Kalate ôsu Pierre a nga tili

5 Ajô te, aval ane mvendé ja bo ésaé a ba bevok, ngaa ya minju’u Krist a nga tôbane mie, a nyoñe’e ngabe ya duma da ye yené, ma jô* bemvendé bese be ne zañe jenane na: 2 Ba’alané mbame mintômba Zambe a nga ve mia, mi bo’ok ésaé ane betebele,* sa ke a ntindan, ve a nlem ôse e mise me Zambe; sa ke amu mfi éziñ ô ne medu’an, ve amu be bili nkômbane ya bo de; 3 sa ke na mi jôé ba be ne éli’i Zambe ane bemasa, ve na mi bo bive’ela asu mbam. 4 A éyoñe masa beba’ale mintômba a ye yené, mia ye nyoñe couronne* ya duma a vo’o ndaman.

5 Avale te da, mia bendôman, sila’ané miabebiene si éjôé benya bôtô.* Ve mia bese, jaéané* éjote nyule be môt ase. Amu Zambe a tele ba ba bo éngeleze’e ngame yat, ve bôte be ne éjote nyule* mbe a ve beta mvame wé.

6 Ajô te, sila’ané miabebien éwôlô wo Zambe si, ndemben a ne bete mia mbamba éyoñ, 7 nté mia kate nye mame mese ma tyelé mia minleme yôp,* amu a nyoñe ngap a mia. 8 Ba’alané mbamba mfasane wônan, taba’ané ntyel! Nsiñe wônan, Diable, a ke a wulu aval ane ngbwengbweme ja bam, a jeñe’e na a nyabe môt éziñ.* 9 Ve mi tebe’e nye ngame yat, mi yeme’e mbunan été, mi yeme’e na bobenyañe benane ya si ése* be fe ba tôban avale minjuk éte. 10 Ve, éyoñe mi maneya jibi minju’u mone nté, Zambe ya beta mvam ase, nyu a nga loone mia asu duma ya nnôm éto nsamba a Krist, émien a ye sondô yañele mia. A ye bo na mi tebe ne bip, a ye ve mia ngul a ye yemete mia e nya mbôka’a yôp. 11 Ngul é bo’o be nye nnôm éto. Amen.

12 A ne a zene ya be Sylvain,* nyu ma nyoñ ane mojañe me ne tabe nye ndi, nje me nga tili mia mone kalate nyi, mfa’a ya ve mia ngule nyul a bo’olô na, nyina a ne nya beta mvame Zambe. Teba’ané ne bip e beta mvam ate été. 13 Nyu* a ne Babylone a nyu be nga top aval ane mia, a lôme mia mebatane mé, Marc fe, mone wom, a batane mia. 14 Môt ase a bata’ane nyu mbok a nye’an ôse.

Mvo’é é bo’o a mia bese mia wulu ba’aba’a a Krist.