Mame minlôman

27 Nde éyoñe ntyi’an ô nga nyoñebane na bia yiane bet éfunga a ke Italie, be nga nyoñe Paul a mimbô’ô mivo’o miziñ, a ve mie évete bezimbi be mbe be lo’one na Julius, a mbe nsamba bezimbi Auguste.* 2 Bi nga bet éfunga ya Adramytium, é mbe é kele’e bité besitima ya ngoto ya Asie, a bi nga ke dulu éte bia be Aristarque, môte ya Macédoine ya Thessalonique. 3 Tyé kpwaa, bi nga tebe Sidon. Julius a nga ba’ale Paul a mbamba nlem,* a nga jô’é nye na a ke be bemvôé bé na be nyoñe ngap a nye.

4 Akôlô ya valé, bi nga bet éfunga a wulu éwome Chypre, mfa’a ya sobô bivuñulu bi mbe bi za’a bia ôsu. 5 Nde bi nga wulu mfa’a ya vôme mañe me ne édok, bi womelô’ô Cilicie a Pamphylie; a bi nga tebe Myre ya Lycie. 6 Valé, évete bezimbi é nga yen éfunga ya Alexandrie, é mbe é kele’e Italie, nde a nga bo na bi bet été. 7 Mvuse ya valé, bi nga wulu ôte’etek tañ abui melu a kui Cnide. Ve é nji be tyi’ibi ya kui valé, bi nga wulu éwome Crète akekui Salmoné na évuñulu é bo te ndeñele bia. 8 É mbe fo’o ayaé ya womelô nsa’a mañ, bi nga kui vôme ba loone na Mbamba été besitima, bebé tisone ya Lasée.

9 Abui éyoñ é mbe é lôteya a é mbe é ntoo angôndô ya kee dulu ôsu, amu to’o ntyiane bidi asu Môse ya beta late ngbwa ô mbe ô lôteya, Paul a nga ve ôsimesane wé. 10 A nga jô be na: “A bôt, me lôô na dulu dangane ya tyi’ilane mañe da ye bo bia abé, sa ke ve na bia ye jañele mimbe’e nge éfunga, ve bi ne fe jañele binyiñe biangane bibien.”* 11 Ve évete bezimbi é nji vô’ôlô Paul, a nga viane vô’ôlô môt a wulu éfunga a môt émien a mbe je. 12 Amu été besitima é nji be mvo’é asu éyoñe ya ngul avep, abui bôt é mbe tyiñe na, be kôlô valé a yene nge be ne ngule ya ke Phénix a zen éziñ. A ne été besitima é ne Crète, nje ja ke suane mfa’a ya nord-est a sud-est ndembene be lôt éyoñe ya avebe valé.

13 Éyoñ évuñulu ya sud é nga je’ebe, be nga buni na be ne ngule ya tôé nsôñane wop. Nde be nga vaa atyi étyé, a téé dulu be womelô’ô abôñe mañe ya Crète. 14 Ve mvuse mon éyoñ, ngul évuñulu ba loone na Euraquilon,* é nga zu jimbi ékôte si. 15 Amu ngul évuñulu é mbe é za’a bia ôsu, bi nji be ngule ya bo na éfunga é wulu zene ja yian. Amu bi nji be ngule ya bo jam afe, bi nga jô’é na évuñulu é wo’otô bia. 16 Bi nga bo avôle ya ke sobô mon ékôte mañe ba loone na Cauda, ve akusa bo nalé, bi nga sutane nya abuii na bi ke nyoñe mone éfunga a ne volô bôte na be nyii bebien, a mbe a tyele mvus beta éfunga. 17 Ve éyoñe bi nga futi nye éfunga été, bôte be nga nyoñe minkol a tiñeti mie éfunga, amu bi nji be bi yiik na bi ke jimbi Syrte,* a na éfunga é bôlé. Bi nga sili biôme bia suk éfunga si, ane évuñulu é nga wo’otô bia. 18 Amu beta ôkôs a nga fô’ô bia angôndô ya ngul, nde tyé kpwaa, be nga taté na ba vaa biôme bi mbe éfunga été na é bo ôveves. 19 Môse lale, bôte ba bo bisaé éfunga, be nga be’e biôme be wô’ô belane bie éfunga été a wua bie mañ été.

