Mame minlôman

18 Mvuse ya valé, a nga kôlô Athènes a ke Corinthe. 2 E wôé, a nga yen Aquilas, a mbe mone juif bialé-bialé ya Pont, a mbe a ndeme so Italie, ba minga wé Priscille amu Claude a nga jô bejuif bese na be kôlô Rome. Nde Paul a nga ke be yen. 3 Amu be mbe be bili aval asu ésaé da, a nga tabe nda jap a saé a be amu be mbe be kôme’e menda bindelé. 4 Sabbat ase, Paul a mbe a bo’o nkañete ya mengana bôte* synagogue a dutu’u bejuif a begrec na be buni foé a kañete be.

5 Éyoñe Silas ba Timothée be nga kui Macédoine, Paul a nga ve éyoñe jé ése na a kañete, mfa’a ya liti bejuif na Yésus nnye a ne Krist. 6 Ve amu be mbe be kele’e ôsu a bene mam a mbe a jô’ô be, be kobô’ô fe nye abé, a nga samese biyé bié a jô be na: “Miabebiene mia ye be’e ayeme ya jam ése da ye kui mia. Ma, me ne mfuban. Ataté éyoñe ji, ma zu ke be bôte ya meyoñ.” 7 Nde a nga kui nseñ* a ke nda Titius Justus, môt ate a mbe a kañe’e Zambe, nda jé é mbe fefele synagogue. 8 Ve Crispus kaso ya synagogue a nga bo mbuni Tate, a bôte bese ya nda jé. A abui bôte ya Corinthe é nga wô’ô mbamba foé ate é nga bo bebuni a duban. 9 Nde fe, Paul a nga bi ñyenan alu, Tate a jô’ô nye na: “Te ko woñ, ve kele’e ôsu a kobô, te dip anyu, 10 amu me ne a wo, teke môt a ye nambe wo na a bo wo jôm é ne abé; me bili abui bôte tisone nyi.” 11 Nde a nga tabe valé tañe mbu wua a ngon ésaman, a ye’ele’e be mejô me Zambe.

12 Éyoñe Gallion a mbe ngovina* ya Achaïe, bejuif be nga kui tyiñe na ba zu bi Paul, nde be nga kee nye aba mejô, 13 be jô’ô na: “Môte nyu a dutu bôt, be kañe Zambe aval é nji lu’an a metiñe me ngovina.” 14 Ve éyoñe Paul a mbe a nga zu nyoñe nkobô, Gallion a nga jô bejuif na: “A bejuif, nge é too na môte nyu a te bo ékotekot éziñ nge mbia jam éziñ, éyoñe te nje me ne kôme tabe si, a nyoñ éyoñe ya vô’ôlô mia. 15 Ve nge a ne nsañeta’ane ajô bifia a biyôlé ya metiñe menan, miabebiene mia yiane kôm ajô éte, me nji kômbô kobô avale mam éte.” 16 Ane a nga daa be nseñ aba mejô. 17 Nde bese be nga bi Sosthène, kaso ya synagogue, a taté na ba bôme nye ôsu aba mejô. Ve Gallion a nji ve’ele nyoñe ngap a mame mete mese.

18 Ve a nga beta tabe valé abui melu, éyoñe te Paul a nga ya’ane bobejañ a bet éfunga na a ke Syrie, ba Priscille a Aquilas be mbe nsamba. A nga tyeñe nlô wé e Cenchrées, amu a nga tiñeti émien atiñ. 19 Be nga suan Éphèse, a nga li’i be valé, ve nye a nga nyiine synagogue a taté na a ye’ele bejuif. 20 Akusa bo be nga yemete nye na a tabe ayap a be, a nji kañese 21 a nga ya’ane be a jô’ô na: “Ma ye beta so be mia, nge Yéhôva* a kañese.” Ane a nga dañ éfunga a kôlô Éphèse 22 a nga siliki Césarée. Nde a nga bete* na a ke batan ékôane bekristen, éyoñe te a nga siliki Antioche.

23 Éyoñ a lôteya ôbe éyoñe valé, a nga kôlô a ke bevôme bevôme ya si ya Galatie a Phrygie, a kele’e a ve beyé’é bese ngule nyul.

24 Mone juif a too jôé na Apollos, bialé-bialé ya Alexandrie, a nga suan Éphèse, a mbe a yeme’e kobô, a yeme’e fe Mintilan. 25 Môt ate a nga yé’é mezene me Yéhôva* a zene ya mfufube nsisim, a mbe ayôñ a mbe a kobô’ô, a ye’ele’e mame mfa’a ya Yésus avale me ne, ve a mbe a yeme’e ve nduane Jean. 26 A nga taté na a kobô synagogue teke ko woñ, éyoñe Priscille ba Aquilas be nga vô’ôlô nye, be nga nyoñe nye a kôme tu’a timine nye mejô me Zambe vôm a nji be a kôme’e wôk. 27 Nde fe, amu a mbe a kômbô’ô ke Achaïe, bobejañe be nga tili beyé’é ya wôé kalate, be ye’elane be na be nyoñe nye mvo’é. Nde éyoñ a nga kui wôé, a nga volô nya abuii ba be nga bo bebuni a zene ya beta mvame Zambe. 28 Nde fe, a ngul ése bôt été a mbe a mane té mame mese bejuif be mbe be jô’ô si, a liti’i be a zene ya Mintilane na Yésus a ne Krist.