Kalate ôsu Paul a nga tili Becorinthien

2 Nde a bobejañ, éyoñe me nga zu be mia na ma zu kate mia ñsolane jame Zambe ô ne étyi, me nji so me bela’ane nkobô nge fe’e ya mimfefek. 2 Me nga nyoñe ntyi’ane ya bo te yeme jam afe zañe jenan, nge ô vaa ve Yésus Krist, nnye be nga tyelé élé. 3 A me nga so be mia me too nte’an, me ko woñ, me nyeñeba’ane fe abui; 4 éyoñe me nga kobô a ye’ele, me nji belane ngule bifia mimfefe’e mia belane bie, ve bifia bia liti ngule ya mfufube nsisim, 5 ndembene mbunane wônan ô ne bo, sa ke a fe’e ya be bôt, ve a ngule Zambe.

6 Éyoñe ji bia kobô ajô fek, be bôte be ne bitôtôlô, ve sa ke fe’e ya émo* ji, nge fe’e betebe ôsu ya émo* ji, nje éte ja yiane bo momo. 7 Ve bia kobô ajô ya fe’e Zambe, nje éte ja yené ñsolane jam ô ne étyi, fek é solô, nje éte Zambe, ôsusua biyoñ,* a nga naane je melu mvus asu duma dé. 8 Teke ntebe ôsu éziñe ya ba ya émo* ji, a nga kui na a yeme fek éte. Amu nge be nga ye yeme je, be nji ye wôé* étôto’o Tate wongan. 9 Ve, fo’o ve aval é ne ntilan: “Dis é nji yene me, a alo é nji wô’ô me, môta binam a nji kui na, a simesane nleme wé été, mame Zambe a nga kômesan asu ba ba nye’e nye.” 10 Amu bia, mbe Zambe a nga kate mame mete a zene ya nsisime wé, amu nsisime wo fa’a mame mese, to’o bido’o bi mame ya Zambe.

11 Za ya be bôt a yem asimesane ya môt nge ô vaa ve nsisim ô ne be môt ate? Avale te fe, teke môt a kuiya na a yeme mame me Zambe, nge ô vaa ve nsisime Zambe. 12 Éyoñe ji, bi nga nyoñ, sa ke nsisime ya émo, ve nsisime wo so be Zambe, ndembene bi ne yeme mame Zambe a nga ve bia a mbamba nleme wé. 13 Mame mete bia kobô fe me, sa ke a mejô fe’e môta biname ja ye’ele, ve a mejô nsisime wo ye’ele, avale bi ne timine* mame ya nsisim a bifia ya nsisim.

14 Ve môte ya minsôn a ne te yebe* mame ya nsisime Zambe, amu mfa’a wé, mame mete me nji bo jôm, a a vo’o ke kui na a yeme me, amu a ne a nsisime ñwô ba fase wô mame mete. 15 Ve môte nsisime Zambe wo wulu nye, a fase mame mese, ve teke môt a tyi’i nye ajô. 16 Amu “za a kuiya na a yem ôsimesane Yéhôva,* na a ye’ele nye?” Ve bia, bi bili ôsimesane Krist.