Nlitan Jean a nga yen

11 A nkaé be mbe be bela’ane wô ane ntume ba ve’e biôm ô nga vebane be ma, a tyiñ é nga jô ma na: “Tebe’e tetele ô ve’e temple* Zambe a autel a biôme bise ba belane bie na, be kañe Zambe été wôé. 2 Ve mfa’a ya nseñ, ô ne nka’ale ya temple été, jôké’é wô fefel a te ve’e wô, amu be nga ve wô meyoñ, a meyoñe ma ye tibi tison é ne étyi tañe bengone 42. 3 Ma ye bo na bengaa bam bebaé be kuli mejô, be be’e biyé minkuta tañe melu 1 260.” 4 Bengaa bete bebaé be ne ndeme ya bilé bi olive bibaé a bitelé belambe bibaé, a be tele ôsu be Tate ya si.

5 Nge môt éziñ a ye kômbô bo be mbia jam, nduane ja ye so menyu map a di’i besiñe bap. Nge môt éziñ a ye kômbô bo be mbia jam, avale te nde a yiane wu. 6 Bengaa bete bebaé be bili ngule ya dibe yôp* na mveñ é bo te noñe nté ba kuli mejô, a be bili ngule ya tyendé mendime na me bo metyi a ngule ya bo na, kane minjuk ése é kui si éyoñ ése ba yi.

7 Éyoñe ba ye mane nkañete wop, tit afane ja so édok ébé ja ye bo be bita, ja ye dañe be a wôé be. 8 Mimbime miap, mia ye bo beta njoñe ya beta tisone ba loone mfa’a ya nsisime na Sodome a Égypte, vôme Tate wop fe a nga tyebe élé. 9 A bôte mevale meval, a menda me bôt a minkobô,* a kane meyoñ ése ba ye fombô mimbime miap tañe melu melal a étun, a ba ye ke kañese na be futi mimbime miap soñ été. 10 A bôte be too si ba ye vak a bo abôk amu awu dap, a ba ye lômane mimvean, môt ase a lôme’e nyu mbok, amu bekulu mejô bete bebaé be nga ndeñele bôte be too si.

11 Mvuse melu melal a étun, nsisime ya ényiñe wo so be Zambe ô nga nyiine be be, a be nga tebe tetele, a beta woñ a nga bi ba be nga yene be. 12 A be nga wô’ô beta tyiñ a so’o yôp été a jô’ô be na: “Betané va.” Ane be nga bete yôp, nkut été, a besiñe bap be nga yene be.* 13 Awolo éte ébien, beta mfô’ôsane si a nga bo, éyoñe ba kabe tisone mengap awôm, ngabe jia ya été é nga mane tyamé; a bôte 7 000 be nga mane wu amu mfô’ôsane si, a ba bevo’o be nga ko woñ a ve Zambe ya yôbe duma.

14 Mbia jame baa a lôteya. Tame yen! Mbia jame lale a nga zu avôl avôl.

15 Éngele zangbwale a nga loñe toñe jé. A beta metyiñe be nga so yôp, be jô’ô na: “Éjôé ya si ése é ntoo Éjôé Tate wongan a Krist wé, a a ye jôé ane njôô nnôm éto a nnôm éto.”

16 A bemvendé 24 be mbe be too bito bi njôane biap ôsu be Zambe be nga buti mesu map si, a kañe Zambe, 17 be jô’ô na: “Bia ve wo akiba, a Yéhôva* Zambe, Nyu a bili ngul ése, nyu a ne a nyu a mbe, amu ô nga nyoñe beta ngule wôé a taté na wo jôé ane njô bôt. 18 Ve meyoñe me nga wôk ôlun, a ayaa dôé é nga so, a mbamba éyoñe ya tyi’i miñwuane mejô a nga kpwaan, a éyoñe ya ya’an alo dôé bekulu mejô a mimfufup a ba ba ko éyôlé jôé woñ, bone be bôt a beta be bôt, ndamane ba ba ndamane si.”*

19 A temple Zambe a ne yôp a nga yombô, a éwolo ya élat é mbe é yené’é e temple été, a befeleves a metyiñ a bezo’oyañ a mfô’ôsane si a meta’a be nga bo.