Kalate ôsu Paul a nga tili Becorinthien

12 Éyoñe ji a bobejañ, ma yi na mi tu’a kôme yem ajô ya mimveane ya nsisim. 2 Mia yeme na éyoñe mi mbe bôte ya meyoñ,* mi mbe mi tôñe’e bengulemelane be ne te kobô, a mi mbe mi kele’e mfa’a ôse ba kee mia. 3 Éyoñe ji, ma yi na mi yeme na, teke môt éziñ, éyoñ a kobô a ngule ya mfufube nsisim a ne jô na: “Yésus a be’e biyo’é!” A teke môt éziñ a ne jô na: “Yésus a ne Tate!” Nge sa ke a ngule ya mfufube nsisim.

4 Mimveane mi ne mevale meval, ve nsisim ô ne ve wuwua; 5 a bisaé ya volô bôt, bi ne mevale meval, ve Tate a ne ve wuwua; 6 a bisaé bi* ne mevale meval, ve Zambe wuwua nnye a bo bie be bôte bese. 7 Ve mvolane ya mfufube nsisim, wo kôme yené ne ngeññ be môt ase, a Zambe a ve wô asu mfi bôte bese. 8 Nsisim ôte, wo ve môte wua ngule ya kobô* a fek, a nsisim ôte wuwua, wo ve môte mbo’o ngule ya kobô mame bôte bevo’o be nji yem. 9 Nsisim ôte wuwua, wo ve môte mbo’o mbunan, ô va’a fe môte mbo’o ngule ya saé minkôkon. 10 Wo ve môte nyi ngule ya bo mesimba, ô va’a môte mbo’o ngule ya bo minkulane mejô, ô va’a môte mbo’o ngule ya yemelan, nge mame ma ma so be Zambe nge momo. Ô va’a môte mbo’o ngule ya kobô minkobô* mevale meval, a ô va’a môte mbo’o ngule ya yeme kôñelane minkobô. 11 Ve mame mete mese ma boban a zene ya nsisime wuwua, ñwô wo ve môt ase mimveane mite, fo’o ve avale wo yi.

12 Fo’o ve avale nyul é ne jia ve é bili abui bibu’a, a bibu’a bise ya nyul éte, bi kusa bo abui, bi ne nyule jia; nne ñhe Krist fe a ne nalé. 13 Amu to’o bi ne bejuif nge begrec, bi kusa bo bôte be ne alo nge fili, bia bese, a zene ya nsisime wua bi nga duban e nyule jé été a be nga nyuu bia bese nsisim ôte wua.

14 Nde fe nyul é nji bi ébu’a jia ve abui bibu’a. 15 Nge abo é nga ye jô na, “Amu me nji bo wo, me nji bo ébu’a ya nyul,” nalé a nji ke ye tinane na, a nji bo ébu’a ya nyul. 16 A nge alo é nga ye jô na, “Amu me nji bo dis, me nji bo ébu’a ya nyul,” nalé a nji ke ye tinane na a nji bo ébu’a ya nyul. 17 Nge nyul ése é mbe dis, alo é nga ye ke bembe vé? Nge nyul ése é mbe alo, jôé ki é nga ye ke bembe vé? 18 Ve Zambe a nga telé ébu’a ése ya nyule vôm a nga kômbô je telé.

19 Nge bese be nga ye bo ébu’a nyule jia, nyul ébien é nga ye ñhe bo vé? 20 Nya ajôô, be ne abui bibu’a, ve nyul é ne jijia. 21 Dis é vo’o jô wo na, “Ô nji volô ma jôm,” nge na, nlô ô vo’o jô mebo na, “Mi nji volô ma jôm.” 22 Ve bibu’a ya nyul, bia yené ve ane bia dañe nte’ane bi ne mfi, 23 a bibu’a ya nyule bia simesane na bi nji dañe mfi, bia ba’ale bie angôndô ya mvo’é aval é ne na, bibu’a bi nyule bi ne ôson, bia kôme bie na bi yené mvo’é. 24 Ve bibu’a bi nyule biangane bi ne mvo’é, bi nji sili na bi kôme bie, ve Zambe a nga kôme nyul, a ve bibu’a bi nyule bi nji bo mvo’é beta ésemé, 25 ndembene nkanda’ane mengam ô bo teke bo nyul, ve ébu’a ése é nyoñe ngap a ji vok. 26 Nge ébu’a jia ja wô’ô mintaé, bibu’a bise bivo’o bia wô’ô mintaé a je; nge ébu’a jia é bili duma, bibu’a bise bivo’o bia vak a je.

27 Éyoñe ji mi ne nyule Krist a môt ase ya be mia a ne ébu’a ya été. 28 A Zambe a nga tobe bibu’a ya ékôane bekristen, a ve be bisaé mevale meval: ba be ôsu, minlôman; ba be baa, bekulu mejô; ba be lale, beye’ele; ba bevok, ngule ya bo mesimba; ba bevok, ngule ya saé bôt; ba bevok, ngule ya volô bôte bevok; ba bevok, ngule ya wulu mam; ba bevok, ngule ya kobô minkobô mevale meval. 29 Sa ke bese mbe be ne minlôman, sa nalé? Sa ke bese mbe be ne bekulu mejô, sa nalé? Sa ke bese mbe be ne beye’ele, sa nalé? Ye bese mbe ba bo mesimba? 30 Ye bese mbe be bili mimveane ya saé bôt? Ye bese mbe ba kobô minkobô mevale meval? Sa ke bese mbe ba kôñelane minkobô,* sa nalé? 31 Ve kelané ôsu a jeñ a ngul ése* mimveane mia dañ anen. Ve ma zu liti mia zene ja dañ anen.