Kalate Paul a nga tili Beromain
2 Nde ô nji bi éfia é ne kalé wo, a môt, nyi ase ô ne, nge wo tyi’i môt ajô; amu éyoñe wo tyi’i môte mfe ajô, wo ve fe womiene mekua, amu jame wo tyi’i nye ajô wo fe wo bo de. 2 Bia yeme na Zambe a jô na, bôte be bili fulu ya bo avale mam éte ba yiane fonos, a ntyi’ane mejô Zambe wo wô’an a benya mejôô.
3 Ve, a môt, nge wo tyi’i ba be bili fulu ya bo avale mam éte ajô, womiene fe ô bo’o me, ye wo simesane na wo ye sa’ale ntyi’an ajô Zambe? 4 Nge na ye wo biasé abui mbamba nleme dé a mbiane nleme wé a ôjibi wé, amu ô nji yeme na Zambe a zene ya mbamba nleme wé, a jeñe na a dutu wo na ô kôñelane nlem? 5 Ve amu melo môé a amu ô ne te kôñelane nleme wôé, wo kôbane womien ayaa mfa’a ya môs ayaa a éyoñe ntyi’ane mejô Zambe ô ne zôsô wo ye yené. 6 A a ye ya’ane môt ase avale mimboone mié mi ne: 7 ényiñe ya nnôm éto asu bôte ba jeñe duma a ésemé, a nyul é se ngule ya boé a zene ya mbane ya jibi mfa’a ya mame me ne abeñ; 8 ve asu ba be bili nsisime mintañete a ba ba bo benya mejôô melo, ve be bo’o ékotekote mewôk, ba ye tôban ayaa a mbia ôlun. 9 Mbia be mam a minju’u bia ye bo be môt* ase a bo abé, ataté bejuif akui fe begrec; 10 ve duma, ésemé a mvo’é asu môt ase a bo mame me ne mvaé, ataté be bejuif a fe be begrec. 11 Amu Zambe a nji bo ôbangam.
12 Ve ba bese ba bo nseme teke atiñe ba ye fe wu teke atiñ, ve ba bese be nga bo nseme be too atiñe si ba ye fe tyi’ibane mejô a atiñ. 13 Amu sa ke ve bôte ba wô’ô metiñe mbe be ne zôsô mise me Zambe, ve bôte ba nyiñ avale metiñe me Zambe ma jô mbe ba ye bi mekabe na be ne zôsô. 14 Amu éyoñe bôte ya meyoñ, mbe bete be nji bi metiñe me Zambe, bebiene ba bo mame metiñe me Zambe ma jô, bôte bete akusa bo na be nji bi metiñe me Zambe, be ne atiñ asu dap bebien. 15 Bôte bete bebiene ba liti na metiñe me Zambe me ne ntilane minleme miap été, a na mone môte ya nleme wop a bo’olô a be a zene ya* asimesane dap na be kale nge ki na ba ku. 16 Jam éte da ye bobane môse Zambe, a zene ya Krist Yésus a ye tyi’i mejô ya mame bôte ba simesan asoé a bo, avale mbamba foé ma kat a jô.
17 E wo wo loobane na mone juif, ô too ndi a nkobe metiñ, ô too fe Zambe mebun. 18 A wo yeme nkômbane wé a ô ne fe ngule ya yemelane mame me ne nya mvaé, amu be nga ye’ele wo Metiñe me Moïse. 19 A wo yeme nleme wôé été na, ô ne nliti zen asu mindindim a éfufup asu bôte be ne dibi été. 20 Wo yeme fe na ô ne môt a komekane bôte be nji bi nya fe’e. A ñye’ele bone be bongô, ô bili éyeka’a ya ñyeman a ji ya benya mejôô be ne Metiñe me Moïse été. 21 Ve, wo wo ye’ele môte mfe, ye ô ne te ye’ele womien? E wo wo kañete na, “Te wup,” ye wo wup? 22 E wo wo jô na, “Te bo mejian,” ye wo bo mejian? E wo wo vini bengulemelan, ye wo wube biôme bi ne betemple été? 23 E wo wo bo éngelezek amu ô bili mbamba élat a Zambe, ye wo biasé nye éyoñe wo tyame Metiñe me Moïse? 24 Amu é ne ntilane na, “éyôlé Zambe ja woban ôsone meyoñ” amu mia.
25 Nya ajôô, ntyi’an atyel ô ne mfi fo’o ve nge wo bo mame nkobe metiñe wo jô, ve nge ô ne ntyame metiñ, ntyi’an atyele wôé ô ntoo ve ane ô ne te ntyi’an atyel. 26 Nde nge môt a ne te ntyi’an atyel a bo jam é ne zôsô, avale minjôane ya Metiñe me Moïse mia jô, to’o a ne te ntyi’an atyel a ye lañeban ane môt a ntoo ntyi’an atyel, sa nalé? 27 Éyoñe môt a ne te ntyi’an atyele mfa’a ya minsôn a tôñe mame Metiñe me Moïse ma jô, mboon ôte wo liti na ô bili mekua; wo ô ne ntyame metiñ, a too ke na ô bili nkobe metiñ ô ne ntilan, ô too fe ntyi’an atyel. 28 Nya mone juif a nji yené fo’o ve mfa’a ya nseñ, a ntyi’an atyele wé ô nji yené fo’o ve nyule jé. 29 Ve nya mone juif a ne nyu a ne juif nlem, a ntyi’an atyele wé ô ne wu ya nlem a zene ya mfufube nsisim, a sa ke a zene ya nkobe metiñ ô ne ntilan. Duma môt ate, da so be Zambe, sa ke be bone be bôt.