Kalate ôsu Paul a nga tili Timothée

5 Te komekane nya môtô ébaé é fane asôñ. Ve jame da, ye’elane nye ane ésa, ba be ne bendôman ane bobenyoñ, 2 benya bingaa ane benyua, bengone be binga ane benyo bekal, mfubane nlem été.

3 Nyoñe’e ngap a* minkuse mi binga mi ne fo’o benya minkusu.* 4 Ve, nge nkuse minga ô bili bone nge bendaé, be taté’é liti na ba bo Zambe ésaé a nlem ôse nda jap, a na be ke ôsu a tuñulu bebiaé bap a bimvame biap, fo’o ve ane nge be bili be mvôla, amu nalé a ne mvaé mise me Zambe. 5 Ve minga a ne fo’o nya nkusu a ne azoé a futi ndi nleme jé be Zambe, a ne mbane ya bo meye’elane me nja’an a meye’elan alu a môs. 6 Ve nkuse minga wo nyiñe fo’o ve na, ô jalé minkômbane* mié ô ntoo ñwuan akusa bo ô ne vevee. 7 Ajô te, kele’e ôsu a ve melebe ma, ndembene be ne bo te bijô. 8 Amu nge môt éziñ a nyoñe ki ngap a miñyiane mi bôte bé, e dañedañe ba ba nyiñe nda jé, a kateya a mbunane wé, a môt a nji buni a ne mvo’é mise me Zambe a lôte nye.

9 Ba ye tili éyôlé nkuse minga nkobe biyôlé fo’o ve nge a mbili ataté mimbu 60 a nge a nga lu’u ve fame jia, 10 nge a bili fulu ya bo mbamba be mam, nge a nga yalé bon, nge a nga liti fulu anyep, nge a nga sôbe mebo mimfufup, nge a nga volô bôte be mbe be tele’e minjuk été, nge a nga ve émiene ngumba asu mbamba be mame bese.

11 Ve jame da, te tili biyôlé minkuse mi ne bengone nkobe biyôlé minkus, amu éyoñe minkômbane ya bisô’ô mia tebe zañe jap a Krist, ba kômbô ke aluk. 12 Ba ye bi mekua amu be nga li’i mbunane wop ya ôsusua.* 13 Nde fe, ba yé’é na be bo minleles, ba ke menda menda; ôwé, sa ve na be bo minleles, ve ba bo fe ékobôkobô, ba futi anyu éza mam, ba kobô mame be nji yiane kobô. 14 Nde ñhe ma yi na minkuse mi ne bengone mi ke aluk, mi biaé bon, mi nyoñe ngap a menda me bôte map, mi bo te ve môt a siñe bia fane ya kobô ésaé jangan abé. 15 Amu bevo’o be lumeya mbunane mvus a tôñe Satan. 16 Nge mbuni a ne minga a bili bivuvumane bi ne minkus, a nyoñe’e ngap a bie, ndembene ba ye bo te bo mbe’e asu ékôane bekristen. Éyoñ éte ékôane bekristene ja ye bo ngule ya volô minkuse mi ne fo’o benya minkusu.*

17 Bemvendé ba wulu ékôane bekristen avale da yiane ba yian ésemé biyoñe bibaé, e dañedañe ba ba saé abui mfa’a ya nkobô a ñye’elan. 18 Amu éfuse ya mintilane ja jô na, “Wo ye bo te tiñeti anyu nnôme nyak éyoñ a wulu mefese yôp a vaa bikô’ôla,” a na, “Mbo ésaé a yiane ma’ane mé.” 19 Te yebe njôane wo ve mvendé môte* bijô nge teke bebo’olô bebaé nge belale be ne bo’olô ajô éte. 20 Komeka’ane ba be bili fulu ya bo nsem, e mise me bôte bese, ndembene ba bevo’o ba ye tabe ntyel.* 21 Ma ve wo atiñe mise me Zambe, Krist Yésus a beéngele be ne ntobane na ô ba’ale mejô ma teke wu dise nge bo ôbangam.

22 Te ji’a beté môt éziñe mo;* nge nyoñe ngap a minseme mi bôte bevok; ba’ale’e womiene mfuban.

23 Te beta nyu fo’o ve mendim,* nya’a fe mone woon asu ôsañe wo bo wo mintaé a amu ô ne ntutuñ.

24 Minseme mi bôte béziñe mia ji’a kulan bôt été, a mi yiane mveane mekua, ve mi mi bôte bevok, mia su’ulane kulan éyoñ éyoñ é lôteya. 25 Avale te fe, mbamba be mame ba yené bôt été, a ma me ne aval afe, me vo’o tabe nsolan.