Mame minlôman

9 Ve Saul a mbe a jeñe’e a ngul ése na a tibili beyé’é be Tate a wôé be, ane a nga ke yene beta prêtre 2 a sili nye na a ve nye bekalate asu besynagogue ya Damas, ndemben a ne bo ngule ya ka’ate môt ase a ye koone na a ne môte ya Zen* a soo nye Jérusalem, befam ane binga.

3 Nté a mbe a kele’e zen, éyoñ a nga kui bebé Damas e teme na, beta éfufup a nga so yôp a bômane nye, 4 ane a nga ku tyia a wô’ô tyiñ é jô’ô nye na: “A Saul, a Saul, amu jé wo tibili ma?” 5 Ane a nga sili nye na: “A Tate, ô ne za?” A nga jô na: “Me ne Yésus, nnye ate wo tibili. 6 Ve, tebe’e tetele, ô ke tison, a wôé, ba ye kate wo jame wo yiane bo.” 7 Ve bôte be mbe be kele’e dulu a nye, be nji be ngule ya kobô, be nga wô’ô tyiñ, ve teke yene môt éziñ. 8 Ane Saul a nga kôlô si, mise mé me mbe me yoo ve a teke yene jôm. Ane be nga bi nye wo, a kee nye Damas. 9 A a nga tabe melu melal teke yene jôm, a teke di, nge nyu.

10 A ñyé’é éziñ a too jôé na Ananias a mbe Damas, a Tate a nga yené be nye a jô nye na: “Ananias!” A nga yalane na: “A Tate, ma nyi.” 11 Tate a nga jô nye na: “Kôlô’ô si, ô ke njoñe ba loone na, Tetele, a jeñe môt a ne jôé na Saul, môte ya Tarse, a ne nda Judas. Tame yen! A ye’elan, 12 a te bi ñyenan, môt a too jôé na Ananias, a za’a beté nye mo na a bo ngule ya beta yen.” 13 Ve Ananias a nga yalane na: “A Tate, me wô’ôya abui mame mfa’a môt ate, abui mam a nga bo na a tibili mimfufube miôé mi ne Jérusalem. 14 A nga zu va, a bili ôva’a ngule wo so be bejôô beprêtre na a bi* ba bese be ne beyé’é bôé.”* 15 Ve Tate a nga jô nye na: “Kelek! Amu môt ate nnye a ne ékpwelé me nga tobe na ja ye kañete meyoñ, bejô bôt a bone be Israël jôé dam. 16 Amu ma ye kôme liti nye abime minjuk a yiane tôbane de, amu jôé dam.”

17 Ane Ananias a nga suan a nyiine nda été, a a nga beté nye mo a jô’ô na: “A Saul, a mojañ, Tate Yésus a nga yené be wo njoñ éyoñ ô mbe ô za’a, a te lôme ma na ô bo ngule ya beta yen a bo njalan a mfufube nsisim.” 18 A été été, jôm éziñ é too ane bibase bi kos é nga kôlô nye mis, a a nga taté na a yen, ane a nga tebe a ke duban, 19 a a nga di a beta bi ngul.

A nga tabe bone melu a beyé’é ya Damas, 20 a été été a nga taté na a kañete ajô Yésus besynagogue, a jô’ô na Nyuli ate a ne Mona Zambe. 21 Ve bôte bese be mbe be vô’ôlô’ô nye be mbe fe’e ne vema, be jô’ô na: “Nga môte nyi nnye a mbe a tibili’i a njet ése bôte be mbe be lo’one jôé di Jérusalem? Nga a nga zu vana na a zu bi be a kee be,* be bejôô beprêtre?” 22 Ve Zambe a nga ve Saul ngule ya ke ôsu a kañete, a bejuif be mbe be nyiñi’i Damas be mbe menyu me yoo, amu Saul a mbe a kôme’e be liti na Krist nnye nyi.

