Mame minlôman
23 Ane Paul a nga fombô Sanhédrin* ne tôéñ a jô na: “A bôt, a bobejañ, azukui môse ya den, mone môte ya nleme wom a ne mfubane mise me Zambe.” 2 Éyoñ éte beta prêtre Ananias a nga jô bôte be mbe be tele’e fefele jé na be bibi nye. 3 Nde Paul a nga jô nye na: “Zambe a ye bibi wo, wo mfin ô ne nduban a bifumulu meyañ.* Ô too valé na wo tyi’i mejô aval ane Metiñe me Moïse ma jô, ye wo fe wo tyame Metiñe me Moïse éyoñe wo jô na be bibi ma?” 4 Bôte be mbe be tele valé be nga sili nye na: “Ye wo ta beta prêtre Zambe?” 5 Paul a nga yalane na: “A bobejañ, me nji be me yeme’e na, nnye a ne beta prêtre. Amu é ne ntilane na, ‘Ô nji yiane ta ntebe ôsu ya ayoñe dôé.’”
6 Paul a nga yeme na bôte béziñe ya Sanhédrin be mbe besadducéen, ba bevo’o ki be mbe bepharisien, nde a nga yôtane yôp été a jô’ô na: “A bôt, a bobejañ, me ne pharisien, a mone bepharisien. Ba tyi’i ma ajô môse wu amu ma buni na miñwuane mia ye wômô.” 7 Amu a nga jô nalé, nsañeta’ane a nga bo zañe bepharisien a besadducéen, ane be nga kandane mengam. 8 Amu besadducéen ba jô na ñwômane miñwuan ô nji bo, nge beéngele, nge nsisim, ve bepharisien be ba kañese mame mete mese. 9 Nde beta zô’é a nga bo, a bescribe béziñe ya ngame bepharisien be nga tebe a taté na ba kobô a ayok ése be jô’ô na: “Bi nji yene mbia jam éziñe be môte nyi, za ajôô é ne, nge nsisim nge éngele a nga kobô nye...” 10 Mbôle nsañeta’ane a nga ke ôsu a bo abui, njôô bezimbi a nga ko woñe na be bo Paul mbia jame wôé, nde a nga ve tyiñe na bezimbi be sis a ke vaa nye zañe jap, a kee nye yate bezimbi.
11 Ve alu é nga tya’a valé, Tate a nga subu nye bebé a jô nye na: “Bo’o ngule nlem a Paul! Amu aval ô nga mane kañete ajô dame Jérusalem, aval éte fe wo ye ke kañete de Rome.”
12 Éyoñe môs ô nga bo, bejuif be nga bo émo’o be kane’e ngana na, ba ye ke di nge nyu nté be ngenane teke wôé Paul. 13 Befame be nga bo émo’o a kane ngana éte be mbe be lôte’e bôte 40. 14 Ane be nga ke be bejôô beprêtre a bemvendé a jô na: “Bi maneya kane ngana nya nkanane* na bia ye ke tye’e jôm éziñ akekui bia ye wôé Paul. 15 Éyoñe ji, mia a bôte ya Sanhédrin,* sila’ané njôô bezimbi na a zuu mia nye, mi bo’o ve ane mia yi na mi tu’a fas ajô dé, ve ôsusua na a nyiin, bia ye bo nkômesane ya wôé nye.”
16 Ve jame da, mone kale Paul a nga wô’ô na bôte ba kômesane na be ke yabe Paul, ane a nga ke yate bezimbi a kate de Paul. 17 Ane Paul a nga loon évete bezimbi a jô je na: “Nyoñe’e mone ndômane nyi, ô kee nye be njôô bezimbi amu a bili jam éziñe ya kate nye. 18 Nde évete bezimbi é nga kee nye be njôô bezimbi a jô nye na: “Mone mimbô’ô ba loone na Paul, a te loone ma a jô ma na me zuu mone ndômane nyi be wo, amu a bili jame ya kate wo.” 19 Njôô bezimbi a nga bi nye wo, a kee nye mon ésok, a sili nye na: “Jé ô bili na wo kate ma?” 20 A nga yalane na: “Bejuif be maneya kui tyiñe na, be zu wo sili na ô suu Paul a ke Sanhédrin* akiti, na be bo ve ane ba kômbô tu’a fas ajô dé wôé. 21 Ve te vô’ôlô be, amu befam a lôte 40 ba yabe nye a be nga kane ngana* na, ba ye ke di nge nyu nté be ngenane te wôé nye, a be ne nkômesan; ba yange ve na ô ve tyiñ.” 22 Nde njôô bezimbi a nga suu mone ndôman, éyoñ a veya nye atiñe na: “Te kate môt éziñe na wo te zu kate ma jame di.”
23 Ane a nga loone bivete bezimbi bibaé a jô bie na: “Kômesa’ané bezimbi 200, a bezimbi ba bete bikabela 70, a ba be bili mekoñe 200, na mi ke Césarée mewolo ébule ya mame ngô’é.* 24 Nde fe kômesa’ané bikabela Paul a ye bete na, mi kee nye mvo’é be ngovina Félix.” 25 A nga tili kalate a jô’ô na:
26 “Ma Claude Lysias, ma tili ntômba Félix, ngovina, mbôlô! 27 Bejuif be nga bi môte nyi a be mbe be ntoo bebé ya wôé nye. Ve me nga ji’a ke kamane nye a bezimbi bam, amu me nga wô’ô na a ne mone romain. 28 Mbôle me nga kômbô yeme mame ba bo’olô nye, nde me nga kee nye Sanhédrin wop. 29 Me nga yene na ba bo’olô nye mame me tii a Metiñe me Moïse, ve be nji bo’olô nye jam éziñe da yiane na be wôé nge futi nye mimbôk. 30 Ve mbôle me nga wô’ô na be nga bo émo’o mfa’a ya wôé môte nyu, ma lôme wo nye éto ébiene ji, a ma jô bôte ba bo’olô nye mame na, be zu bo’olô ajô dé vôm ô ne.”
31 Nde bezimbi bete be nga nyoñe Paul aval ane be nga kate be a kee nye be Antipatris alu. 32 Tyé kpwaa, bezimbi ba wulu bikabela be nga ke a Paul, ve bezimbi bevo’o be nga bulane yate bezimbi. 33 Bezimbi ba wulu bikabela be nga kui Césarée a ve ngovina kalate, be liti’i fe nye Paul. 34 Nde a nga lañe kalate a sili nye ngoto a so, nde Paul a nga kate nye na a so Cilicie. 35 Nde a nga jô na: “Ma ye kôme vô’ôlô wo éyoñe bebo’olô bôé ba ye so.” Ane a nga ve tyiñe na, be ke ôsu a ba’ale nye nda Hérode vôme ngovina a tabe.