Mbamba foé Jean a nga tili

17 Yésus a nga kobô mame ma, ane a nga bete mise mé yôp, a jô na: “A Ésa wom, awolo é kpwaaneya, va’a mone wôé duma, ndembene mone wôé a ne ve wo duma, 2 fo’o ve aval ô nga ve nye ngule ya jôé nsôn ôse,* ndemben a ne ve ba bese ô nga ve nye, ényiñe ya nnôm éto. 3 Bôte ba ye bi ényiñe ya nnôm éto ba yiane yé’é yeme wo, wo étam ô ne nya Zambee, ba yiane fe yé’é yeme nyu ô nga lôm, Yésus Krist. 4 Me nga ve wo duma dôé si, me maneya ésaé ô nga ve ma na me bo. 5 Nde éyoñe ji, a Ésa wom, va’a ma duma me mbe me bili e fefele jôé ôsusua na bone ba taté na ba bialé si.

6 “Me boya na bôt ô nga ve ma si nyu be yem éyôlé jôé. Be mbe émbôé a ô nga ve ma be, a be nga tôñe mejô môé.* 7 Éyoñe ji be nga yeme na, biôme bise ô nga ve ma bia so be wo. 8 Amu me nga ve be mejô ô nga ve ma, a be nga kañese me a kôme yeme na me nga so éjiane jôé, a be nga buni na ô nga lôme ma. 9 Ma ye’elan asu dap; ma ye’elan, sa ke asu si nyu, ve asu ba ô nga ve ma, amu be ne émbôé; 10 a biôm biam bise bi ne émbiôé, a émbiôé bi ne émbiam, a be nga ve ma duma.

11 “Me nji beta bo si nyu, ve be ne si nyu, a me nga zu be wo. A mfufup Ésa, ba’ale’e be amu éyôlé jôé, nje éte ô nga ve ma, ndembene be ne bo jôme jia,* avale bia wo bi ne jôme jia.* 12 Éyoñe me mbe a be me nga jaé ba’ale be amu éyolé jôé, nje éte ô nga ve ma, a me nga kamane be, a teke wua ya be be a nga jañ, nge ô vaa ve mone ya njañan, ndembene mintilane mi ne tôéban. 13 Ve éyoñe ji, me nga zu be wo, a ma kobô mame ma si nyu, ndembene be ne kôme wô’ôtan ava’a me bili. 14 Me nga ve be mejô môé, ve si nyu é nga vini be, amu be nji nyoñe ngap a mame ya si nyu, avale fe me nji nyoñe ngap a mame ya si nyu.

15 “Me nji sili wo na ô vaa be si nyu, ve na ô ba’ale be amu mbia môt.* 16 Be nji nyoñe ngap a mame ya si nyu avale fe me nji nyoñe ngap a mame ya si nyu. 17 Fubu’u be* a zene ya benya mejôô; mejô môé me ne benya mejôô. 18 Fo’o ve aval ô nga lôme ma si nyu, ma fe ma lôme be si nyu. 19 A ma fubu mamien asu dap, ndembene be ne bo mfuban a zene ya benya mejôô.

20 “Ma ye’elan, sa ke ve asu be étam, ve asu nyu ase a buni ma éyoñ a vô’ôlôya miñye’elane miap, 21 ndembene bese be ne bo jôme jia, aval ane wo, Ésa wom, ô ne jôme jia a ma, a me ne jôme jia a wo, nde be fe be ne bo jôme jia a bia, ndembene si nyu é ne buni na ô nga lôme ma. 22 Me nga semene be avale fe ô nga semene ma, ndembene be ne bo jôme jia fo’o ve avale bia wo bi ne jôme jia. 23 Me ne jôme jia a be, a ô ne jôme jia a ma, nde be ne bo ngumba mfa’a ya bo jôme jia,* ndembene si nyu é ne yeme na ô nga lôme ma, a na ô nga nye’e be avale fe ô nga nye’e ma. 24 A Ésa wom, ma yi na bôt ô nga lôme ma be tabe a ma vôme me ne, ndembene be ne yene duma dam ô nga ve ma, amu ô nga nye’e ma ôsusua na bone ba taté na ba bialé si. 25 A Ésa wom a ne zôsô, é ne été na si nyu é nji yeme wo, ve ma yeme wo, a bôte ba ba yeme na ô nga lôme ma. 26 Me nga bo na be yem éyôlé jôé, a ma ye bo na be yeme je, ndembene nye’an ô nga nye’e ma ô ke be be a me bo jôme jia a be.