Mbamba foé Luc a nga tili
15 A nga bo na, benyoñe toya bese a bebo minseme be nga mane tôkane vôm a mbe na ba vô’ôlô nye. 2 Bepharisien a bescribe be mbe be jô’ô menyiñe na: “Môte nyi a nyoñe bebo minseme mvo’é a di fe a be.” 3 Nde a nga nyoñe be éve’ane ji a jô’ô na: 4 “Môte mbé ya be mia, a bili mintômba 100 nge wua ya été wo jañ a ye ke li’i mintômba 99 nkôte si a ke jeñe wua ô nga jañ akekui a yene wô? 5 A éyoñ a yeneya wô, a beté wô bitule bié a vak. 6 Éyoñ a suane nda jé a loone bemvôé bé a bôte ba be be be too a jô be na, ‘Za’a va’ané a ma, amu me yeneya ntômba wom ô nga jañ.’ 7 Ma kate mia na, avale da da, meva’a ma ye dañe bo yôp été asu mbo minseme wua a kôñelane nlem, a lôte bezôsô be bôte 99 be nji bi amu ya kôñelane minlem.
8 “Nge ke na, minga mbé nge a bili minsañe bedrachme* awôm, nge a jañele drachme* wua, a ye ke bo’é lambe a vose nda jé a kôme jeñ, akekui a yene wô? 9 A éyoñ a yeneya wô, a loone bemvôé bé a bôte ba be nye be too a jô’ô na, ‘Za’a va’ané a ma, amu me yeneya nsañe drachme ô nga jañ.’ 10 Avale da da ma kate mia na, beéngele be Zambe ba va’a asu mbo minseme wua a kôñelane nlem.”
11 Ane a nga jô na: “Môt a mbe a bili bobefame bebaé. 12 A nyu a mbe mongô a nga jô ésa na, ‘A ésa wom, va’a ma akap éli’i dam.’ Nde a nga kap akume dé a ve môt ase ngabe jé. 13 Mvuse bone melu, nyu a mbe mongô a nga tôkan akume dé ése a ke si é mbe ôyap, a nga ndaman akume dé a mbia ényiñ* a mbe a nyiñi’ik. 14 Éyoñ a nga mane ndamane biôme bié bise, mbia zaé ve kui si éte, ane a nga bo azoé. 15 A nga bele ke kabetane bialé-bialé ya si éte, nnye a nga lôme nye afane dé été na a ke ba’ale bengôé bé. 16 A nga wôk avale zaé é ne na, a nga kômbô di bidi bengôé be mbe be ja’ak, ve teke môt a nga ve nye jôm.
17 “Éyoñ a nga beta taté na a fase mvo’é, ane a nga jô émiene na, ‘Ésa wom a bili abui bebo bisaé be bili bidi ne vôô nat, me ke me wo’o zaé va! 18 Ma ye tebe tetele a ke be ésa wom a jô nye na: “A ésa wom, me boya abé mise me Zambe ya yôp, a mise môé. 19 Me nji yiane beta loobane na mone wôé. Nyoñe’e ma ane mbo ésaé wôé.”’ 20 Nde a nga tebe a ke be ésa wé. A ngenan a za’a ôyap, nde ésa a nga yene nye a ko nye éngôngol a a nga ke mbil a ke wubane nye.* 21 Nde mona fam a nga jô nye na, ‘A pa, me boya abé mise me Zambe ya yôp a mise môé. Me nji yiane beta loobane na mone wôé.’ 22 Ve ésa a nga jô bebo bisaé bé na, ‘Avôl! Nyoñané éyé, ji ja dañ abeñ a jalé nye je, a jalé nye élondo wo, a jalé nye besilefase minkole mebo. 23 Za’ané fe mone nyak a dañ avoñ, mi wôé, bi di a bo abôk. 24 Amu mone wome nyi a mbe ñwuan, ve a beteya bi ényiñ. A mbe njañan, a a beteya yené.’ Ane be nga taté abôk.
25 “A ntôle mone wé ô mbe afup, a éyoñ a nga bulan a kui bebé nda, a nga wô’ô bôte be bôme’e mezik, be jeme’e fe. 26 Nde a nga loone mbo ésaé wua a sili nye na, ‘Jé ja lôt?’ 27 A nga jô nye na, ‘Monyoñ a soya, a ésa wôé a te tyi’i mone nyak a ne avoñ amu a te so mvo’é.’* 28 Ve a nga wôk ôlun a bene nyiine nda été. Ane ésa wé a nga zu koone nye nseñ a taté na a ye’elane nye. 29 A nga jô ésa na, ‘Tame yen! Mimbu mina mise ma te saane wo ane ôlo a me nji bo wo melo môs éziñ, ve teke môs éziñ ô nga ve ma to’o ve mon ékela na bia bemvôé bame bi bo abôk. 30 Ve nné ane mone wôé nyi a te so, nyu a nga mane ke ndaman* akume dôé a binga bijabô, wo te bele tyi’i nye mone nyak a ne avoñ.’ 31 Ane a nga jô nye na, ‘A mone wom, nté ôse wu ô jaéya tabe a ma, a biôme biame bise bi ne émbiôé. 32 Ve bia yiane fo’o bo abôk a vak, amu monyañe wôé a nga wu a beteya bi ényiñ, a nga jañ a beteya yené.’”