Mame minlôman
5 Ve môt éziñ a mbe jôé na Ananias ba minga wé Saphira be nga kuane si jap. 2 A nga kandé asoé abime moné a nga kuane de si, a minga wé a mbe a yeme’e nalé, abim é nga bu’u a nga ke de ve minlôman. 3 Ve Pierre a nga jô na: “Ananias, amu jé Satan a te tindi wo na ô laane mfufube nsisime minsos a solé abime moné éziñe ya si wo te kuan? 4 Ôsusua na wo kuane je, nga si éte é mbe énjôé? A éyoñ ô maneya kuane je nga moné ate a too énwôé? Amu jé wo te simesan avale mbia jam éte nleme wôé? Sa ke bôte mbe ñhe wo te laane minsos, ve Zambe.” 5 Nné ane a nga wô’ô mejô mete, Ananias a nga ku tyia a wu. A beta woñ a nga bi bôte bese be nga wôk ajô éte. 6 Ane bendômane be nga so a vuluku nye biyé été a be’e nye a ke jame nye.
7 Nde mvuse jôm ane mewolo melal, minga wé a nga nyiine teke yeme jame da te boban. 8 Pierre a nga jô nye na: “Kate’e ma, ye tañe nyi nje mia bebaé mia te kuane si?” A nga jô na: “Ôwé, tañ éte fo’o.” 9 Nde Pierre a nga jô nye na: “Amu jé mia bebaé mia te kui tyiñe na mia zu du’u nsisime Yéhôva?* Tame yen! Bôte ba te ke jame nyo nnôme be tele mbé a ba zu be’e wo.” 10 Été été a nga ku tyia a wu. Éyoñe bendômane be nga nyiine be nga koone na a bôô mbim, ane be nga be’e nye a ke jame nye fefele nnôme wé. 11 Nde beta woñ a nga bi ékôane bekristen* ése, a bôte bese be nga wô’ô mame mete.
12 Nde fe minlômane mi nga ke ôsu a bo abui mesimba a bitua bi mam ézezañe bôt; a bese be mbe be tôka’ane mbala’a si Salomon. 13 Nya ajôô, bôte befe be nga ko woñe ya nyiine nsamba wop, ve bôt be mbe be va’a be duma. 14 Nde fe na, bebuni be Tate be nga ke ôsu a kô’ôlan, be nga dañe bo abui, befam ane binga. 15 Be nga zuu minkôkone beta minjoñ a bôé mie e bone binoñ a fe binoñe bi ôkon na éyoñe Pierre a ye lôte valé, ndô’ôtô nsisiñe wé ô ne kui e vôme be ne a saé be. 16 Nde fe bôte ya bitisone bi ne fefele Jérusalem be nga so be be’e minkôkon a bôte mbia minsisime mi mbe mi ndeñele’e a bese be nga mane bo mvo’é.
17 Ve beta prêtre a nga suan a bôte bese be mbe a nye, mbe bete be mbe bôte ba tôñe miñye’elane besadducéen, ane éviele é nga jaé be nlem. 18 Ane be nga bi minlôman a futi mie nda mimbôk. 19 Ve alu, éngele Yéhôva* a nga yoé mimbé ya nda mimbôk, a kuli minlôman atan a jô na: 20 “Kelané e Temple mi ke ôsu a kobô bôt ajô ya mbamba foé a fombô ényiñe ji.” 21 Éyoñe be nga wô’ô jame di, be nga nyiine Temple ndibe tyé, a taté na ba ye’ele.
