dé, Festus a nga jô tyiñe yôbe na: “A Paul, ô nga bo akute nga! Abui ñyemane mame dôé é beteya wo nlô!” 25 Ve Paul a nga jô na: “Me nji bo akut, a Ntômba Festus, ve ma kobô benya mejôô môt ase a ne kôme wôk. 26 Nya ajôô a ne na, njô bôte ma kobô a nye a nleme wom ôse, a yeme mame mete mese, a me too ndi na a nji dimine jam éziñe ya été amu mame mete me nji boban asoé. 27 A Njô bôt Agrippa, ye wo buni bekulu mejô? Ma yeme na wo buni be.” 28 Ve Agrippa a nga jô Paul na: “Ana’ana wo zu bo na me tyendé ôsimesan a bo kristen.” 29 Ane Paul a nga jô nye na: “Mise me Zambe, to’o da sili abui éyoñe nge tyôtyoé éyoñe na ô bo kristen, ma yi na sa ke ve wo étam, ve bôte bese ba vô’ôlô ma môse ya den, be bo ane ma, ane ô vaa ve bengôkobe be tii ma mo ba.”
30 Nde njô bôt a nga tebe tetele a ngovina a Bérénice a bôte be mbe a be. 31 Ve nté be mbe be kôlô’ô, môt ase a mbe a jô’ô nyu mbo’o na: “Môte nyi a nji bo jôm éziñe ja yian awu, nge mimbôk.” 32 Nde Agrippa a nga jô Festus na: “Nge môte nyi a nji ye jô na a kee ajô dé be César, ve bia te suu nye.”