23 Éyoñ abui melu é lôteya, bejuif be nga ke éso’o nsamba na ba zu wôé nye. 24 Ve fe’e be nga ke bôndé ésok é nga kui melo me Saul, be mbe be bole’e* nye mbé, alu a môse na be wôé nye. 25 Ane beyé’é bé be nga nyoñe nye alu alu a futi nye ékat été, a suu nye si, abé be nga tube nka’ale été.

26 Éyoñ a nga suane Jérusalem, a nga jeñe na a ke koone beyé’é bevok, ve bese be nga ko nye woñ, amu be nji be be buni’i na a ntoo ñyé’é. 27 Ane Barnabas a nga volô nye. A nga kee nye be minlôman a kañete mie aval avé, éyoñe Saul a mbe zen, a nga yene Tate a laan a nye. Barnabas a nga kate fe be avale Saul a nga kañete jôé Yésus teke ko woñe Damas. 28 A nga ke ôsu a tabe a be, a too fili ya ke a wulu* Jérusalem, a kañete’e jôé Tate teke ko woñ. 29 A mbe a kobô’ô, a sañetan a bejuif be mbe be kobô’ô Grec, ve be, be mbe be jeñe zene ya wôé nye. 30 Éyoñe bebuni bevo’o be nga yeme jam éte, be nga siliki nye Césarée a lôme nye Tarse.

31 Ane bikôane bekristene bise ya Judée, Galilée a Samarie bi nga nyiñe mvo’é été, a bi nga wône nsisim. Bi nga wulu woñe Yéhôva* été, a bi mvolane minlem a zene ya mfufube nsisim, ane tañe beyé’é é nga dañe nenenen.

32 Éyoñe Pierre a mbe a kele’e a wulu ngoto éte ése, a nga siliki fe a ke koone mimfufube mivo’o mi mbe mi too Lydda. 33 A nga koone môt a too jôé na Énée wôé, a mbe a bômbôya énoñe tañe mimbu muam, amu a mbe ñyemelan. 34 Pierre a nga jô nye na: “A Énée, Yésus Krist a saéya wo, tebe’e tetele a to’é énoñe jôé.” Ane a nga tebe tetele été été. 35 Éyoñe bôte bese be mbe be too Lydda a nje’ese ya Sharôn be nga yene nye, be nga kôñelane minlem a buni Tate.

36 Ñyé’é éziñ a mbe Joppé a too jôé na Tabitha, éyoñe ba kôñelan a tinane na, “Dorcas.”* A mbe a bo’o mbamba be mam a bo abui mimveane ya mvam. 37 Ve melu mete a nga kon a wu. Nde be nga mane wo’o nye a ke bôé nye étune nda é mbe nda ya yôp. 38 Amu Lydda a mbe bebé a Joppé, éyoñe beyé’é be nga wô’ô na Pierre a ne tison éte, be nga lôme bôte bebaé be nye, be ke ye’elane nye na: “Éngôngol, tame ji’a zu be bia.” 39 Éyoñe Pierre a nga wô’ô foé, a nga ke nsamba a be. Éyoñe Pierre a nga suan, be nga kee nye étune nda ya yôp. Nde minkuse mi binga mise mi nga zu vôm a mbe, mi yônô’ô a liti nye abui biyé* Dorcas a nga loé éyoñ a mbe a be. 40 Ane Pierre a nga kuli bôte bese nseñ a kute meboñe si, a taté na a ye’elan. Nde a nga kôñelane vôme mbim ô mbe a jô na: “A Tabitha, kôlô’ô si!” Ane a nga yoé mis a éyoñ a nga yene Pierre, a nga tabe tôtoo. 41 Ane a nga same wo, a bete nye si, a loone mimfufup a minkuse mi binga, ane bese be nga yene na Tabitha a vee. 42 Ane bôte bese ya Judée be nga yeme de, a abui ya be be é nga bo bebuni be Tate. 43 A nga tabe bone melu Joppé ba Simon, môt a mbe a kôme’e bikôp.*