Kalate Jacques a nga tili
5 Éyoñe ji, vô’ôlané a minkukume mi bôt, tatané a yônané amu mbia biyoñe bia zu be mia. 2 Akume denan é ntoo ñwuane ntuk, a biyé bienane bi maneya diban a si’ibem. 3 Gôlôt wônan a argent be ntoo miengele, a miengele wop a ye ve mia mekua a a ye di minsône mienan. Biôme mi nga mane kôane bia ye bo ane nduane melu ya asu’ulan. 4 Tama yenan! Ma’ane bebo bisaé be nga saé mefube menane be nji bi, me ngenane me kele’e ôsu a yôn, a miñyône mi bôte be nga saé mefube menane mi kuiya melo me Yéhôva* ya minsamba mewosan. 5 Mi nga nyiñe mefok ényiñ été si va a mi nga vôman. Mi nga di a bo menen, fo’o ve ane mon ényaka asu môse ba ye tyi’i nye tyiñ. 6 Mi nga ve mekua; mi nga wôé nyu a ne zôsô. Ye a nji tebe mia ngame yat?
7 A bobejañ, bo’ané ñhe ôjibi akekui Tate a ye bo a ntoo valé.* Tama yenan! Mbé mefup a ke ôsu a yange mbamba bibuma ya afup, a jibi akekui mveñ ôsu ya mbu ja noñ a mveñe ja su’ulane noñe mbu. 8 Mia fe kelané ôsu a jibi, bo’ané na minleme mienane mi bo ngul, amu éyoñe Tate wongan a ye bo a ntoo valé* é ntoo bebé.
9 Môt éziñ a bo’o te kobô nyu mbo’o menyiñ* a bobejañ, ndembene mi ne bo teke bi mekua. Tama yenan! Ntyi’i mejô a ntele ñhe mbé yôp. 10 A bobejañ, mfa’a ya jibi minjuk a bo ôjibi, nyoñané éve’ela be bekulu mejô be nga kobô e jôé Yéhôva.* 11 Tama yenan! Bia jô na, bôte be nga bo mbane ya jibi be ne mevak.* Mi nga wô’ô be kobô’ô ajô ya mbane ya jibi Job, a mi nga yen avale Yéhôva* a nga botane nye, a mi nga yene na Yéhôva* a wô’ô bôte mintaé nya abuii, a mvamane fe be.
12 Jame da dañ a bobejañ, te beta kanané ngana mi nyoñe’e yôbe ngaa nge si, nge jôm éziñ éfe. Ve “Ôwé” wônan a tina’ane na ôwé a “Teké’é” wônan a bo’o ve teké’é, ndembene mia ye bo teke nyoñe mekua.
13 Ye môt éziñe ya be mia a tôbane ngule meve’ele? A ye’ela’an. Ye môt éziñ a wô’ô nlem avak? A yi’a ñhe besam. 14 Ye môt éziñ a kon e zañe jenan? A loone bemvendé ya ékôane bekristen,* a ba ye ye’elan asu dé, be wo’o nye mbon e jôé Yéhôva.* 15 A meye’elane ba bo a mbunan ôse ma ye bo na nyu a kon* a bo mvo’é, a Yéhôva* a ye bete nye. Nde fe, nge a nga bo minsem, a ye bi njamane ya minseme mié.
16 Ajô te, môt ase a meme’e minseme mié be môte mbok, a môt ase a ye’elan asu nyu mbok, ndembene mi ne bo mvo’é. Meye’elane me nja’ane me zôsôa môte me ne ngul* a me ne fo’o volô bôt. 17 Élie a mbe môt a mbe a wô’ôtan ane bia, ve éyoñ a nga ye’elan a nlem ôse na te mveñe ja noñ, mveñ é nji noñe tañe mimbu milal a ngon ésaman. 18 Ane a nga beta ye’elan, nde mveñ é nga tyi’i yôp a si é nga taté na je ve bibuma.
19 A bobejañ, nge môt éziñe ya be mia a ke ôyap a benya mejôô, a nyu mbok a kele nye nyoñ, 20 yemané na, môt ase a bo na mbo nsem a kôlô ékobe jé, a zen éte, a ye nyii nye* mfa’a ya awu a a ye buti abui minsem.