Nlitan Jean a nga yen

18 Mvuse mame mete, me nga yen éngele mfe a so’o yôp a sisi’i, a bili beta éjôé, a minkôkôé ya duma dé mi nga faé e si. 2 A a nga yôtane tyiñe yôbe na: “A kuya! Beta Babylone a kuya, a a ntoo étaba’a mbia minsisim* a afôla ba koone mvite minsisim ése a anon ése é ne mvit a di ba vini! 3 Amu woone ya ngule nkômbane* ya mvite mame ya bisô’ô* jé, meyoñe mese me nga be’e ayem, a bejô bôte ya si be nga bo mvite mame ya bisôk* a nye, a bebo makite* ya si be nga bo minkukum a zene ya abui biôm é ne dia minga ate a nga kôan, a a nji wôk ôsone ya kôane bie.”

4 A me nga wô’ô tyiñe fe é so’o yôp été é jô’ô na: “Kuané atane be nye a bôte bam, nge mi nji kômbô nyoñe ngabe minseme mié, a nge mi nji kômbô tôbane minjuk a yiane tôbane mie. 5 Amu minseme mié mi ne te alañé, a Zambe a ye tyik ajô dé amu mbia be mam* a nga bo. 6 Bela’ané nye aval a nga belane bôte bevok, ôwé, bula’ané nye mam a nga bo bôte bevo’o biyoñe bibaé; élaé a nga fulane bôte jôme ya nyu, fula’ané énjé biyoñe bibaé. 7 A nga dañe ve émiene duma a kôan étua abui akum, va’ané fe nye éndeñela’a a ñyôn avale da. Amu a ke ôsu a jô nleme wé été na: ‘Me too ane njô bôte minga, a me nji bo nkus, a teke môs éziñe ma ye bo éngôngol.’ 8 Jôme te nje minju’u mié mia ye so môse wua, awu, ñyôn a zaé, a ba ye di’i nye ne meññ a nduan, amu Yéhôva* Zambe a nga tyi’i nye ajô a ne ngul.

9 “A bejô bôte ya si be nga bo mvite mame ya bisôk* a nye a nyiñ ôsone ya abui akume dé, ba ye yôn a bibi bebien amu ôlune ba wôk ajô dé, éyoñe ba ye yen ôtita ô so’o vôm a dik. 10 Ba ye tebe ôyap analé, amu ba ko ésôbô’ô woñ, be jô’ô na: ‘Ngo’o beta tison éte, ngo’o nye, Babylone, éwôlô tison, amu awolo da da, ntyi’ane mejô wôé wo te kpwaan!’

11 “Avale te fe, bebo makite ya si ba yôn a wôk ôlun amu nye, amu teke fe môt a zu kuse makite map, 12 biôme bise bi ne a gôlôt, argent, meko’o me ne édima, beperle, nya ndomboo, éyé é ne ane évele, éyé é ne ébubut, éyé é ne évele ne zôññ; a jôm ése é ne nkôman a bilé bia nyume mvaé; a biôme bise bi ne nkôman a mimbañe mi zok, a bilé bi ne édima a mvot a étyé a marbre; 13 cannelle fe, bityita’a ya Inde, encens, mbon ô ne mbamba menyum, éfumulu mbon, woon, mbon olive, mbamba avut, blé, nyak, ntômba, bikabela, bewagon be bili minka minyin, alo a binyiñe* bi bôt. 14 Ôwé, mbamba bibuma ô mbe ô* yi’ik bi keya wo ôyap, a bidi bi ne mvaé bi li’iya wo a biôme bi ne mvaé bi nji beta bo be wo, a teke ngule ya beta yene bie môs éziñ.

15 “Bebo makite be mbe be kuan akume dap, a be nga mane fulu akum amu nye, ba ye tebe ôyap, amu ba ye ko ésôbô’ô woñ a ba ye yôn a wôk ôlun, 16 be jô’ô na: Ngo’o beta tison ate, ngo’o nye, Babylone éwôlô tison, nyi a mbe a be’e nya ndomboo a too évele a évele ne tyañ, a bili nyanga é too a gôlôt a meko’o me ne édima a beperle, 17 amu awolo da da, abui akume dé é nga mane ndaman!’

“A évet ése ya sitima, a nyu ase a nyiñe sitima, a nyu ase a saé été a ba bese ba nyiñe mañ, be tele ôbe nté 18 a éyoñe ba yen ôtita ô so’o vôm a dik, be nga yôtane be jô’ô na: “Tisone fé é ne ane beta tisone nyi?” 19 Ba ye sôé mbulu’u minlô miap, be yônô’ô, be too éyôé, be jô’ô na: “Ngo’o beta tison ate, ngo’o nye, éwôlô tison, vôm ate nnye bôte be bili besitima be mbe be fulu’u akum a zene ya abui akume dé, a awolo da da, é maneya ndaman!”

20 “Va’ak, amu jam é kuiya nye, a yôp, a mia fe mimfufup a minlôman a bekulu mejô, amu Zambe a veya ntyi’ane mejô wé mfa’a minga ate asu mfi wônan!”

21 A ngungul éngele ô nga bete akok é too ane beta ako’o ba ko’o nye bidi a wua nye mañ, a jô’ô na: “Avale di nde ba ye wua Babylone beta tison e si éyoñe jia jia, a a ye ke beta yené môs éziñ, 22 a ba ye ke beta wô’ô môs éziñe bôte ba yia bia be wo be bôme’e memvet, bebôme mezik, ba ba loñe mindiñ a ba ba loñe metoñ. Ba ye ke beta yene be wo, bôte ba lui biôme mevale meval a ba ye ke beta wôk éduñe ya ako’o ba ko’o de bidi be wo. 23 Éfufube ya lambe ja ye ke beta faé be wo, a ba ye ke beta wô’ô tyiñe môt a ne nlu’an be wo, nge tyiñe minga a ne nlu’an; amu bebo makite bôé be mbe beta be bôte ya si nyi, a a zene ya mboone mame ya évu wôé ô nga du’u meyoñe mese. 24 Ôwé, be nye be nga koone metyi bekulu mejô a ma mimfufup a ma me bôte bese be nga wôébane si.”