Nlitan Jean a nga yen

7 Mvuse jame di, me nga yene beéngele benyine be tele e meku’u menyine ya si, be bili bivuñulu binyine ya si, ndemben évuñulu éziñ é vo’o ke zu jimbi si, nge mañ, nge élé éziñ. 2 A me nga yen éngele mfe, a bete’e mfa’a jôp da tôô,* a bili ndeme vevea Zambe; a a nga yôtane beéngele benyine be nga ve ésaé ya ndamane si a mañ, 3 a jô’ô na: “Te mia ndamane si a mañ a bilé akekui éyoñe bia ye mane futi alo Zambe ndeme mvome mesu.”

4 A me nga wô’ô tañe bôte be nga nyoñe sitam, bôte 144 000 be nga nyoñe sitam, be so’o nda bôt ése ya bone be Israël:

9 Mvuse jame di me nga yen, a tame yen! Beta nsamba bôt, nnye ate teke môt a mbe ngule ya lañ, a so’o meyoñe mese, menda me bôte mese a mevale me bôte mese a minkobô* mise, be tele ôsu éto njôan a ôsu Mone ntômba, be be’e bifumulu melô’ô; be bili fe mebui melene mo map. 10 A ba ke ôsu a yôtan a beta tyiñ, be jô’ô na: “Nkôtane wo so bia be Zambe wongan, nnye ate a too éto njôan, a be Tate wongan.”

11 Beéngele bese be mbe be tele mbôma’ane éto njôan a bemvendé a bevevee bitétéa binyin, a be nga kute meboñe si ôsu éto njôan a kañe Zambe, 12 be jô’ô na: “Amen! Duma a ékaña’a a fek a mvean akiba a ésemé a éwôlô a ngule bi bo’o be Zambe wongane nnôm éto a nnôm éto. Amen.”

13 Ane mvendé jia é nga sili ma na: “Bôte be be’e bifumulu melô’ô ba, be ne beza a ba so vé?” 14 Nde, été été, me nga jô nye na: “A Tate, ô ne nyu a yem.” A nga jô ma na: “Bôte ba be ne ba ba so beta étibila’a, a be nga sôbe biyé biap a bo bie na bi bo bifumulu e metyi me Mone ntômba été. 15 Ajô te nde, be tele ôsu éto njôane Zambe, a ba bo nye ésaé é ne étyi môse ba alu temple wé été; a Nyu a mbe a too éto njôan a ye ndamé nda éndelé jé be be. 16 Ba ye ke beta wô’ô zaé nge évé, a ayôñe ya viane da ye ke beta di’i be, 17 amu Mone ntômba, nyu a ne ézezañ* éto njôan a ye ba’ale be, a ye wulu be a kee be vôme mendime ya anjeñe ya ényiñe* me ne. A Zambe a ye fimi mili’i mese me ne mise map.”