Mame minlôman

6 A nga bo na, melu mete, éyoñe tañe beyé’é é nga bet, ane bejuif be mbe be kobô’ô Grec be nga taté na ba kobô bejuif be mbe be kobô’ô Hébreu menyiñ, amu be nji be be nyoñe’e minkuse miap ngap éyoñe ba kabe bidi ya môs. 2 Nde minlôman Awôm a mibaé mi nga tôkane beyé’é bese vôma wua a jô na: “É nji bo mvo’é* na, bi jô’é mejô me Zambe na bi kabe bôte bidi e betebele. 3 Nde a bobejañ, miabebiene tobané befame zangbwal be bili mbamba ntaban* ézezañe jenan, njalan a mfufube nsisim a fek, na bi telé be na mbe be bo ésaé ji; 4 ve bia bia ye ke ôsu a ye’elane Zambe a ye’ele mejô mé.” 5 A nsamba bôt ôse ô nga nye’e jame be nga jô, ane be nga top Étienne, môt a mbe njalan a mbunan a mfufube nsisim a Philippe a Prochore, Nicanor, Timôn, Parménas a Nicolas, mone prosélyte ya Antioche. 6 Be nga kee be be minlôman a éyoñe mi maneya ye’elan, mi nga beté be mo.

7 Nde mejô me Zambe me nga ke ôsu a mialan, ane tañe beyé’é é nga ke ôsu a nenenen abui e Jérusalem, a abui beprêtre é nga bo bebuni.

8 A Étienne, môte Zambe a nga yene mvaé, a ve fe nye beta ngul, a mbe a bo’o beta bitua bi mam a mesimba ézezañe bôt. 9 Ve bôte béziñe be mbe be so’o angôse ba loone na Synagogue ya bôte be ntoo fili, be nga so a bôte ya Cyrène, ba ya Alexandrie a ba ya Cilicie a Asie na, ba zu dôngan a Étienne. 10 Ve be nji kui na be ve’an a nye amu a mbe a dañe be fek, a mfufube nsisim a mbe a kate’e nye mam a yiane jô. 11 Nde be nga ke yene bôt asoé be jô’ô na: “Bi nga wô’ô nye a kobô’ô Moïse ba Zambe ébiasé.” 12 Be nga bo na bôt, bemvendé, a bescribe, be wô’ô nye ôlun a so atemetem ane be nga bi nye a ngul a kee nye Sanhédrin.* 13 Ane be nga kee bebo’olô be ne minsos, mbe be nga jô na: “Môte nyu a ke ôsu a kobô vôm ane étyi nyina ébiasé, a kobô fe Metiñe me Moïse ébiasé. 14 Éve’an é ne na, bi nga wô’ô nye a jô’ô na, Yésus ya Nazareth nyi a ye mane tyame vôma nyu a tyendé metume Moïse a nga li’i bia.”

15 A bôte bese be mbe be too Sanhédrin be nga fombô nye, a be nga yen asu dé é too ane asu éngele.