20 Amu nlô jôbô a ateté bi nga bo te yené tañ abui melu, a na ngul évuñulu* é mbe é vuñu’u é za’a mfa’a bi mbe, ndi nlem ése bi mbe bi bili na bi ne nyiñ é nga man. 21 Valé bôte be tabeya ayap éyoñe teke di, Paul a nga tebe tetele zañe jap a jô na: “A bôt, é nga ye bo mvo’é nge mi nga ye vô’ôlô melebe mam, a bo te taté dulu di, éyoñe bi mbe Crète, nalé a nga ye bo na mi bo te tôbane minju’u mi a jañele biôme bienan. 22 Ve éyoñe ji ma jô mia na te mia bili ate’e nyul, amu teke môte* wua ya be mia a ye wu, fo’o ve éfunga étam, nje ja ye bôlé. 23 Alu di, éngele Zambe wom a Zambe ma bo ésaé é ne étyi, a te zu tebe ma bebé 24 a jô ma na: ‘Te ko woñ a Paul, da sili na ô ke kat ajô dôé be César, a tame yen! Zambe a ye nyii wo, a bôte bese mia be be mia wulu.’ 25 Ajô te a bôt, te mia bili atek, amu ma buni Zambe na mame mese ma ye boban aval a te ma kat, teke vaa nge beté. 26 Ve bia yiane ke tebe ékôte si éziñ.”

27 Nde alu 14, éyoñe te mañe ya Adria me sô’ôsane bia zañ alu, bôte ba saé éfunga été be nga wô’ôtane ve ane bi nga subu vôme si é ne bebé. 28 Nde be nga vek abim édok é ne, a yene na a ne meta bebé 36, éyoñe te be nga beta subu ôsu mone jôm a beta vek, be nga koone na a ne bemeta bebé 27. 29 Amu be nga ko woñe na bi ke jimbi mekok, be nga wua metyi bityé menyine mañ été mvuse sitima a be mbe ôjeja’a ya yen ane tyé ja lendé. 30 Ve bôte be mbe be saé éfunga été, be nga jeñe na be tup, ajô te nde be nga suu mon éfunga mañ, be jô’ô na: “Bia ke sulu metyi bityé mfa’a ya ôsu ya éfunga.” 31 Éyoñe Paul a nga yene jam éte, a nga jô évete bezimbi a bezimbi na: “Nge bôte ba be bo te tabe éfunga été, mia ye ke nyiñ.” 32 Ane bezimbi be nga tyi’i minkole ya mon éfunga a jô’é na a ku mañ été.

33 Paul a nga ve bese ngule nyule na be di, a jô’ô na: “Den a ne alu awôm a nyini mia ke ôsu a yange minleme mi tyelé mia yôp, mi too teke di jôm. 34 Nde ma jô mia na mi di; a ne asu mfi wônan, amu teke môt éziñe ya be mia a ye jañele kongo ésile ya nlô wé.” 35 A éyoñ a maneya jô mejô mete a nga nyoñe belet a ve Zambe akiba ôsu bese, éyoñ éte a nga be’e je a taté na a di. 36 Nde bese be nga bi ngule nyul, a bese be nga taté na ba di. 37 Bia bese bi mbe éfunga été, bi mbe bôte* 276. 38 Éyoñe be nga mane di a jaé, be nga be’e blé a mbe éfunga été a wua nye mañ amu be mbe be yiik na éfunga é bo ôveves.

39 Éyoñe tyé é nga lendé, be nga yene si ve be teke je yem, a mbe éwome mañ é bili abui nselek, nde be nga tyi’i na ba zu bo na éfunga é ke wôé, nge be ne ngule ya bo de. 40 Be nga tiine minkole ya metyi bityé a jô’é mie na mi ku mañ été, éyoñ éte be nga tiine nkole ya bingabe bia volô na be liti éfunga zen; éyoñe be teleya nlinga a futi wô vôm évuñulu ja ke, be nga nyoñe zene ya kindik. 41 Éyoñe be nga jimbi abôme nselek mañe me nga mane vise mimfa’a mibaé, be nga kee éfunga kindik, ôsu ya éfunga ô nga yeme nselek été, teke beta fô’ôsan, nté mvuse ya éfunga é mbe é bôlé’é, amu ngule ya mintyôa mi mañ. 42 Ane bezimbi be nga tyi’i na ba mane wôé mimbôk, ndembene wua ya été ô bo teke tup ô jo’ok. 43 Ve évete bezimbi é nji be é yiik na mbia jam a kui Paul, nde é nga telé bezimbi atiñe na, be bo te bo jame ba kômbô bo. A nga jô bôte be mbe be yeme’e jo’o na be ku mañ a jok, asu na be taté ke kui kindik. 44 Bôte bevo’o ba ye tôñe be, bevo’o be bete mebame nge bifuse ya éfunga. Avale te nde bese be nga kui kindi’i mvo’é.