Kalate Paul a nga tili Tite

2 Ve wo, kele’e ôsu a kobô mame ma wô’an a ñye’elan ô ne mfuban.* 2 Bôte be ntoo benya bôtô ba yiane jôé bebien, ba yiane bo éjijin, bôte be bili mbamba mfasan, ngule mbunan, ngule nye’an, be too fe mbane ya jibi. 3 Avale da fe, binga be ntoo benya bingaa ba yiane bi ntabane wo liti na ba semene Zambe, be bo teke bo ékobôkobô, nge bo alo meyok, ve binga ba ye’ele mfi ya bo mbamba be mam, 4 ndembene ba ye bo ngule ya lebe bengone be binga na be nye’e beyôme bap, be nye’e bone bap, 5 be bi mbamba mfasan, be bo éjijin, binga ba yeme saé menda map, ba be ne mbamba nlem. Minga ase a sili’i émiene si éjôé be nnôm, na bôte be bo teke kobô mejô me Zambe ébiasé.

6 Nalé fe, kele’e ôsu a lebe bendômane na be bi mbamba mfasan, 7 mfa’a ya mame mese, womiene wo yiane ve be éve’ela ya mbamba mboon ase. Wo yiane ye’ele bôte mame me ne mfuban* a éjijin ése, 8 ô bela’ane mbamba bifia, bi bi vo’o bo na bôte be wôk abé, na bôte ba wosane bia be wôk ôson, amu be nji bi fane ya lume bia mbia bifia. 9 Alo da yiane sili ébien éjôé bemasa bap si, da yiane ve be nleme mvaé, teke bo ôlangan, 10 teke wube be, ve be bo bôte be ne tabe be ndi mfa’a ya mame mese, nalé a ye bo na, ñye’elane Zambe, Nyii wongan ô yené abeñe mimfa’a mise.

11 Amu na beta mvame Zambe a nga yené, asu ya na bôte mevale mese be bi ényiñ. 12 Beta mvame Zambe ate a ye’ele bia na, bi bo teke biasé Zambe a na bi sa’ale mbia minkômbane ya si nyu, na fatan ényiñe jangan é liti na bi bili mbamba mfasan, na bi ne zôsô, a na bia bo Zambe ésaé a nlem ôse, nté bi ne émo* ya éyoñe ji, 13 bi yange’e éyoñe mbamba ndi nleme bi bili a ye tôéban, a éyoñe beta Zambe wongan, a Yésus Krist Nyii wongane ba ye yené étôtok été. 14 Krist a nga ve ényiñe jé asu dangane na, a kôté bia avale ntyamane metiñ ése, a na, a fubu ayoñe bôt é bo jôme jé émien, a na bôte bete be bo ayôñe mfa’a ya mbamba mimboon.

15 Kele’e ôsu a kate bôte mame mete, a lebe be,* a komekane be teke ko woñ. Te kañese na môt éziñ a biasé wo.