Nde éyoñe beta prêtre a bôte be mbe a nye be nga suan, be nga loone Sanhédrin* ase a nsamba bemvendé ôse ya bone be Israël, ane be nga lôme bezimbi nda mimbô’ô na be ke nyoñe minlôman, be zuu mie vôme be mbe. 22 Ve éyoñe bivete bezimbi bi nga kui valé, bi nji koone be, nde bi nga bulan a kate be avale bia te koone mam, 23 bi jô’ô na: “Bia te koone nda mimbô’ô mvo’é mvo’é, é too nya mfetane a beba’ale mimbô’ô be tele mimbé, ve éyoñe bia te yoé je, bi nji koone môt été wôé.” 24 Nde éyoñ évete ya Temple a bejôô beprêtre be nga wô’ô mejô mete, be mbe fe’e ne vema, be sili’i na jam éte da ye man aya. 25 Ve môt éziñ a nga so a zu kate be na: “Tama yenan! Bôte mi nga futi mimbôk, be tele Temple be ye’ele’e bôte wôé.” 26 Ane ñhe évete bezimbi é nga kui nseñ a bezimbi bé, a ke bi be, ve be nga nyoñe be ôte’etek ôte’etek, amu be mbe be ko woñe na bôte be lume be mekok.
27 Nde ñhe be nga soo be a tele be ôsu Sanhédrin. Ane beta prêtre a nga sili be minsili. 28 A nga jô na: “Bi nga ve mia atiñe na mi bo te ke ôsu a ye’ele bôt ajô ya éyôlé ji, ve éyoñe ji, mi jaléya Jérusalem a ñye’elane wônan a mi tyi’iya fo’o na, mia beté ayeme ya metyi me môte nyi minlô miangane yôp.” 29 Pierre a minlômane mivo’o be nga yalane na: “Zambe a ne njôô wongan, nnye bia yiane bo mewôk sa ke bôt. 30 Zambe ya bemvamba bangan a nga wômôlô Yésus, nnye ate mi nga wôé éyoñe mi nga tyelé nye élé.* 31 Zambe a teléya nye Nyu a yoé zen, a Nyii wongan, mbo nnôme na a ve ayoñ Israël fane ya kôñelane nlem a njamane minsem. 32 A bi ne bengaa ya mame mete, a mfufube nsisime nnye Zambe a nga ve bôte ba yeme na a ne njôô a bo nye mewôk, nnye fe a bo’olô de.”
33 Éyoñe be nga wô’ô mejô mete, be nga wô’ô mbia ôlun* a be nga kômbô be mane wôé. 34 Ve mone pharisien, be mbe be lo’one na Gamaliel, a nga tebe tetele ôsu Sanhédrin; a mbe ñye’ele Metiñe me Moïse bôte bese ba semé, ane a nga jô be na be tame kuli bôte bete nseñe mone nté. 35 Nde a nga jô be na: “A bôte ya Israël, taba’ané nya ntyele a jame mia kômbô bo bôte ba. 36 Mia yeme na ôsusua melu ma, Teudas a nga tebe a jô’ô na a ne beta môt, ane abui befame bebé 400 be nga nyiine ngame jé, ve éyoñ a nga wu, bôte bese be nga nyiine ngame jé be nga mane tyamelan a bo momo. 37 Mvuse jé, Judas, môte ya Galilée a nga suane melu ya élañe bôt, a nga dutu abui bôte ngame jé. Môt ate fe a nga wu a bôte bese be nga tôñe nye be nga mane tyamelan. 38 Nde amu nalé ma jô mia na, te mia tôñesane bôte ba, jôka’ane be ne séé amu nge jame di da so be bôt, da ye bo momo; 39 ve nge da so be Zambe, mia ye ke bo ngule ya bo be jôm. Nge nalé momo mi ne teme mi nga viane wosane Zambe émien.” 40 Ane be nga vô’ôlô melebe mé, a be nga loone minlôman a bôme* mie mbia ébôm a télé mie atiñe na mi bo te beta kobô e jôé Yésus, a jô’é mie na mi ke.
41 Nde be nga kôlô Sanhédrin a kui nseñ, be kele’e ba vak, amu be mbe kane bôte ja yiane tôban ékpwe’ele a ébiasé amu jôé dé. 42 A môs ôse, e Temple été a menda menda be nga ke ôsu teke wo’one na ba ye’ele a kate mbamba foé ajô Krist, Yésus.