Mbamba foé Luc a nga tili
16 Ane a nga jô fe beyé’é na: “Nkukume môt éziñ ô mbe ô bili ntebele nda, ane be nga bo’olô nye ajô na a ndamane nye akum. 2 Nde a nga loone nye a jô na, ‘Ajô avé ma wô’ô be kobô’ô wo di? Mane’e bo sito’o ya biôme biame wo ba’ale, amu ô vo’o beta ke ôsu a ba’ale bie.’ 3 Ane ntebele nda a nga jô émiene na, ‘Nde ma zu bo aya? Me lôô masa wom a nga vaa ma ésaé ntebele akum, me nji dañe bo ngule na me ke saé mefup, a ma wôk ôsone ya ja’é. 4 Ah! Ma yeme jame ma zu bo, ndemben éyoñe ba zu vaa ma bisaé, bôte be bili masa moné ba ye nyoñe ma menda map.’ 5 Ane a nga loone môt ase a mbe a bili masa wé ékôla, a nga sili nyu ôsu na, ‘Ô bili masa wome tañ aya?’ 6 A nga yalane na, ‘Avek* mbon olive 100.’ A nga jô nye na, ‘Nyoñe’e kalate bia wo bi nga san, ô tabe si, ô ji’a tili na 50.’ 7 Mvuse ya valé a nga sili nyu mbo’o na, ‘Wo ki, ô bili masa wome tañ aya?’ A nga jô na, ‘Beta ôvek* blé 100.’ A nga jô nye na, ‘Nyoñe’e kalate bia wo bi nga san, ô tili na 80.’ 8 Ane masa mba’ale akum a nga se’e ntebele nda akusa bo a nga bo ékotekot, amu a nga liti na a ne fek;* ma kate mia de, amu bôte ya émo* ji be ne fek a dañe bôte be ne éfufup, mfa’a ya avale ba nyiñ a bôte bevok.
9 “Nde fe, ma kate mia na: Bo’ané bemvôé a zene ya akum é ne ékotekot, ndemben éyoñe da ye mane ba ye nyoñe mia bitaba’a ya nnôm éto. 10 Môt a yeme ba’ale élate mfa’a ya mame ma dañe tyôtyoé a yeme fe ba’ale élate mfa’a ya mame me ne abui, a môt a ne ékotekot e mame ma dañe tyôtyoé, a ne fe ékotekot e mame me ne abui. 11 Ajô te, nge mi nji yeme ba’ale élate mfa’a ya avale mia belan akum é ne ékotekot, za a ye ve mia nya akumu? 12 A nge mi nji yeme ba’ale élate mfa’a ya éza biôm, za a ye ve mia biôme bi ne émbienan? 13 Môt éziñ a vo’o bo ôlo ya bemasa bebaé, a ye vini wua a nye’e ke nyu mbok, nge ke na, a ye kabetane wua a biasé ke nyu mbok. Mi vo’o bo alo Zambe a alo akum.”*
14 Bepharisien, mbe bete be mbe be nye’e moné, be mbe be wô’ô mame mete mese, a be nga taté na ba kpwe’ele nye. 15 Nde a nga jô be na: “Mi ne ba ba jô bebiene mise me bôte na mi bili mekabe na mi ne zôsô, ve Zambe a yeme minleme mienan. Amu jame bôte ba yene na da dañe mfi é ne jôm é ne angôndô mise me Zambe.
16 “Metiñe me Moïse a mejô bekulu mejô me nga too azukui melu me Jean. Ataté éyoñ éte mbamba foé ya Éjôé Zambe a kateban, a avale môt ése da ve ngule ya bi nye. 17 Teke vaa nge beté, é ne tyi’ibi na yôp a si bi lôt a dañe na mon ékanga wua ya Metiñe me Moïse a bo teke tôéban.
18 “Môt ase a tyam aluk a minga wé a beta ke lu’u minga mfe a bo mejian, a môt a lu’u minga a tyameya aluk a nnôm a bo mejian.
19 “Nkukume môt éziñ ô mbe valé, ô mbe ô jaék biyé bi ne dia, a mbe a bu’ubane mfañ ényiñe môs ane môs. 20 Ve môt éziñ a mbe a bo’o zak a too jôé na Lazare; be mbe be bili fulu ya zu bôé nye anyiine mbé dé, mefôle me mbe nye nyul ése. 21 A a mbe a kômbô’ô di menyume bidi me mbe me kpwa’a si tebele nkukume môt. Yaa, to’o bemvu be mbe be za’a nyiane mefôle mé. 22 Mvus abim éyoñ éziñ, nde môt a mbe a bo’o zak a nga wu, ane beéngele be nga zu be’e nye a kee nye fefel* Abraham.
“Nkukume môte fe ô nga wu a be nga jame nye. 23 A too Soñ* été, a nga bete mis a wô’ô mintaé, ane a nga yen Abraham ôyap, a Lazare a tele nye fefel.* 24 Nde a nga loon a jô na, ‘Ésa, Abraham, mvama’ane ma a lôme Lazare a ke dube sôso’o ônyui jé mendim a ve ma ôyem évôvoé, amu me bili nju’u beta nkaba’a nduane nyi été.’ 25 Ve Abraham a nga jô na, ‘A mon, te vuane na ô nga bu’ubane mbamba be mam éyoñ ô mbe ô nyiñi’ik, Lazare ki a nga tôban abui minjuk. Ve éyoñe ji a mbili mvolane nleme va, wo ki ô ne minjuk été. 26 A nge ô vaa mame mete mese, beta yee a ne zañe bia be mia aval é ne na, bôte ba kômbô kôlô va na ba zu be mia be vo’o de bo, a bôte be ne wôé be vo’o zu be bia.’ 27 Ane a nga jô na, ‘Amu nalé, ma ye’elane wo ésa, lôme’e nye nda ésa wom, 28 amu me bili bobenyañe betan, ndemben a ke ve be abendé na be fe be bo teke zu vôm a ne ésôbô’ô nyi.’ 29 Ve Abraham a nga jô na, ‘Be bili mintilane mi Moïse a mejô bekulu mejô; be tame wô’ô me.’ 30 Ane a nga jô na, ‘Ésa Abraham, ba ye ke wôk! Ve nge môt a so miñwuane nné a ke be be, wôna ba ye kôñelane minlem.’ 31 Ve a nga jô nye na, ‘Nge be nji wô’ô mintilane mi Moïse a bekulu mejô, to’o môt a wômô miñwuan, ba ye ke wô’ô nye.’”