Mame minlôman

16 Nde a nga suane Derbé a Lystre. Ñyé’é éziñ a mbe valé a too jôé na Timothée, nyia wé a mbe ngone juif a too fe ñyé’é, ve ésa wé a mbe mone grec, 2 bobejañe ya Lystre a Iconium be mbe be se’e nye amu mbamba ntabane wé. 3 Paul a mbe a yiik na ba Timothée be ke nsamba, ane a nga nyoñe nye a tyi’i nye atyel amu bejuif bese be mbe bevôme bete, be mbe be yeme’e na ésa wé a ne mone grec. 4 Nté be mbe be kele’e ba wulu bitison, be mbe be kele’e ba kate bôte be mbe wôé na be tôñe mintyi’ane minlôman a bemvendé ya Jérusalem be nga nyoñ. 5 Nde fe, nya ajôô a ne na, bikôane bekristene bi nga ke ôsu a yeme mbunan été, a tañe bebuni é nga ke ôsu a nene môs ane môs.

6 Nde be nga tyi’ilane Phrygie a nlam ôse ya Galatie, amu mfufube nsisim a nga telé be atiñe na be bo te kobô ajô Zambe ngoto ése ya Asie. 7 Nde fe éyoñe be nga siliki Mysie, be nga ve ngule na be ke Bithynie, ve nsisime Yésus ô nji ve be ôva’a ngul. 8 Nde be nga dañe* Mysie a siliki Troas. 9 A alu, Paul a nga bi ñyenan, môte ya Macédoine a tele nye ôsu a jô’ô nye na: “Za’ak Macédoine a volô’ô bia.” 10 Nné ane a nga bi ñyenan ôte, bi nga jeñ a ngul ése na bi ke Macédoine, bi simesa’ane na Zambe a nga lôme bia na bi ke kañete be mbamba foé.

11 Nde bi nga bet éfunga Troas, a ke Samothrace teke tebe zen, ve môs ô nga tya’a valé, bi nga suane Néapolis; 12 éyoñe bi nga kôlô valé, bi nga ke Philippes, Philippes a ne éjôé nlam ôfe si. Philippes a ne mfañe tisone ya ngoto ya Macédoine. Bi nga tabe tison éte bone melu. 13 Môse Sabbat bi nga ke dañe mbé ya tison a ke nseñ, fefel ôsôé, vôme bi nga simesane na afôla ba ye’elan é ne, bi nga tabe si a taté na bia kobô a binga be nga tôkane valé. 14 A minga éziñ a too jôé na Lydie, a mbe nkuane biyé bi ne beta tañ a so’o Thyatire, a a mbe fe nkañe Zambe, a mbe a kome’e vô’ôlô, a Yéhôva* a nga yoé nye nleme ne ngeññ na a kañese mame Paul a mbe a jô’ô. 15 Nde éyoñ émien a bôte ya nda jé be nga duban, a nga ye’elane bia na: “Nge mi nyoñeya ma ane mbuni Yéhôva,* za’a tabané nda jam.” A nga yemete bia na bi kañese ke a nye.

16 A nga bo na, nté bi mbe bi kele’e vôme ba ye’elan, ngone minga éziñ, é too mbo ésaé, é mbe é bili mbia nsisim a bo na a yemelane mame ma ye boban. Ngone minga éte é nga zu tôbane bia. A mbe a va’a bemasa bé abui moné, amu a mbe a kate’e bôte mame ma ye bobane melu ma zu. 17 Mona minga ate, a nga ke ôsu a tôñe bia be Paul a kobô’ô yôp été na: “Bôte ba be ne bebo bisaé be Zambe a dañe mbetane yôp”, a bôte bete ba kañete mia zen é ne ve mia ényiñ.” 18 A nga bo nalé melu abui, nde jam éte é nga tya’a Paul nlem, ane a nga kôñelan a jô nsisim ôte na: “Ma jô wo e jôé Yésus Krist na, ô kôlô be nye.” Ane nsisim ô nga kui atan awolo éte ébien.

