Mbamba foé Matthieu a nga tili

11 Éyoñe Yésus a nga mane ve beyé’é 12 bé mebendé, nde a nga kôlô valé a ke kañete bitisone ya ngoto éte.

2 Ve Jean a too nda mimbôk, a nga wô’ô mame Yésus a mbe a bo’o, ane a nga lôme beyé’é bé 3 na be ke sili nye na: “Ye wo ô ne Môt a yiane so, ye na bia yiane yange môte mfe?” 4 Nde Yésus a nga yalane be na: “Kele’e katané Jean mame mia wôk a yen: 5 Mindindime mia yen, mimbômbô’ô mia wulu, minzezame mi ntoo mvo’é, mindôndo’o mia wôk, mimbime mia wômô mesoñ, bôte be ne azoé ba wô’ô mbamba foé. 6 Meva’a me bo’o be môt a nji yene jame da kolé ôba’a be ma.”

7 Nté beyé’é be Jean be mbe be bula’an, nde Yésus a nga taté na a kobô nsamba bôt ajô Jean a jô’ô na: “Jé mi nga ke yene nkôte si? Ye élok é ne ayap* évuñulu é maneya vite si? 8 Mi nga kômbô ke yene jé wôé? Ye môt a be’e mimfañe biyé?* Ke bôte be be’e mimfañe biyé ba nyiñe menda bejô bôt. 9 Tama katané ma, amu jé mi nga kui nseñ? Ye ke yene nkulu mejô? Ôwé, ma kate fo’o mia na, a dañedañe nkulu mejô. 10 Môt ate nnye mintilane mia jô mfa’a wé na: ‘Tame yen, ma lôme nkate foé wom, a ke wo ôsu, nnye a ye kôme wo zen!’ 11 Ma kate fo’o mia benya mejôô na, e bôte bese be nga bialé be binga, teke wua a dañe Jean Baptiste. Ve môt a ne tyôtyoé Éjôé ya yôp a dañe nye. 12 Ataté melu me Jean Baptiste, azukui den, Éjôé ya yôbe nje é ne jôme bôte ba sôñ, a bôte ba sôñe je, ba bi je. 13 Amu Metiñe me Moïse a mejô bekulu mejô me nga kate mame ma ye bobane melu ma zu akekui éyoñe Jean a nga so; 14 to’o mia kañese de nge momo, nnye a ne ‘Élie a mbe a yiane so.’ 15 Môt a be’e melo ya wôk, a wô’ôk.

16 “Ma ye ve’e miaé bôte wu a beza? Be ne ane bone be bongô be too nseñ éwônga, ba loone bemvôé bap ba be be be wô’ô bo bivôé, 17 be jô’ô na: ‘Bi nga loñe mindiñ, mi teke jem; bi nga yia jia awu, ve mi nji yôn.’ 18 Avale te fe Jean a nga so teke di nge nyu, ve bôte ba jô na: ‘mbia nsisim a jôé nye.’ 19 Mona môt a nga so, nye a ja’a bidi a nya’a fe meyok, ve bôte ba jô na: ‘Tama yenan! Môt ate a ne ndôndok a nnyu woon, a too fe mvôé benyoñe toya a bebo minsem.’ Ve ma kate mia na, fe’e môte ja yené a mimboone mi mame mié.”

20 Ane a nga taté na a kômekane bitisone bise a nga dañe bo mesimba, amu be nji kôñelane minlem, a jô’ô na: 21 “Ngo’o wo, a Korazîn! Ngo’o wo a Bethsaïda! Amu nge mesimba me nga bobane be mia, me nga bobane Tyr a Sidon, ve bôte ya wôé be nga ye kôñelane minlem ayap, a jaé biyé minkuta a tabe asup été. 22 Ve ma kate fo’o mia na, jam é nga kui Tyr a Sidon da ye bo tyi’ibi ya jibi a lôte jame da ye kui mia môse ntyi’ane mejô. 23 A wo, Capernaüm, ye wo buni na wo ye beteban akekui yôp? Momo, wo ye viane sis akekui Soñ* été; amu na, nge mesimba me nga bobane be wo me nga bobane Sodome, wôna tison éte é ngenan azukui den. 24 Ve ma kate fo’o mia na, jam é nga kui Sodome da ye bo tyi’ibi ya jibi a lôte jame da ye kui mia môse ntyi’ane mejô.”

25 Éyoñe te nje Yésus a nga jô na: “A Ésa wom, ma ve wo duma bôt été, amu ô nga solé mimfefek a beyeme mame mame mete, ve ô nga bo na bôte be ne éjote nyul ane bone be bongô mbe be yeme me. 26 Ôwé a Ésa wom, amu ô nga yene mvaé ya bo nalé. 27 Ésa wom a nga ve ma ngule ya tebele biôme bise, a teke môt éziñ a kôme yeme Mon ane ô vaa ve Ésa; nde fe, teke môt éziñ a kôme yem Ésa ane ô vaa ve Mon, a nyu ase Mon émien a kômbô de kat. 28 Za’ané be ma, mia bese mi ne nte’an a mia mi be’e adite mimbe’e, ma ye bo na mi beta bi ngule nyul. 29 Nyoñané éboñeté jam, za’ané fe yé’é be ma, amu me ne évôvoé nlem a éjote nyul, ma ye bo na mi beta bi ngule nyul.* 30 Amu éboñeté jam é ne tyi’ibi ya be’e, mbe’e wome ki ô nji bo adit.”