Kalate ôsu Jean a nga tili

1 Bia tili mia ajô ya môt a mbe atata’a, nyu bi nga wô’ô be kobô’ô ajô dé, bi nga yene nye a mise mangan, bi nga kôme fombô nye a nambe nye a mo mangan; bia tili mia a lat a mejô ya ényiñ; 2 (ôwé! Ényiñ é nga yené ne ngeññ, biabebiene bi nga yene je, bi nga bo’olô de, a kañete mia foé ya ényiñe ya nnôm éto é mbe be Ésa, nje éte é nga yené be bia ne ngeññ), 3 bia kañete mia mame bi nga yen a wôk, asu ya na mia fe mi zu bo Zambe ésaé* fufulu a bia. Nalé a ye bo na, bia bese bi ke lat a Ésa ba Mone wé Yésus Krist. 4 Bia tili mia mame mete asu ya na, minleme miangane mi bo njalan a mevak.

5 Bia kate mia foé bi nga wô’ô be nye na: Zambe a ne éfufup a teke atañe dibi éziñ é ne be nye. 6 Nge bia jô na: “Bia bo ésaé nsamba a nye,” bi kele’e ke ôsu a wulu dibi été, yeme na bia laane minsos, a bi nji tôñe benya mejôô. 7 Ve nge bia wulu éfufup été aval ane émien a ne éfufup été, yeme na, élat é ne zañe jangan a metyi me Mone wé Yésus ma sôp abé ése é ne bia menyul.

8 Nge bia jô na: “Nsem ô nji bo bia metyi,” bia du’u biabebien, a benya mejôô be nji bo be bia. 9 Zambe a yeme ba’ale élat; a ne fe zôsô, ajô te nde, nge bia meme mam abé mangan, a ye jamé bia a tune* minseme miangane mise. 10 Nge bia jô na: “Bi nji bo nsem éziñ,” yeme na bia jô na a ne nlaa minsos, nde fe benya mejôô be nji bo be bia.