Kalate Paul a nga tili Beromain

10 A bobejañ, jame ma yi nleme wom été a jame ma bo de meye’elane me nja’ane mfa’a wop é ne fo’o na be nyiiban. 2 Amu mamiene ma bo’olô na be ne ayôñe mfa’a ya mame ya Zambe, ve sa ke avale nya ñyemane a ne. 3 A nya ajôô, amu be nji yeme zôsô Zambe, ve ba jeñe na be telé zôsô wop, be nji bo zôsô Zambe mewôk. 4 Amu Krist a ne memane ya Metiñe me Moïse, ndembene môt ase a liti na a bili mbunan a ne bi zôsô.

5 Amu Moïse a tili ajô ya zôsô a so a zene ya Metiñe me Moïse na: “Môt a bo mame ma a ye nyiñ a zene ya mame mete.” 6 Ve zôsô a so mbunan a jô na: “Te jô nleme wôé été na, ‘Za a ye bete yôp?’ Nalé ate a tinane na e sili Krist si, 7 nge ki na, ‘Za a ye sis édok ébé si?’ Nalé a tinane na e beta bete Krist miñwuan.” 8 Mejô me Zambe ma jô aya? “Foé Zambe é ne bebé a wo, é ne anyu dôé été a nleme wôé été”; nalé a tinane na, “foé” ya mbunane nje ñhe bia kañete. 9 Amu nge wo jô a anyu dôé bôt été na Yésus a ne Tate, a na wo buni nleme wôé été na Zambe a nga wômôlô nye miñwuan, wo ye bi ényiñ. 10 Amu a ne a nleme nye môt a liti a mimboone na a buni asu zôsô, ve a ne a anyu nye môt a kate bôte bevo’o mam a buni asu nyiian.

11 Amu éfuse ya mintilane ja jô na: “Môt ase a liti mbunane be nye a ye ke same.” 12 Amu nsela’ane a nji bo zañe mone juif a mone grec. Tate a jôé biôme bise a ne ve wuwua, nnye ate a ne akap* be ba bese ba loone nye. 13 Amu “nyu ase a loone jôé Yéhôva* a ye nyiiban.” 14 Ve, aval avé ba ye loone nye nge be nji buni nye? A aval avé ba ye buni môte be nji wô’ô be kobô’ô ajô dé? A aval avé ba ye wô’ô môt a kobô’ô ajô dé nge môt a nji kañete? 15 A aval avé ba ye kañete nge be nji lôme be? Fo’o ve aval é ne ntilane na: “Za aval abeñe mebo me bôte ba kañete mbamba foé ya mbamba be mame me ne!”

16 Ve jame da, bese be nji bo mbamba foé mewôk. Amu Ésaïe a jô na: “A Yéhôva,* za a buni mam a wô’ô me so’o be bia”?* 17 Nde mbunane wo so mame môt a wôk, a nge môt a wôk, a ne amu môt éziñ a kobô nye ajô Krist. 18 Ve me tame sili na, nga be nga kôme wôk? Nya ajôô, “tyiñe jap é nga wô’é si ése a bôte bese ya si be nga wô’ô foé be nga kañete.” 19 Ve me tame sili na, Israël a nga yeme de nga? Moïse a nga taté jô na: “Ma ye ndôñelô abane denan, be jôm é nji bo ayoñ; ma ye ndôñelô ayaa denan, be ayoñ é ne akut.” 20 Ve Ésaïe a nga bele jô na: “Bôte be nji be be jeñe’e ma, be nga yene ma, a ba be nji be be sili’i ma be nga yeme ma.” 21 Ve a nga jô mfa’a ya Israël na: “Ngumba nté môs, ma same mo mame be bôte be ne melo a minlem ayet.”