19 Éyoñe bemasa bé be nga yene na, jôm é mbe é va’a be moné é boya momo, be nga bi Paul ba Silas, a dutu be tyia a kee be, be betebe ôsu vôme bôte be wô’ô bo be sula’an.* 20 Éyoñe be nga kee be be betyi’i mejô, be nga jô be na: “Bôte ba ba bo ézezame tisone jangan, angôndô ya abui. Be ne bejuif, 21 a ba ye’ele bia metum atiñ é nji kañese na bi vô’ôlô nge tôñ, amu bi ne beromain.” 22 Ane nsamba bôt ô nga valé si ane môte wua, a kobô be abé a ôlun ôse, nde betyi’i mejô be nga jô na, be vaa be biyé biap ya yôp, be yite be a minkasa. 23 Éyoñe be nga yite be mbia ébôm, be nga futi be nda mimbôk, a jô mba’ale mimbô’ô na a kôme be ba’ale. 24 Amu be nga ve nye aval atiñ éte, a nga futi be nda mimbô’ô ja dañ ôyabe nda été, a ka’a be ngata’a mebo.

25 Ve bebé zañ alu, Paul a Silas be mbe be ye’elan a ve Zambe duma a bia, a mimbô’ô mivo’o mi mbe mi wô’ô ane ba yia bia a ye’elan. 26 A teme na beta mfô’ôsane si a nga bo, nde mimbôka’a ya nda mimbô’ô mi nga fô’ôsan. Nde fe mimbé mise mi nga yombô été été, a mengata’a me nga mane kuleban. 27 Éyoñe mba’ale mimbôk a nga vee ôyo a yene na mimbé ya nda mimbô’ô mi yoo, a nga té nkpwaté mekône wé na a nga zu wôé émien, a buni’i na mimbô’ô mi maneya tup. 28 Ve Paul a nga jô nye tyiñe yôbe na: “Te bo womiene mbia jam, amu bia bese bi ne va!” 29 Nde a nga sili éfufup, a nyiine nda été avôl avôl a nyeñeba’an, ane a nga ku tyia ôsu Paul a Silas. 30 Ane a nga kee be nseñ a sili be na: “A bemonti, jé ma yiane bo na me bi ényiñ?” 31 Be nga jô nye na: “Buni’i Tate Yésus a wo ye bi ényiñ, womien a bôte be ne nda jôé.” 32 Be nga kañete nye mejô me Yéhôva* a bôte bese ya nda jé. 33 Ane émien a nga nyoñe be awolo éte ébien alu a sôbe be meveñ. Nde émien a bôte bese ya nda jé be nga dubane teke yange. 34 A nga kee be nda jé a mane be kôme tebele, a a nga vak a be nya abuii émien a bôte bese ya nda jé, amu éyoñe ji a ntoo mbuni Zambe.

35 Éyoñe môs ô nga bo, betyi’i mejô be nga lôme bezimbi be jô beba’ale mimbô’ô na: “Su’ané bôte bete.” 36 Nde mba’ale mimbôk a nga ke kate Paul mame betyi’i mejô be nga jô na: “Betyi’i mejô ba te lôme bôte na bi suu mia bebaé. Nde kuané ñhe atan, mi ke mvo’é.” 37 Paul a nga jô be na: “Be nga bôme* bia bôt été, teke bia tyik ajô* a too ke na bi ne beromain a futi bia mimbôk. Éyoñe ji, ba zu kuli bia atan asoé aya? Teké’é fo’o. Kele katané be na, bebiene be zu bia kuli nseñ.” 38 Bezimbi be nga ke kate betyi’i mejô mejô mete, betyi’i mejô be nga ko woñ éyoñe be nga wô’ô na bôte bete be ne beromain. 39 Ane be nga so a ye’elane be, éyoñe be kuliya be nda mimbôk, be nga jô be na be kôlô tison éte. 40 Ve be nga kôlô nda mimbôk a ke nda Lydie, a éyoñe be nga yene bobejañ, be nga ve be ngule nyul ane be nga ke.