Kalate Paul a nga tili Behébreu
4 Ajô te, amu ngaka’a ya nyiin awo’one dé é ngenan, ntaba’ané ntyel,* môt éziñe ya be mia a za jañele fan éte. 2 Amu bia fe bi nga wô’ô mbamba foé be nga kañete bia fo’o ve ane be fe be nga wô’ô nye, ve mejô be nga wô’ô me nji bo be mfi, amu be nji ke lat a zene ya mbunan a ba be nga vô’ôlô. 3 Amu bia bia liti na bi bili mbunan, bia nyiin awo’on été, fo’o ve aval a nga jô na: “Ajô te me nga kane ngana ôlune wom été, ‘Ba ye ke nyiin awo’one dam,’” akusa bo bisaé bié bi nga man éyoñe bone be nga taté na ba bialé si. 4 Amu vôm éziñ a jô mfa’a ya môse zangbwale na: “A Zambe a nga wo’one bisaé bise a nga bo môse zangbwale,” 5 a vôma nyi a beta jô na: “Ba ye ke nyiin awo’one dam.”
6 Ajô te, amu bi bili bôte béziñe be ngenane be bili fane ya nyiin été, a ba mbamba foé a nga taté katebane be nji ke nyiin amu melo, 7 a nga beta kobô ajô ya môs ôfe éyoñ a nga jô ôbe nté e same David na “Môse wu”; fo’o ve aval é nga taté jôbane yôp, “Den, nge mia wô’ô tyiñe jé, te boané na minleme mienane mi bo ayet.” 8 Amu nge Josué a nga kee be e vôme ya wo’on, Zambe a nji ke ye beta kobô ajô môs ôfe mvuse ya valé. 9 Nde sabbat ya awo’on a ngenan asu bôte be Zambe. 10 Amu môt a nyiineya awo’one Zambe, a wo’oneya fe mimboone mié émien, fo’o ve avale Zambe a nga wo’one mimboone mié émien.
11 Njeñané a ngul ése na bi nyiin awo’on éte, ndembene môt éziñ a ne bo te vu kane éve’ela melo be nga bo. 12 Amu mejô me Zambe me ne vevee a ngul a me ne akap a dañe nkpwaté mekôn ôse ô bili meyo mebaé, ma tup akekui ma liti avale môt a ne été wôé* a avale môt a ne atan.* Ma kandé bibôña’a a foñe bives, a me ne ngule ya yemelan asimesan a minsôñane ya nlem. 13 A teke ététéa éziñ é solô mise mé, ve biôme bise bi ne nsoé a bia yené ne ngeññ e mise me nyu bia ye ke yalane mame mese bi nga bo.
14 Ajô te, mbôle bi bili beta prêtre, nnye ate a nga ke yôp, Yésus Mona Zambe, nkômané bi ésaé bia bo nye bôt été. 15 Amu bi nji bi beta prêtre a se ngule ya tebe été jangan a wôk ate’e dangan, ve bi bili nyu a nga tebe meve’ele mimfa’a mise ane bia, ve a nji bo nsem. 16 Ajô te, nsuba’ané ñhe éto njôane ya beta mvame bebé, teke ko woñe ya kobô, ndembene bi ne bi mvam a yene beta mvam a ye volô bia mbamba éyoñ.